ಮುಂದಿನ ವಾರ ಲಡಾಖ್­ನಲ್ಲಿ ಶಿಯೋಕ್ ಸೇತುವೆ ಉದ್ಘಾಟಿಸಲಿದ್ದಾರೆ ರಾಜನಾಥ್ ಸಿಂಗ್

ನವದೆಹಲಿ:  ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ಅವರು ಮುಂದಿನ ವಾರ ಉತ್ತರ ಲಡಾಖ್­ನಲ್ಲಿ ಶಿಯೋಕ್ ಸೇತುವೆಯನ್ನು ಉದ್ಘಾಟಿಸಲಿದ್ದಾರೆ. ಈ ಸೇತುವೆ ದೌಲತ್ ಬೇಗ್ ಓಲ್ಡಿಯ ಗಡಿ ವಲಯಕ್ಕೆ ಸೈನಿಕರ ಸಂಚಾರವನ್ನು ಸುಲಭಗೊಳಿಸುತ್ತದೆ. ಈ ಪ್ರದೇಶದಲ್ಲಿ 2013ರಲ್ಲಿ ಭಾರತ ಮತ್ತು ಚೀನಾ ನಡುವೆ 21 ದಿನಗಳ ಮಿಲಿಟರಿ ಬಿಕ್ಕಟ್ಟು ಉದ್ಭವಿಸಿತ್ತು.

ಸಿಂಧೂವಿನ ಉಪನದಿಯಾದ ಶಿಯೋಕ್ ನದಿಗೆ ಅಡ್ಡಲಾಗಿ ಈ ಸೇತುವೆ ನಿರ್ಮಾಣವಾಗಿದೆ ಮತ್ತು ಇದು ಲಡಾಖ್ ನ ಪ್ರಮುಖ ಪಟ್ಟಣವಾದ ಲೇಹ್ ಅನ್ನು ಸಂಪರ್ಕಿಸುವ ರಸ್ತೆಯ ತುದಿಯಲ್ಲಿ ಇದೆ,  ಕರಕೋರಮ್ ಪಾಸ್ ಅನ್ನೂ ಇದು ಹೊಂದಿದೆ. ಭಾರತ ಮತ್ತು ಚೀನಾ ನಡುವಿನ ವಾಸ್ತವ ನಿಯಂತ್ರಣದ (ಎಲ್ಎಸಿ) ರೇಖೆಯಲ್ಲಿ ಕರಕೋರಮ್ ಪಾಸ್ ಇದೆ. ಟ್ಯಾಂಗ್ಟ್ಸೆ ಮತ್ತು ಚಾಂಗ್ ಲಾ ಪಾಸ್ ಮೂಲಕ ಲೇಹ್ ಅನ್ನು ಕರಕೋರಮ್ ಪಾಸ್­ನೊಂದಿಗೆ ಸಂಪರ್ಕಿಸುವ ಎಲ್ಲಾ ಹವಾಮಾನ ರಸ್ತೆ ಈ ವರ್ಷದ ಆರಂಭದಲ್ಲಿ ಪೂರ್ಣಗೊಂಡಿದೆ. ಮೂಲಗಳ ಪ್ರಕಾರ, ಈ ರಸ್ತೆಯ ಉದ್ದಕ್ಕೂ ಇರುವ ಹಿಮದಿಂದ ತುಂಬಿದ ನದಿಗಳು ಮತ್ತು ತೊರೆಗಳಲ್ಲಿ ಸುಮಾರು ಮೂರು ಡಜನ್ ಸೇತುವೆಗಳನ್ನು ನಿರ್ಮಿಸಲಾಗಿದೆ.

ಶಿಯೋಕ್ ಸೇತುವೆ ಉದ್ಘಾಟನೆಗಾಗಿ ರಾಜನಾಥ್ ಸಿಂಗ್ ಅಕ್ಟೋಬರ್ 21 ರಂದು ಲೇಹ್‌ಗೆ ಪ್ರಯಾಣಿಸಲಿದ್ದಾರೆ ಎಂದು ರಕ್ಷಣಾ ಅಧಿಕಾರಿಗಳು ತಿಳಿಸಿದ್ದಾರೆ.

ಚೀನಾದ ಪೀಪಲ್ಸ್ ರಿಪಬ್ಲಿಕ್ ಆರ್ಮಿ (ಪಿಎಲ್‌ಎ) ಯ ಸೈನಿಕರು 2013 ರ ಏಪ್ರಿಲ್‌ನಲ್ಲಿ ಸುಮಾರು 19 ಕಿ.ಮೀ ದೂರದಲ್ಲಿ ಭಾರತೀಯ ಭೂಪ್ರದೇಶಕ್ಕೆ ಪ್ರವೇಶಿಸಿ ದೌಲತ್ ಬೇಗ್ ಓಲ್ಡಿ ಸೆಕ್ಟರ್ ಬಳಿಯ ರಾಕಿ ನಲಾದಲ್ಲಿ ಡೇರೆಗಳನ್ನು ಸ್ಥಾಪಿಸಿದ್ದರು. ಈ ಪ್ರದೇಶವು ಚೀನಾದ ಕ್ಸಿನ್‌ಜಿಯಾಂಗ್ ಪ್ರಾಂತ್ಯದ ಗಡಿಯಲ್ಲಿರುವ ಎಲ್‌ಎಸಿ ಉದ್ದಕ್ಕೂ ಇದೆ.

2013 ರಲ್ಲಿ ದೌಲತ್ ಬೇಗ್ ಓಲ್ಡಿಗೆ ಚೀನಾದ ಆಕ್ರಮಣ ನಡೆದ ನಂತರ, ಭಾರತವು ಸೈನ್ಯ ಮತ್ತು ಉಪಕರಣಗಳನ್ನು ಸಾಗಿಸುವ ಮೂಲಕ ಈ ಪ್ರದೇಶದಲ್ಲಿ ತನ್ನದೇ ಆದ ನೆಲೆಗಳನ್ನು ನಿರ್ಮಿಸಿತು. ಅದೇ ವರ್ಷದ ಆಗಸ್ಟ್ ತಿಂಗಳಲ್ಲಿ, ಭಾರತವು ತನ್ನ ಸಾಮರ್ಥ್ಯದ ಪ್ರದರ್ಶನಕ್ಕಾಗಿ ದೌಲತ್ ಬೇಗ್ ಓಲ್ಡಿಯಲ್ಲಿ ವಾಯುನೆಲೆಯನ್ನು ಸಕ್ರಿಯಗೊಳಿಸಿತು ಮತ್ತು ಅಲ್ಲಿ ಸಿ -130 ಜೆ ಹರ್ಕ್ಯುಲಸ್ ಸಾರಿಗೆ ವಿಮಾನವನ್ನು ಇಳಿಸಿತು.

ಕೇಂದ್ರ ಗೃಹ ಸಚಿವಾಲಯದ ನಿಯಂತ್ರಣದಲ್ಲಿರುವ ಇಂಡೋ-ಟಿಬೆಟಿಯನ್ ಬಾರ್ಡರ್ ಪೊಲೀಸರ ಕಾರ್ಯಾಚರಣೆಯ ಅಧೀನದಲ್ಲಿ ದೌಲತ್ ಬೇಗ್ ಓಲ್ಡಿ ವಲಯ ಬರುತ್ತದೆ ಎಂದು ಸೇನಾ ಮೂಲಗಳು ತಿಳಿಸಿವೆ. ಕಾರಕೋರಂ ಪಾಸ್ ತನಕ ಸೇತುವೆ ಇರುವ ಶಿಯೋಕ್ ಗ್ರಾಮಕ್ಕಿಂತ ಮುಂದೆ ಯಾವುದೇ ನಾಗರಿಕ ವಾಸ ಇಲ್ಲ ಎಂದು ಮೂಲಗಳು ತಿಳಿಸಿವೆ.