ಕಾರ್ಕಳ: ಗೌಡ ಸಾರಸ್ವತ ಬ್ರಾಹ್ಮಣ ಸಮಾಜದ ಧರ್ಮ ಪೀಠಗಳಲ್ಲಿ ಒಂದಾಗಿರುವ ಶ್ರೀ ಕಾಶೀ ಮಠ ಸಂಸ್ಥಾನದ ಪೀಠಾಧಿಪತಿಯಾಗಿ ಏಳು ದಶಕಗಳ ಸಾರ್ಥಕತೆ ಕಂಡಿರುವ ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮೀಜಿಯವರು ಇದೀಗ ನವತಿ ಸಂಭ್ರಮದಲ್ಲಿದ್ದಾರೆ.
ದೇಶ, ವಿದೇಶಗಳಲ್ಲಿ ಹೊಂದಿರುವ ಲಕ್ಷಾಂತರ ಮಂದಿ ಶಿಷ್ಯವರ್ಗಕ್ಕೆ ಪ್ರತ್ಯಕ್ಷ ದೇವರಾಗಿ, ಶ್ರೀ ಕಾಶೀಮಠದ ಯತಿ ಪರಂಪರೆಯಲ್ಲೇ ತಮ್ಮ ಸಾಧನೆ, ತಪಸಿದ್ಧಿಯಿಂದ ಯತಿಶ್ರೇಷ್ಠರೆನಿಸಿಕೊಂಡ ನಿಜ ಸಂತ ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮೀಜಿಯವರು 90ನೇ ವಸಂತಕ್ಕೆ ಪಾದಾರ್ಪಣೆ ಮಾಡುತ್ತಿರುವ ಸದವಸರದಲ್ಲಿ ಶ್ರೀ ಕ್ಷೇತ್ರ ಹರಿದ್ವಾರದ ವ್ಯಾಸಾಶ್ರಮದಲ್ಲಿ ಇದೇ ಬರುವ ಎ.2 ರಿಂದ 7 ರವರೆಗೆ ನವತಿ ಸಂಭ್ರಮ ಹಮ್ಮಿಕೊಳ್ಳಲಾಗಿದೆ.
ಕೇವಲ ಇಪ್ಪತ್ತರ ಹರೆಯದಲ್ಲೇ ಶ್ರೀ ಕಾಶೀಮಠದ ಯತಿಪರಂಪರೆಯ 20 ನೇ ಉತ್ತರಾಧಿಕಾರಿಯಾಗುವ ಯೋಗ ಅರಸಿ ಬಂದಾಗ 1944ರಲ್ಲಿ ಮುಲ್ಕಿಯಲ್ಲಿ ಗುರು ಶ್ರೀ ಸುಕೃತೀಂದ್ರ ತೀರ್ಥ ಸ್ವಾಮೀಜಿಯವರಿಂದ ಸನ್ಯಾಸ ದೀಕ್ಷೆ ಪಡೆದ ಶ್ರೀ ಸುಧೀಂದ್ರ ತೀರ್ಥ ಸ್ವಾಮೀಜಿಯವರು ಕಳೆದ ಏಳು ದಶಕಗಳಿಂದ ಸಂಸ್ಥಾನದ ಪ್ರಗತಿ ಮತ್ತು ಶಿಷ್ಯವರ್ಗದ ಉನ್ನತಿಗಾಗಿ ಶ್ರಮಿಸುತ್ತಲೇ ಬಂದಿದ್ದಾರೆ. ಸದಾ ಪರಮಾತ್ಮನ ಪ್ರಾರ್ಥನೆ, ಅರ್ಚನೆ, ಸತ್ ಚಿಂತನೆ, ಸಮಾಜ ಮುಖಿ ಯೋಚನೆ, ಯೋಜನೆಗಳಿಂದ ಶಿಷ್ಯವರ್ಗಕ್ಕೆ ಮಾರ್ಗದರ್ಶನ, ಸತ್ ಪ್ರೇರಣೆ ನೀಡುತ್ತಿರುವ ಶ್ರೀಗಳವರಿಂದಾಗಿ ಸಂಸ್ಥಾನಕ್ಕೂ, ಜಿ.ಎಸ್.ಬಿ. ಸಮಾಜಕ್ಕೂ ಉನ್ನತ ಘನತೆ, ಗೌರವಗಳು ಪ್ರಾಪ್ತಿಯಾಗಿವೆ.
ತಮ್ಮ ಆಸಕ್ತಿಯ ಆಧ್ಯಾತ್ಮ, ಅಧ್ಬುತ ಗ್ರಹಣ ಶಕ್ತಿ, ಭಕ್ತಿ, ಶಿಷ್ಯವರ್ಗದ ಕುರಿತಾದ ನಿರ್ಮಲ ಪ್ರೀತಿ, ಸಮಾಜದ ಕುರಿತ ಕಾಳಜಿಯಿಂದಾಗಿಯೇ ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮೀಜಿ ಶಿಷ್ಯವರ್ಗದ ಪಾಲಿಗೆ ಸಾಕ್ಷಾತ್ ಭಗವಂತನ ಪ್ರತಿರೂಪ ಎನಿಸಿಕೊಂಡಿದ್ದಾರೆ.
ಸರ್ವರ ಒಳಿತಿನಲ್ಲೇ ಪರಮಾತ್ಮನನ್ನು ಕಂಡ ತಪಸ್ವಿಯಾಗಿ, ಶ್ರೀ ಕಾಶೀಮಠದ ಆಧ್ಯಾತ್ಮ ದೀಪವಾಗಿ, ಶಿಷ್ಯವರ್ಗದ ವಿಶೇಷ ಭಕ್ತಿ, ಗೌರವಗಳಿಗೆ ಪಾತ್ರರಾಗಿರುವ ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮೀಜಿ ತಮ್ಮ ಜ್ಞಾನದ ಬೆಳಕಿನಿಂದಲೇ ಶಿಷ್ಯವರ್ಗದ ಬಾಳನ್ನು ಬೆಳಗಿದ ಮಹಾ ತಪಸ್ವಿ. ’ಹರಿ ಮುನಿದರೂ ಗುರು ಕಾಯ್ವ’ನೆಂಬ ಮಾತು ಸತ್ಯವೆಂಬಂತೆ ’ಒಳ್ಳೆಯದೇ ಆಗುತ್ತದೆ. ದೇವರು ಒಳ್ಳೆಯ ರೀತಿಯಲ್ಲಿ ಮುನ್ನಡೆಸುತ್ತಾರೆ’ ಎಂದು ಗುರುವರ್ಯರು ನೀಡಿದ ಅಭಯದ ನುಡಿಗಳನ್ನು ಭಗವಂತ ನಡೆಸಿದ್ದಾನೆ, ನಡೆಸಿಕೊಡಲೇ ಬೇಕಾದ ಅನಿವಾರ್ಯತೆಗೂ ಸಿಲುಕಿದ್ದರೆ ಅದಕ್ಕೆ ಮುಖ್ಯ ಕಾರಣ ಗುರುಗಳ ತಪೋ ಬಲ. ತಮ್ಮನ್ನೇ ನಂಬಿರುವ ಗೌಡ ಸಾರಸ್ವತ ಬ್ರಾಹ್ಮಣ ಸಮಾಜದ ಒಳಿತಿನ ಜತೆ ದೇಶಕ್ಕೆ ಮಾತ್ರವಲ್ಲ, ಜಾಗತಿಕ ಕಲ್ಯಾಣಕ್ಕಾಗಿ ನಿತ್ಯ ಪ್ರಾರ್ಥಿಸುವ, ಹಾರೈಸುವ ಸಮಾಜ ಮುಖಿ ಚಿಂತನೆಯ ಜ್ಞಾನ ಸೂರ್ಯ, ಯೋಗಿ ರಾಜ ಗುರು ಶ್ರೀಮತ್ ಸುಧೀಂದ್ರ ತೀರ್ಥ ಸ್ವಾಮೀಜಿಯವರ ನವತಿ ಸಂಭ್ರಮ ಅವರ ಶಿಷ್ಯವರ್ಗಕ್ಕೆ ದೊರೆತಿರುವ ಮಹಾ ಸೌಭಾಗ್ಯ.
ಇದು ಹರಿಗುರು ಸೇವೆಯಲ್ಲಿ ಧನ್ಯತೆಯನ್ನು ಕಾಣುವ ಮತ್ತು ತಮ್ಮೆಲ್ಲರ ಶ್ರೇಯೋಭಿವೃದ್ಧಿಯಲ್ಲೇ ಸಂತೃಪ್ತಿ ಕಾಣುತ್ತಿರುವ ಗುರುವರ್ಯರಿಗೆ ಗುರುನಮನ ಸಲ್ಲಿಸಲು ದೊರೆತಿರುವ ಸುವರ್ಣಾವಕಾಶವೂ ಹೌದು.
News13
ಸಮಾಜದ ಉತ್ತಮ ಸುದ್ದಿಗಳನ್ನು ನಾವು ನಿಮ್ಮ ಮುಂದಿಡುವ ಪ್ರಯತ್ನವನ್ನು ಮಾಡುತ್ತಿದ್ದೇವೆ. ಪ್ರೋತ್ಸಾಹಿಸಿ, ಸ್ವೀಕರಿಸಿ. ನೀವು ಸ್ವೀಕರಿಸಿದಾಗ ನಾವು ಬೆಳೆಯಬಹುದು. ಒಳ್ಳೆಯ ಸುದ್ದಿಗಳಿಗೆ ಸಮಾಜ ತೆರೆದುಕೊಂಡಿದೆ ತಲುಪಿಸುವವರು ನಾವಾಗಬಾರದೇಕೆ?
ನ್ಯೂಸ್ 13 ಸಮಾಜದ ಧನಾತ್ಮಕ ಸುದ್ದಿಗಳನ್ನು ಹಾಗೂ ರಾಷ್ಟ್ರೀಯ ವಿಚಾರಗಳನ್ನು ನಿಮಗೆ ತಲುಪಿಸುವ ಪ್ರಯತ್ನ ಮಾಡುತ್ತದೆ. ಈ ರೀತಿ ಇನ್ನಷ್ಟು ಉತ್ತಮ ಸುದ್ದಿಗಳನ್ನು ತಲುಪಿಸಲು ನಿಮ್ಮ ಸಹಕಾರವನ್ನು ಅಪೇಕ್ಷಿಸುತ್ತಿದ್ದೇವೆ. ಈ ಕಾರ್ಯದಲ್ಲಿ ನೀವೂ ನಮ್ಮೊಂದಿಗೆ ಜೊತೆಯಾಗಿ.
News13 strives to publish and promote positive news/happenings and nationalistic thoughts. Join hands with us in this constructive cause. We hope and expect your co-operation in this objective of broadcasting news that shall keep up with quality journalism.
