ಮಹಾನ್ ದೇಶಭಕ್ತ, ವೀರ ಸ್ವಾತಂತ್ರ್ಯ ಸೇನಾನಿ ಸುಭಾಷ್ ಚಂದ್ರ ಬೋಸ್ ಅವರ 123 ನೇ ಜನ್ಮದಿನವನ್ನು ಇಂದು ಆಚರಿಸಲಾಗುತ್ತಿದೆ. ಅತ್ಯಂತ ಪ್ರಭಾವಿ, ಪ್ರೇರಣಾಶೀಲ ಸ್ವಾತಂತ್ರ್ಯ ವೀರರಾಗಿ ನಮಗೆ ನೇತಾಜೀ ಕಾಣಿಸಿಕೊಳ್ಳುತ್ತಾರೆ. ಅಪ್ರತಿಮ ನಾಯಕತ್ವದ ಗುಣವನ್ನು ಹೊಂದಿದ್ದ ಅವರು ಬ್ರಿಟಿಷರ ವಿರುದ್ಧ ಕೆಚ್ಚೆದೆಯಿಂದ ಹೋರಾಡಿ ಭಾರತಕ್ಕೆ ಮುಕ್ತಿ ಪಥವನ್ನು ತೋರಿಸಿದವರು. ಅವರೊಬ್ಬ ಚಿಂತನಾಶೀಲ ವ್ಯಕ್ತಿ, ಅಮೋಘ ವಾಕ್ಚಾತುರ್ಯ ಹೊಂದಿದ ನಾಯಕರಾಗಿದ್ದರು.
ಜನವರಿ 23 ರಂದು ದೇಶದ ಮೂಲೆ ಮೂಲೆಯಲ್ಲೂ ಸುಭಾಷ್ ಚಂದ್ರ ಬೋಸ್ ಅವರಿಗೆ ನಮನಗಳನ್ನು ಸಲ್ಲಿಸಲಾಗುತ್ತದೆ, ಅವರ ವೀರಗಾಥೆಯನ್ನು, ಕೊಡುಗೆಗಳನ್ನು ಸ್ಮರಿಸಲಾಗುತ್ತದೆ. ಕೋಟ್ಯಾಂತರ ಭಾರತೀಯರ ಹೃದಯದಲ್ಲಿ ಅವರು ಹಚ್ಚಿದ ದೇಶ ಪ್ರೇಮದ ಹಣತೆ ಇಂದಿನ ಯುವ ಮನಸ್ಸುಗಳಲ್ಲೂ ಹರಿಯುತ್ತಿದೆ.
ಬನ್ನಿ, ಮಹಾನ್ ದೇಶಭಕ್ತ ನೇತಾಜೀ ಅವರ ನುಡಿಮುತ್ತುಗಳ ಬಗ್ಗೆ ಅವರ ಜನ್ಮದಿನದ ಸಂದರ್ಭದಲ್ಲಿ ಒಂದಿಷ್ಟು ತಿಳಿದುಕೊಳ್ಳೋಣ.
🔹 ನೀವು ನನಗೆ ರಕ್ತಕೊಡಿ, ನಾನು ನಿಮಗೆ ಸ್ವಾತಂತ್ರ್ಯ ನೀಡುತ್ತೇನೆ.
🔹 ಭಾರತ ಕರೆಯುತ್ತಿದೆ. ರಕ್ತ ರಕ್ತವನ್ನು ಕರೆಯುತ್ತಿದೆ. ಎದ್ದೇಳಿ, ವ್ಯರ್ಥ ಮಾಡಲು ನಮ್ಮ ಬಳಿ ಸಮಯವಿಲ್ಲ. ಶಸ್ತ್ರಗಳನ್ನು ಎತ್ತಿಕೊಳ್ಳಿ! ಶತ್ರುಗಳ ಶ್ರೇಣಿಯ ಮೂಲಕ ನಮ್ಮ ಪಥವನ್ನು ನಾವೇ ರಚಿಸೋಣ. ದೇವರು ಇಚ್ಛಿಸಿದರೆ, ಹುತಾತ್ಮ ಮರಣವನ್ನು ಪಡೆಯೋಣ. ನಮ್ಮ ಕೊನೆಯ ನಿದ್ರೆಯಲ್ಲಿ ನಮ್ಮ ಸೇನೆಯನ್ನು ದೆಹಲಿಗೆ ಕರೆತಂದ ರಸ್ತೆಯನ್ನು ಚುಂಬಿಸೋಣ.
🔹 ಸಿದ್ಧಾಂತಕ್ಕಾಗಿ ಒಬ್ಬ ವ್ಯಕ್ತಿ ಸಾಯಬಹುದು, ಆದರೆ ಸಿದ್ಧಾಂತ ಆತನ ಮರಣದ ಬಳಿಕವೂ ಸಾವಿರಾರು ಜನರ ಬದುಕಿನಲ್ಲಿ ಶಾಶ್ವತವಾಗಿರುತ್ತದೆ.
🔹 ಆಜಾದ್ ಹಿಂದ್ ಫೌಜ್ ನಾವು ನಿಂತಾಗ ಗ್ರಾನೈಟ್ ಗೋಡೆಯಂತೆ ಕಾಣಬೇಕು, ನಾವು ಮೆರವಣಿಗೆ ಮಾಡಿದಾಗ ಸ್ಟೀಮ್‌ರೋಲರ್‌ನಂತೆ ಇರಬೇಕು.
🔹 ಹೋರಾಟ ನಡೆಸದಿದ್ದರೆ, ಸವಾಲನ್ನು ಎದುರಿಸಲು ಮುಂದಾಗದಿದ್ದರೆ ಜೀವನ ಅರ್ಧದಷ್ಟು ಆಸಕ್ತಿಯನ್ನು ಕಳೆದುಕೊಳ್ಳುತ್ತದೆ.
🔹 ನಮ್ಮ ದುರ್ಬಲ ತಿಳುವಳಿಕೆಯನ್ನು ಸಂಪೂರ್ಣವಾಗಿ ಗ್ರಹಿಸಲು ವಾಸ್ತವಿಕತೆಯು ತುಂಬಾ ದೊಡ್ಡದಾಗಿದೆ. ಅದೇನೇ ಇದ್ದರೂ, ಗರಿಷ್ಠ ಸತ್ಯವನ್ನು ಒಳಗೊಂಡಿರುವ ಸಿದ್ಧಾಂತದ ಮೇಲೆ ನಾವು ನಮ್ಮ ಜೀವನವನ್ನು ಕಟ್ಟಿಕೊಳ್ಳಬೇಕು.
🔹 ಸ್ವಾತಂತ್ರ್ಯವನ್ನು ನೀಡಲಾಗುವುದಿಲ್ಲ – ಅದನ್ನು ಕಸಿದುಕೊಳ್ಳಲಾಗುತ್ತದೆ.
🔹 ರಾಜಕೀಯ ಚೌಕಾಶಿಯ ರಹಸ್ಯವೆಂದರೆ ನೀವು ನಿಜವಾಗಿ ಏನಾಗಿದ್ದೀರೋ ಅದಕ್ಕಿಂತ ಹೆಚ್ಚು ದೃಢವಾಗಿ ಕಾಣುವುದು.
🔹 ತಮ್ಮ ರಾಷ್ಟ್ರಕ್ಕೆ ಸದಾ ನಿಷ್ಠರಾಗಿರುವ ಸೈನಿಕರು, ತಮ್ಮ ಪ್ರಾಣವನ್ನು ತ್ಯಾಗಮಾಡಲು ಸದಾ ಸಿದ್ಧರಾಗಿರುವ ಅಜೇಯರು.
🔹 ಅನ್ಯಾಯ ಸಹಿಸುವುದು ಮತ್ತು ತಪ್ಪಿನೊಂದಿಗೆ ಒಪ್ಪಂದ ಮಾಡಿಕೊಳ್ಳುವುದು ಅತೀ ದೊಡ್ಡ ಅಪರಾಧ.
🔹 ಸಂಘರ್ಷವು ನನ್ನನ್ನು ಮನುಷ್ಯನನ್ನಾಗಿ ರೂಪಿಸಿತು. ನನ್ನಲ್ಲಿ ಆತ್ಮವಿಶ್ವಾಸವು ಸೃಷ್ಟಿಯಾಯಿತು, ನನ್ನಲ್ಲಿ ಅದು ಮೊದಲು ಇರಲಿಲ್ಲ.
🔹 ಇತಿಹಾಸದ ಯಾವುದೇ ಮಹತ್ವದ ಬದಲಾವಣೆಗಳನ್ನು ಮಾತುಕತೆ ಮೂಲಕ ಸಾಧಿಸಲಾಗಿಲ್ಲ
🔹 ನಾವೆಲ್ಲರೂ ಒಂದೇ ಆಶಯವನ್ನು ಹೊಂದಬೇಕು, ಭಾರತವನ್ನು ಬದುಕಿಸಲು ನಾವು ಸಾಯುವ ಆಶಯ ಅದಾಗಿರಬೇಕು.
Admin
ಸಮಾಜದ ಉತ್ತಮ ಸುದ್ದಿಗಳನ್ನು ನಾವು ನಿಮ್ಮ ಮುಂದಿಡುವ ಪ್ರಯತ್ನವನ್ನು ಮಾಡುತ್ತಿದ್ದೇವೆ. ಪ್ರೋತ್ಸಾಹಿಸಿ, ಸ್ವೀಕರಿಸಿ. ನೀವು ಸ್ವೀಕರಿಸಿದಾಗ ನಾವು ಬೆಳೆಯಬಹುದು. ಒಳ್ಳೆಯ ಸುದ್ದಿಗಳಿಗೆ ಸಮಾಜ ತೆರೆದುಕೊಂಡಿದೆ ತಲುಪಿಸುವವರು ನಾವಾಗಬಾರದೇಕೆ?
ನ್ಯೂಸ್ 13 ಸಮಾಜದ ಧನಾತ್ಮಕ ಸುದ್ದಿಗಳನ್ನು ಹಾಗೂ ರಾಷ್ಟ್ರೀಯ ವಿಚಾರಗಳನ್ನು ನಿಮಗೆ ತಲುಪಿಸುವ ಪ್ರಯತ್ನ ಮಾಡುತ್ತದೆ. ಈ ರೀತಿ ಇನ್ನಷ್ಟು ಉತ್ತಮ ಸುದ್ದಿಗಳನ್ನು ತಲುಪಿಸಲು ನಿಮ್ಮ ಸಹಕಾರವನ್ನು ಅಪೇಕ್ಷಿಸುತ್ತಿದ್ದೇವೆ. ಈ ಕಾರ್ಯದಲ್ಲಿ ನೀವೂ ನಮ್ಮೊಂದಿಗೆ ಜೊತೆಯಾಗಿ.
News13 strives to publish and promote positive news/happenings and nationalistic thoughts. Join hands with us in this constructive cause. We hope and expect your co-operation in this objective of broadcasting news that shall keep up with quality journalism.
