ಪಲ್ಸ್ ಪೋಲಿಯೋ ಅಭಿಯಾನದಲ್ಲಿ ಭಾರತ ಮಹತ್ವದ ಯಶಸ್ಸು ಗಳಿಸಿದೆ : ಜೆಪಿ ನಡ್ಡಾ

ನವದೆಹಲಿ : ಪಲ್ಸ್ ಪೋಲಿಯೋ ವಿರುದ್ಧದ ಹೋರಾಟದಲ್ಲಿ ನಮಗೆ ಜಯ ಸಿಕ್ಕಿದೆ. ಆರೋಗ್ಯ ಸಚಿವ ಡಾ.ಹರ್ಷವರ್ಧನ್ ಅವರು ಪಲ್ಸ್ ಪೊಲಿಯೋ ಸವಾಲುಗಳನ್ನು, ಕನಸನ್ನು ಬೆನ್ನತ್ತಿ ಅದನ್ನು ಸಾಕಾರಗೊಳಿಸಿದರು ಎಂದು ಬಿಜೆಪಿ ರಾಷ್ಟ್ರೀಯ ಕಾರ್ಯಕಾರಿ ಅಧ್ಯಕ್ಷ ಜೆಪಿ ನಡ್ಡಾ ಹೇಳಿದ್ದಾರೆ.

ಪಲ್ಸ್ ಪೋಲಿಯೋ ಅಭಿಯಾನದ ಬೆಳ್ಳಿ ಮಹೋತ್ಸವದ ಅಂಗವಾಗಿ ನಡೆದ ಕಾರ್ಯಕ್ರಮವನ್ನು ಉದ್ದೇಶಿಸಿ ಮಾತನಾಡಿದ ಅವರು, “ಹರ್ಷವರ್ಧನ್ ಅವರು ಆರಂಭದಿಂದಲೂ ಯೋಜನೆಯ ಜೊತೆಗಿದ್ದರು. ಮೊದಲು ಇದನ್ನು ದೆಹಲಿಯಲ್ಲಿ ಆರಂಭಿಸಲಾಗಿತ್ತು, ನಂತರ ಅದನ್ನು ದೇಶವ್ಯಾಪಿ ಅಭಿಯಾನವನ್ನಾಗಿಸಲಾಯಿತು”  ಎಂದಿದ್ದಾರೆ.

ಪಲ್ಸ್ ಪೋಲಿಯೋ ಅಭಿಯಾನವನ್ನು ಯಶಸ್ಸುಗೊಳಿಸಲು ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸಚಿವಾಲಯದೊಂದಿಗೆ ಕಾರ್ಯನಿರ್ವಹಿಸುವ ಎಲ್ಲಾ ಸರ್ಕಾರೇತರ ಸಂಸ್ಥೆಗಳಿಗೆ, ಅಂತಾರಾಷ್ಟ್ರೀಯ ಸಂಸ್ಥೆಗಳಿಗೆ, ತಂತ್ರಜ್ಞಾನದ ನೆರವು ನೀಡಿದವರಿಗೆ ಅವರು ಧನ್ಯವಾದಗಳನ್ನು ಅರ್ಪಣೆ ಮಾಡಿದ್ದಾರೆ.

ಈ ಅಭಿಯಾನವು ಬಹಳಷ್ಟು ಸವಾಲುಗಳನ್ನು ಎದುರಿಸುತ್ತಿದೆ ಎಂದು ನಮಗೆ ತಿಳಿದಿತ್ತು. 1997 ರಲ್ಲಿ, ನಾವು ಪ್ರಾಯೋಗಿಕ ಕಾರ್ಯಕ್ರಮವನ್ನು ಪ್ರಾರಂಭಿಸಿದೆವು. ಈಗ ಯಶಸ್ಸು ಆಗಿದ್ದೇವೆ. ಪಾಕಿಸ್ಥಾನ ಮತ್ತು ಅಫ್ಘಾನಿಸ್ಥಾನ ಈಗಲೂ ಪೋಲಿಯೋ ಮುಕ್ತವಾಗಿಲ್ಲ. ಪ್ರತಿ ವರ್ಷ 50,000 ಪ್ರಯಾಣಿಕರು ಪಾಕಿಸ್ಥಾನದಿಂದ ಭಾರತಕ್ಕೆ ಪ್ರಯಾಣಿಸುತ್ತಾರೆ, ಹೀಗಾಗಿ ಪೋಲಿಯೋ ಭಯ ಇನ್ನೂ ಇದೆ ಎಂದಿದ್ದಾರೆ.

ನಮ್ಮ ದೃಢವಾದ ಕಣ್ಗಾವಲು ವ್ಯವಸ್ಥೆಯು ಈ ಕಾರ್ಯಕ್ರಮದ ಮೇಲ್ವಿಚಾರಣೆ ಮಾಡುತ್ತಿದೆ ಮತ್ತು ಎಲ್ಲಾ ಸವಾಲುಗಳ ವಿರುದ್ಧ ನಾವು ಕಠಿಣವಾಗಿ ಹೋರಾಡಿದ್ದೇವೆ. ಪ್ರಸ್ತುತ ದೇಶದಲ್ಲಿ ನಮಗೆ ಒಂದೇ ಒಂದು ಪೋಲಿಯೋ ಪ್ರಕರಣಗಳು ಕಾಣಸಿಗುತ್ತಿಲ್ಲ ಎಂದಿದ್ದಾರೆ.

ಪಾಕಿಸ್ಥಾನ ಮತ್ತು ಅಫ್ಘಾನಿಸ್ಥಾನಗಳಿಗೆ ಪೋಲಿಯೋ ಮುಕ್ತಗೊಳ್ಳಲು ನಾವು ಸಲಹೆಗಳನ್ನು ನೀಡಲು ಸಿದ್ಧರಿದ್ದೇವೆ. ಕಳೆದ ಐದು ವರ್ಷಗಳಲ್ಲಿ, ಅಫ್ಘಾನಿಸ್ಥಾನಕ್ಕೆ ಸಲಹೆಗಳನ್ನು ನೀಡುತ್ತಾ ಬಂದಿದ್ದೇವೆ, ಪಾಕಿಸ್ಥಾನಕ್ಕೂ ಸಹಾಯ ಮಾಡಲು ಸಿದ್ಧರಿದ್ದೇವೆ ಆದರೆ ಪರಿಸ್ಥಿತಿಗಳು ಸರಿಯಿಲ್ಲ ಎಂದಿದ್ದಾರೆ.