ದುಬಾರಿ ಬೆಲೆ ಬಣ್ಣ ಬಣ್ಣದ ಕಾರಿನಲ್ಲಿ ಓಡಾಡುವ, ವಿಮಾನದಲ್ಲೇ ಹಾರಾಡುವ ರಾಜಕಾರಣಿಗಳನ್ನು ನಾವು ಸದಾ ನೋಡುತ್ತಿರುತ್ತೇವೆ. ಆದರೆ ಇಲ್ಲೊಬ್ಬ ಸಂಸದ ಮಾತ್ರ ಪ್ರತಿನಿತ್ಯವೂ ಸೈಕಲ್ ಮೂಲಕವೇ ಪ್ರಯಾಣಿಸುತ್ತಾರೆ. ತಮ್ಮ ಕಛೇರಿಗೂ ಕೂಡ.
ಪ್ರಚಾರ ಪಡೆಯಬೇಕು, ಮಾಧ್ಯಮಗಳಲ್ಲಿ ತನ್ನ ಹೆಸರು ಬರಬೇಕು ಎಂಬ ಕಾರಣಕ್ಕೆ ರಾಜಕಾರಣಿಗಳು ಯಾವ ಕಸರತ್ತುಗಳನ್ನಾದರೂ ಮಾಡುತ್ತಾರೆ. ಆದರೆ ರಾಜಸ್ಥಾನದ ಬಿಕನೇರ್‌ನ ಬಿಜೆಪಿ ಸಂಸದ ಅರ್ಜುನ್ ರಾಮ್ ಮೇಘಾವಾಲ್ ಇದಕ್ಕೆ ಭಿನ್ನ. ಇವರು ಪ್ರಚಾರದ ಹಂಗಿಲ್ಲದೆ ಸದಾ ತಮ್ಮ ಸೈಕಲ್‌ನಲ್ಲಿ ಕಛೇರಿಗೆ ತೆರಳುತ್ತಾರೆ. ಜನರ ಮಧ್ಯೆಯೇ ಸೈಕಲ್ ಮೂಲಕ ಓಡಾಡುತ್ತಾರೆ.
ಮಾಧ್ಯಮಗಳು ತಮ್ಮ ಬಗ್ಗೆ ಬರೆಯಲಿ ಎಂದು ಒಂದು ದಿನ ಸೈಕಲ್ ಹತ್ತಿ ಮರುದಿನ ಕಾರನ್ನೇರುವ ಜಾಯಮಾನ ಇವರದ್ದಲ್ಲ. ಸಂಸದನಾಗಿ ಆಯ್ಕೆಯಾಗುವ ಮೊದಲೂ, ಸಂಸದನಾದ ಬಳಿಕವೂ ಇವರ ಸವಾರಿ ಸೈಕಲ್ ಮೇಲೆಯೇ.
ಬಜೆಟ್ ಅಧಿವೇಶನದ ವೇಳೆ ಸಂಸತ್ತಿಗೂ ಇವರು ಸೈಕಲ್ ಮೂಲಕವೇ ಬಂದಿದ್ದರು. ವಾಯು ಮಾಲಿನ್ಯವನ್ನು ಕಡಿಮೆ ಮಾಡಬೇಕು, ಆ ಮೂಲಕ ನಮ್ಮ ಪರಿಸರವನ್ನು ಕಾಪಾಡಬೇಕು ಎಂಬ ಉದ್ದೇಶದಿಂದ ಸೈಕಲ್ ಸವಾರಿ ಮಾಡುವುದಾಗಿ ಅವರು ಹೇಳಿಕೊಳ್ಳುತ್ತಾರೆ.
ಸಂಸದನಾಗಿಯೂ ಇವರು ಜನಮನ್ನಣೆ ಪಡೆದುಕೊಂಡಿದ್ದಾರೆ. ಸಂಸತ್ತಿನಲ್ಲಿ ಶೇ.99ರಷ್ಟು ಹಾಜರಾತಿ ಹೊಂದಿರುವ ಇವರು, ಸಂಸತ್ತಿನಲ್ಲಿ ದೇಶದ ಸಮಸ್ಯೆಗಳ ಬಗ್ಗೆ ವಿಷಯ ಪ್ರಸ್ತಾಪಿಸಿ ಚರ್ಚೆ ನಡೆಸುತ್ತಾರೆ.
ಬಡ ಕುಟುಂಬದ ಹಿನ್ನಲೆಯಿಂದ ಬಂದ ಅವರ ಸರಳ ಸಜ್ಜನಿಕೆ ವ್ಯಕ್ತಿತ್ವ ಬಿಕನೇರ್ ಜನರನ್ನು ಆಕರ್ಷಿಸಿದೆ, ಅವರನ್ನೊಬ್ಬ ಆದರ್ಶ ವ್ಯಕ್ತಿಯಾಗಿ ಜನ ನೋಡುತ್ತಾರೆ ಮತ್ತು ಗೌರವಿಸುತ್ತಾರೆ. ದುಬಾರಿ ಕಾರಿನಲ್ಲಿ ಓಡಾಡುವ ರಾಜಕಾರಣಿಗಳಿಗೂ ಸಿಗದ ಪ್ರೀತಿ, ವಿಶ್ವಾಸ ಇವರಿಗೆ ಸಿಕ್ಕಿದೆ. ಒಬ್ಬ ನಿಜವಾದ ಜನನಾಯಕ ಹೇಗಿರಬೇಕು ಎಂಬುದನ್ನು ಅರ್ಜುನ್ ರಾಮ್ ತೋರಿಸಿಕೊಟ್ಟಿದ್ದಾರೆ.
Admin
ಸಮಾಜದ ಉತ್ತಮ ಸುದ್ದಿಗಳನ್ನು ನಾವು ನಿಮ್ಮ ಮುಂದಿಡುವ ಪ್ರಯತ್ನವನ್ನು ಮಾಡುತ್ತಿದ್ದೇವೆ. ಪ್ರೋತ್ಸಾಹಿಸಿ, ಸ್ವೀಕರಿಸಿ. ನೀವು ಸ್ವೀಕರಿಸಿದಾಗ ನಾವು ಬೆಳೆಯಬಹುದು. ಒಳ್ಳೆಯ ಸುದ್ದಿಗಳಿಗೆ ಸಮಾಜ ತೆರೆದುಕೊಂಡಿದೆ ತಲುಪಿಸುವವರು ನಾವಾಗಬಾರದೇಕೆ?
ನ್ಯೂಸ್ 13 ಸಮಾಜದ ಧನಾತ್ಮಕ ಸುದ್ದಿಗಳನ್ನು ಹಾಗೂ ರಾಷ್ಟ್ರೀಯ ವಿಚಾರಗಳನ್ನು ನಿಮಗೆ ತಲುಪಿಸುವ ಪ್ರಯತ್ನ ಮಾಡುತ್ತದೆ. ಈ ರೀತಿ ಇನ್ನಷ್ಟು ಉತ್ತಮ ಸುದ್ದಿಗಳನ್ನು ತಲುಪಿಸಲು ನಿಮ್ಮ ಸಹಕಾರವನ್ನು ಅಪೇಕ್ಷಿಸುತ್ತಿದ್ದೇವೆ. ಈ ಕಾರ್ಯದಲ್ಲಿ ನೀವೂ ನಮ್ಮೊಂದಿಗೆ ಜೊತೆಯಾಗಿ.
News13 strives to publish and promote positive news/happenings and nationalistic thoughts. Join hands with us in this constructive cause. We hope and expect your co-operation in this objective of broadcasting news that shall keep up with quality journalism.
