ಮುಸ್ಲಿಮನಾದರೂ ಈತ ಅದ್ಭುತ ಮೋಹಿನಿಯಟ್ಟಂ ನೃತ್ಯಗಾರ

ತಿರುವನಂತಪುರಂ: ಮುಸ್ಲಿಂ ಧರ್ಮೀಯರೊಬ್ಬರು ನೃತ್ಯ ಪ್ರಕಾರವೊಂದರಲ್ಲಿ ಪಿಎಚ್‌ಡಿ ಪದವಿಯನ್ನು ಮಾಡಿದ್ದಾನೆ. ಇದರಲ್ಲೇನೂ ವಿಶೇಷವಿಲ್ಲ, ಆದರೆ ಆತ ಈ ಸಾಧನೆ ಮಾಡಿರುವುದು ಹಿಂದೂಗಳ ದೇಗುಲ ಕಲೆ ಎಂದೇ ಪ್ರಸಿದ್ಧಿಯನ್ನು ಪಡೆದ ಮೋಹಿನಿಯಟ್ಟಂನಲ್ಲಿ.

ಮೋಹಿನಿಯಟ್ಟಂ ನೃತ್ಯದಲ್ಲಿ ಪ್ರಾವೀಣ್ಯತೆ ಪಡೆದಿರುವ ಈ ಯುವಕನ ಹೆಸರು ಕೆ.ಎಂ.ಅಬು. ಬಾಲ್ಯದಲ್ಲಿ ತನ್ನ ಮನೆ ಪಕ್ಕದಲ್ಲಿನ ಶ್ರೀಮಂತ ಮನೆಯೊಂದರ ಇಬ್ಬರು ಹೆಣ್ಣು ಮಕ್ಕಳು ತಮ್ಮ ಶಿಕ್ಷಕರು ಕಲಿಸಿದ ಮೋಹಿನಿಯಟ್ಟಂ ನೃತ್ಯವನ್ನು ತನ್ನ ಮುಂದೆ ಪ್ರದರ್ಶಿಸಿದಾಗ ಅದರಿಂದ ಪ್ರಭಾವಿತನಾಗಿ ಅಬು ಆ ನೃತ್ಯ ಪ್ರಕಾರವನ್ನು ಕಲಿಯತೊಡಗಿದರು. ಈ ನೃತ್ಯ ಪ್ರಕಾರ ಹೆಣ್ಣು ಮಕ್ಕಳಿಗೆ ಹೆಚ್ಚು ಸೀಮಿತವಾಗಿದ್ದ ಸಂದರ್ಭದಲ್ಲೂ ಅವರು ಮೋಹಿನಿಯಟ್ಟಂನಲ್ಲಿ ಸಾಧನೆ ಮಾಡಿದ್ದಾರೆ.

ಆ ಹುಡುಗಿಯರು ಕಲಿತ ಎಲ್ಲಾ ನೃತ್ಯ ಆಕಾರಗಳನ್ನು ತಾವೂ ಕಲಿಯತೊಡಗಿದರು, ಆ ಮೂಲಕ ಶಾಲೆ, ಇತರ ಸಾಂಸ್ಕೃತಿಕ ವೇದಿಕೆಯಲ್ಲಿ ಮೋಹಿನಿಯಟ್ಟಂ ಪ್ರದರ್ಶಿಸಿದರು. ಜನರಿಂದ ಶಬ್ಬಾಸ್‌ಗಿರಿ ಸಿಕ್ಕಿತು. ನಾನೇ ಕೊರಿಯೋಗ್ರಫಿ ಮಾಡುತ್ತಿದೆ. ಹೀಗಾಗಿ ನನ್ನನ್ನು ಶಾಲೆಯಲ್ಲಿ ಹೀರೋನಂತೆ ಕಾಣುತ್ತಿದ್ದರು ಎನ್ನುತ್ತಾರೆ ಅಬು.

ಕೇರಳದ ವಯನಾಡಿನ ಅತಿ ಬಡ ಕುಟುಂಬದಿಂದ ಬಂದ ಅಬು ತನ್ನ ನೃತ್ಯ ಆಸಕ್ತಿಯನ್ನು ಬೆಳೆಸಲು, ಅದರಲ್ಲಿ ಸಾಧನೆ ಮಾಡಲು ಅಪಾರ ಕಷ್ಟಪಟ್ಟಿದ್ದಾರೆ. ಮುಸ್ಲಿಂ ಒಬ್ಬ ಮೋಹಿನಿಯಟ್ಟಂ ಕಲಿಯುತ್ತಿದ್ದಾನೆ ಎಂದು ಜನ ಇವರನ್ನು ಕುತೂಹಲದಿಂದ ನೋಡುತ್ತಿದ್ದರು. ಜನರೇಕೆ ನನ್ನ ಧಾರ್ಮಿಕ ನಂಬಿಕೆಗೆ ಇಷ್ಟೊಂದು ನಂಬಿಕೆ ಕೊಡುತ್ತಾರೆ ಎಂಬ ಪ್ರಶ್ನೆ ಅಬು ಅವರಿಗೆ ಆಗಾಗ ಕಾಡಿದ್ದಿದೆ.

ಒಮನ್ ವಿಜಯಕುಮಾರ್ ಎಂಬ ಕ್ಲಾಸಿಕಲ್ ಡಾನ್ಸರ್‌ನಿಂದ ತರಬೇತಿ ಪಡೆದ ಅವರು, ಅವರು ಹೋದಲೆಲ್ಲಾ ಹೋಗಿ ನೃತ್ಯ ಪ್ರದರ್ಶನ ಮಾಡುತ್ತಿದ್ದರು. ಈಗಾಗಲೇ ಅವರು ಹಲವಾರು ದೇಗುಲಗಳಲ್ಲಿ, ಹಲವಾರು ವೇದಿಕೆಗಳಲ್ಲಿ ನೃತ್ಯ ಪ್ರದರ್ಶನ ಮಾಡಿದ್ದಾರೆ. ಭರತನಾಟ್ಯವನ್ನೂ ಮೈಗೂಡಿಸಿಕೊಂಡಿದ್ದಾರೆ. ಈಗ ಅವರು ಕೇರಳದ ಖ್ಯಾತ ಮೋಹಿನಿಯಟ್ಟಂ ನೃತ್ಯಗಾರ. ಅವರ ನೃತ್ಯಕ್ಕೆ ಮನಸೋಲದವರೇ ಇಲ್ಲ. ಅವರ ಮಗಳು ಕೂಡ ತಂದೆಯ ಹಾದಿಯಲ್ಲೇ ಸಾಗಿ ಉತ್ತಮ ಮೋಹಿನಿಯಟ್ಟಂ ನೃತ್ಯಗಾರ್ತಿಯಾಗುವ ಭರವಸೆ ಹೊಂದಿದ್ದಾರೆ.

ಕಲೆಯನ್ನು ಒಲಿಸಿಕೊಳ್ಳಲು ಜಾತಿ ಧರ್ಮ ಅಡ್ಡಿಯಾಗಲಾರದು ಎಂಬುದನ್ನು ಅಬು ತೋರಿಸಿಕೊಟ್ಟಿದ್ದಾರೆ.