ಕೊರೋನಾ ಟೆಸ್ಟ್‌ಗೆ NCDC ಇಂದ ಕೋಬಾಸ್ 6800 ಅಭಿವೃದ್ಧಿ

ನವದೆಹಲಿ: ಕೊರೋನಾ ಸಂಕಷ್ಟದಲ್ಲಿ ಬಳಲುತ್ತಿರುವ ರಾಷ್ಟ್ರವನ್ನು ರಕ್ಷಿಸುವ ಸಲುವಾಗಿ, ಕೋಬಾಸ್ 6800 ಪರೀಕ್ಷಾ ಯಂತ್ರವನ್ನು ಕೇಂದ್ರ ಆರೋಗ್ಯ ಸಚಿವ ಹರ್ಷವರ್ಧನ್ ಅವರು ಬಿಡುಗಡೆ ಮಾಡಿದ್ದಾರೆ. ಅಲ್ಲದೆ 500 ಕ್ಕೂ ಹೆಚ್ಚು ಪ್ರಯೋಗಾಲಯಗಳ ಮೂಲಕ ಈಗಾಗಲೇ 20 ಲಕ್ಷ ಕೋವಿಡ್-19 ಮಾದರಿಗಳನ್ನು ಪರೀಕ್ಷಿಸಲಾಗಿದೆ ಎಂದು ಅವರು ಮಾಹಿತಿ ನೀಡಿದ್ದಾರೆ.

ಎನ್‌ಸಿಡಿಸಿ ಕೇಂದ್ರದಿಂದ ತಯಾರಿಸಲಾದ ಈ ಪರೀಕ್ಷಾ ಯಂತ್ರವನ್ನು, ಕೇಂದ್ರಕ್ಕೆ ಭೇಟಿ ನೀಡಿದ ಸಂದರ್ಭ ಕೋಬಾಸ್ 6800 ಬಿಡುಗಡೆ ಮಾಡಿದರು. ಕಳೆದ ಮೂರು ದಿನಗಳಿಂದ ಸೋಂಕು ದ್ವಿಗುಣಗೊಳಿಸುವ ತೀವ್ರತೆ ಕಡಿಮೆಯಾಗಿದೆ. ಈ ಸಂದರ್ಭ ಅವರು ನಿಯಂತ್ರಣ ಕೊಠಡಿ ಮತ್ತು ಪ್ರಯೋಗಾಲಯಗಳಿಗೆ ಅಧಿಕಾರಿಗಳೊಂದಿಗೆ ಭೇಟಿ ನೀಡಿ ಪರಿಶೀಲನೆ ನಡೆಸಿದರು. ಅನಂತರ ಮಾತನಾಡಿದ ಅವರು, ಈ ಯಂತ್ರವನ್ನು ಅಭಿವೃದ್ಧಿ ಮಾಡುವ ಮೂಲಕ ದೇಶ ದಿನಕ್ಕೆ 1 ಲಕ್ಷ ಕೊರೋನಾ ಪರೀಕ್ಷೆಗಳನ್ನು ನಡೆಸುವ ಸಾಮರ್ಥ್ಯವನ್ನು ಹೊಂದಿದಂತಾಗಿದೆ. ಇದೊಂದು ಪ್ರಮುಖ ಮೈಲಿಗಲ್ಲಾಗಿದೆ ಎಂದೂ ಅವರು ತಿಳಿಸಿದ್ದಾರೆ. ಇದು 24 ಗಂಟೆಗಳಲ್ಲಿ 1200 ಮಾದರಿಗಳನ್ನು ಪರೀಕ್ಷೆ ಮಾಡುವುದಾಗಿ ತಿಳಿಸಿದ್ದಾರೆ.

ಇನ್ನು ಕೋಬಾಸ್ 6800 ರೋಬಾಟಿಕ್ಸ್ ನೊಂದಿಗೆ ಶಕ್ತಗೊಂಡ ಅತ್ಯಾಧುನಿಕ ಯಂತ್ರವಾಗಿದ್ದು, ಇದು ಮಾಲಿನ್ಯದ ಪ್ರಮಾಣ ಮತ್ತು ಆರೋಗ್ಯ ರಕ ಷಕರ ಮೇಲಾಗಬಹುದಾದ ಸೋಂಕಿನ ಅಪಾಯವನ್ನು ಕಡಿಮೆ ಮಾಡುತ್ತದೆ. ಜೊತೆಗೆ ವೈರಲ್ ಹೆಪಟೈಟಿಸ್ ಬಿ & ಸಿ, ಎಚ್ಐವಿ, ಎಂಟಿಬಿ (ರಿಫಾಂಪಿಸಿನ್ ಮತ್ತು ಐಸೋನಿಯಾಜೈಡ್ ಪ್ರತಿರೋಧ), ಪ್ಯಾಪಿಲೋಮ , ಸಿಎಮ್‌ವಿ, ಕ್ಲಮೈಡಿಯ, ನೈಸೆರಿಯಾ ಇತ್ಯಾದಿ ರೋಗಕಾರಕಗಳನ್ನು ಸಹ ಪತ್ತೆ ಮಾಡುವ ಸಾಮರ್ಥ್ಯ ಹೊಂದಿದೆ ಎಂಬುದಾಗಿ ಅವರು ಮಾಹಿತಿ ನೀಡಿದ್ದಾರೆ.

ಅಲ್ಲದೆ ಕೊರೋನಾ ವಿಚಾರವಾಗಿ ಶ್ರಮಿಸುತ್ತಿರುವ ಆರೋಗ್ಯ ರಕ್ಷಕರಿಗೆ, ಪೊಲೀಸರಿಗೆ ಮೊದಲಾದವರಿಗೆ ಡಾ. ಹರ್ಷವರ್ಧನ್ ಅವರು ಕೃತಜ್ಞತೆ ಸಲ್ಲಿಸಿದ್ದಾರೆ. ಜೊತೆಗೆ ಗರ್ಭಿಣಿಯರು, ವೃದ್ಧರು, ಅನಾರೋಗ್ಯ ಪೀಡಿತರ ಕಾಳಜಿ ವಹಿಸುವಂತೆಯೂ ಅವರು ಸೂಚಿಸಿದ್ದಾರೆ.