‘ಸ್ಪರ್ಧಾತ್ಮಕ ಯುಗದಲ್ಲಿ ದೃಶ್ಯ ಮಾಧ್ಯಮದ ಜವಾಬ್ದಾರಿ ಹೆಚ್ಚಿದೆ ‘ – ರಾಮದಾಸ್

ಮಂಗಳೂರು : ಇಂದು ದೃಶ್ಯ ಮಾಧ್ಯಮವು ಜನಸಾಮಾನ್ಯರಿಗೆ ಕ್ಷಣ ಕ್ಷಣದ ಸುದ್ದಿ ಪೂರೈಕೆಯ ವಿಶೇಷ ಮಾಧ್ಯಮವಾಗಿ ರೂಪುಗೊಂಡಿದ್ದು ಹಲವಾರು ಸವಾಲುಗಳನ್ನು ಎದುರಿಸುತ್ತಿದೆ. ನಿಖರವಾದ ಮಾಹಿತಿಗಳನ್ನು ಸರಿಯಾದ ಸಮಯಕ್ಕೆ ಮಾಧ್ಯಮಗಳ ನೀತಿ ಸಂಹಿತೆಯನ್ನು ಉಲ್ಲಂಘಿಸದೆ ಬಿತ್ತರಿಸಬೇಕಾದ ಜವಾಬ್ದಾರಿ ದೃಶ್ಯ ಮಾಧ್ಯಮಕ್ಕೆ ಇದೆ ಎಂದು ಸ್ಪಂದನ ವಾಹಿನಿಯ ಕಾರ್ಯಕ್ರಮ ಮುಖ್ಯಸ್ಥರಾದ ಮೈಮ್ ರಾಮದಾಸ್ ಅಭಿಪ್ರಾಯಪಟ್ಟರು. ಅವರು ಬೆಸೆಂಟ್ ಕಾಲೇಜಿನ ಮಾಧ್ಯಮ ಸಂಘವನ್ನು ಉದ್ಘಾಟಿಸುತ್ತಾ ಮಾತನಾಡಿದರು.

ವಿದ್ಯಾರ್ಥಿ ದೆಸೆಯಲ್ಲಿ ವಿವಿಧ ಪಠ್ಯೇತರ ಚಟುವಟಿಕೆಗಳಲ್ಲಿ ತೊಡಗಿಸಿಕೊಂಡಲ್ಲಿ ವ್ಯಕ್ತಿತ್ವ ವಿಕಸನವಾಗುತ್ತದೆ ಹಾಗೂ ವೃತ್ತಿ ಜೀವನಕ್ಕೆ ಪೂರಕವಾದ ಅಭಿವೃದ್ಧಿ ಇದರಿಂದ ಸಾಧ್ಯವಿದೆ ಎಂದರು. ದೃಶ್ಯ ಮಾಧ್ಯಮ ಬೆಳೆದು ಬಂದ ಹಾದಿ ಎಂಬ ವಿಷಯದ ಬಗ್ಗೆ ಮಾತನಾಡುತ್ತಾ ಅವರು ಈಗಿನ ದೃಶ್ಯ ಮಾಧ್ಯಮಗಳು ತಾಂತ್ರಿಕವಾಗಿ ಉಚ್ಛ್ರಾಯ ಸ್ಥಿತಿಯಲ್ಲಿವೆ.

ಈ ಪರಿಸ್ಥಿತಿಯಲ್ಲಿ ವೃತ್ತಿಪರತೆಗಾಗಿ ಒಬ್ಬನೇ ವ್ಯಕ್ತಿ ಹಲವಾರು ಕೌಶಲ್ಯಗಳನ್ನು ಮೈಗೂಡಿಸಿಕೊಳ್ಳುವುದು ಅಗತ್ಯ ಎಂದರು. ವೇದಿಕೆಯಲ್ಲಿ ಉಸ್ಥಿತರಿದ್ದ ಪ್ರಾಂಶುಪಾಲೆ ಡಾ.ಸುಧಾ ಕೆ ಮಾತನಾಡಿ ಪತ್ರಿಕೋಧ್ಯಮ ವೃತ್ತಿಯಲ್ಲಿ ಇರುವವರು ಸಾಮಾಜಿಕ ಕಳಕಳಿ ಬೆಳೆಸಿಕೊಳ್ಳಬೇಕು. ಅಂಚಿಕೆ ತಳ್ಳಲ್ಪಟ್ಟ ಗುಂಪುಗಳ ಬಗ್ಗೆ ಸಾಮಾಜಿಕ ನ್ಯಾಯ ತೋರಿಸಬೇಕು ಎಂದರು. ಸಂಘದ ಸಂಚಾಲಕಿ ಸ್ಮಿತಾ ಶೆಣೈ ಪ್ರಾಸ್ತವಿಕ ಮಾತುಗಳನ್ನಾಡಿದರು.

ವಿದ್ಯಾರ್ಥಿ ಕಾರ್ಯದರ್ಶಿಯಾಗಿ ಆಶಾಲತಾ ಇವರನ್ನು ನೇಮಿಸಲಾಯಿತು. ವಿದ್ಯಾರ್ಥಿಗಳಾದ ಸಹನಾ ಸ್ವಾಗತಿಸಿದರು. ನಿಶ್ಮಿತಾ ವಂದಿಸಿದರು. ಲಕ್ಷ್ಮೀ ಕಾರ್ಯಕ್ರಮ ನಿರೂಪಿಸಿದರು.