ಪ್ರತಿಭೆ ಎನ್ನುವುದು ಶ್ರೀಮಂತರು, ಬಡವರು ಎಂದು ನೋಡಿ ಬರುವುದಿಲ್ಲ. ಅದು ಎಲ್ಲರೊಳಗೂ ಇರುತ್ತದೆ. ಇಚ್ಛಾಶಕ್ತಿ, ಪರಿಶ್ರಮ ಮತ್ತು ಪ್ರೋತ್ಸಾಹಗಳಿದ್ದರೆ ಪ್ರತಿಭೆಗಳು ಅರಳಿ ನಿಲ್ಲುತ್ತವೆ. ಬದುಕಿಗೆ ಬೆಳಕಾಗುತ್ತವೆ. ತಮಿಳುನಾಡಿನ ಚಹಾ ವ್ಯಾಪಾರಿಯೊಬ್ಬರ ಮಗಳು ವಿಶ್ವದ ಅತ್ಯುನ್ನತ ಬಾಹ್ಯಾಕಾಶ ಸಂಸ್ಥೆ ನಾಸಾಗೆ ಭೇಟಿ ನೀಡುವ ಅವಕಾಶವನ್ನು ಪಡೆದುಕೊಂಡಿದ್ದಾಳೆ.
15 ವರ್ಷದ ತಾನ್ಯಾ ದಶ್ನಮ್ ಮಧುರೈನ ಮಹಾತ್ಮ ಮಾಂಟೆಸ್ಸರಿ ಮೆಟ್ರಿಕ್ಯುಲೇಷನ್ ಹೈಯರ್ ಸೆಕೆಂಡರಿ ಶಾಲೆಯಲ್ಲಿ 10 ನೇ ತರಗತಿ ವಿದ್ಯಾರ್ಥಿನಿಯಾಗಿದ್ದಾಳೆ. ಈಕೆಯ ತಾಯಿ ಸಿಕಂದರ್ ಜಾಫರ್ ಅದೇ ಶಾಲೆಯಲ್ಲಿ ಶಿಕ್ಷಕಿ. ತಾನ್ಯಾ ಅವರ ತಂದೆ ಜಾಫರ್ ಉಸೇನ್ ಚಹಾ ಅಂಗಡಿಯೊಂದನ್ನು ನಡೆಸುತ್ತಿದ್ದಾರೆ. ಅವಳು ಮತ್ತು ಅವಳ ಪೋಷಕರು ಮಧುರೈ ಮೂಲದವರು.
ತಾನ್ಯಾಳಿಗೆ ವಿಜ್ಞಾನ ವಿಷಯವೆಂದರೆ ಅದೇನೋ ಉತ್ಸಾಹ ಮತ್ತು ಎಲ್ಲಿಲ್ಲದ ಪ್ರೀತಿ. ಚಿಕ್ಕ ವಯಸ್ಸಿನಿಂದಲೇ ಈಕೆಗೆ ವಿಜ್ಞಾನಿಯಾಗುವ ಕನಸು. ಮಾಜಿ ರಾಷ್ಟ್ರಪತಿ ಮತ್ತು ವಿಜ್ಞಾನಿ ಅಬ್ದುಲ್ ಕಲಾಂ ಈಕೆಯ ಸ್ಫೂರ್ತಿ. ಅವರಂತೆಯೇ ವಿಜ್ಞಾನಿಯಾಗಿ ಸಾಧನೆ ಮಾಡಬೇಕೆಂಬ ಕನಸನ್ನು ಈಕೆ ನಿತ್ಯ ಕಾಣುತ್ತಾಳೆ. ಇದೇ ಕಾರಣಕ್ಕೆ ವಿಜ್ಞಾನವನ್ನು ಅತ್ಯಂತ ಶ್ರದ್ಧಾ ಭಕ್ತಿಯಿಂದ ಅಧ್ಯಯನ ಮಾಡುತ್ತಾಳೆ.
www.go4guru.com ವೆಬ್‌ಸೈಟ್ ಮೂಲಕ ಅಂತಾರಾಷ್ಟ್ರೀಯ ಬಾಹ್ಯಾಕಾಶ ವಿಜ್ಞಾನ ಸ್ಪರ್ಧೆಯನ್ನು ಇತ್ತೀಚಿಗೆ ನಡೆಸಲಾಗಿತ್ತು. ತಾನ್ಯಾ ಈ ಸ್ಪರ್ಧೆಯಲ್ಲಿ ಭಾಗವಹಿಸಿದ್ದಾಳೆ ಮತ್ತು ನಾಸಾಗೆ ಭೇಟಿ ನೀಡಲು ಅವಕಾಶ ಪಡೆದ ಹಲವರಲ್ಲಿ ಒಬ್ಬಳಾಗಿ ಹೊರಹೊಮ್ಮಿದ್ದಾಳೆ.
ಈ ಅವಕಾಶ ಭಾರತದ ಇನ್ನಿಬ್ಬರಿಗೂ ಒಲಿದು ಬಂದಿದೆ ಎಂಬುದು ಇಲ್ಲಿ ಗಮನಾರ್ಹ. ಆಂಧ್ರಪ್ರದೇಶದ ಸೈಪುಜಿತಾ ಮತ್ತು ಮಹಾರಾಷ್ಟ್ರದ ಅಲಿಪಕ್ ಕೂಡ ನಾಸಾ ಬಾಹ್ಯಾಕಾಶ ಕೇಂದ್ರಕ್ಕೆ ಭೇಟಿ ನೀಡುವ ಅವಕಾಶವನ್ನು ಪಡೆದುಕೊಂಡಿದ್ದಾರೆ. ಈ ಇಬ್ಬರು ಸೇರಿದಂತೆ ತಾನ್ಯಾ ಮುಂದಿನ ತಿಂಗಳು ಬಾಹ್ಯಾಕಾಶ ಸಂಶೋಧನಾ ಕೇಂದ್ರ ನಾಸಾಗೆ ತೆರಳಲಿದ್ದು, ಅಲ್ಲಿ ಒಂದು ವಾರಗಳ ಕಾಲ ತಂಗಲಿದ್ದಾರೆ. ಅಲ್ಲಿನ ಪ್ರಯೋಗಾಲಯಗಳನ್ನು ಅನ್ವೇಷಿಸಿ ವಿಜ್ಞಾನಿಗಳೊಂದಿಗೆ ಚರ್ಚೆ ನಡೆಸಲಿದ್ದಾರೆ. ಅವರಿಗಾಗಿ ಮೊನ್ನೆ ಚೆನ್ನೈನಲ್ಲಿ ವಿಮಾನ ಟಿಕೆಟ್ ಹಸ್ತಾಂತರ ಮಾಡಲಾಯಿತು ಮತ್ತು ಅಭಿನಂದನಾ ಕಾರ್ಯಕ್ರಮವನ್ನು ನಡೆಸಲಾಯಿತು. ಈ ಕಾರ್ಯಕ್ರಮದಲ್ಲಿ ನಾಸಾದ ನಿವೃತ್ತ ಗಗನಯಾತ್ರಿ ಟನ್ ಥಾಮಸ್ ಸೇರಿದಂತೆ ಪ್ರಮುಖ ವ್ಯಕ್ತಿಗಳು ಭಾಗವಹಿಸಿದ್ದರು.
ತನಗೆ ಸಿಕ್ಕಿರುವ ಅವಕಾಶದ ಬಗ್ಗೆ ಅತೀವ ಸಂತೋಷವನ್ನು ಪಟ್ಟುಕೊಂಡಿರುವ ತಾನ್ಯ, “ನಾನು ಚಿಕ್ಕವಳಿದ್ದಾಗಿನಿಂದಲೂ ವಿಜ್ಞಾನದ ಬಗ್ಗೆ ಅಪಾರ ಒಲವು ಹೊಂದಿದ್ದೆ. ನಾನು 5 ನೇ ತರಗತಿ ಓದುತ್ತಿರುವಾಗ ವಿಜ್ಞಾನಿಯಾಗಬೇಕೆಂಬ ಮಹತ್ವಾಕಾಂಕ್ಷೆಯನ್ನು ಬೆಳೆಸಿಕೊಂಡೆ. ನಾನು ಯುನೈಟೆಡ್ ಸ್ಟೇಟ್ಸ್ನ ನಾಸಾ ಬಾಹ್ಯಾಕಾಶ ಸಂಶೋಧನಾ ಕೇಂದ್ರಕ್ಕೆ ಹೋಗಬೇಕೆಂಬ ಕನಸನ್ನೂ ಹೊಂದಿದ್ದೆ. ನನ್ನ ಆ ಕನಸು ಈಗ ನನಸಾಗುತ್ತಿದೆ. ಇದರಿಂದ ನನಗೆ ಅಪಾರ ಆನಂದವಾಗುತ್ತಿದೆ. ನನ್ನ ಸ್ಫೂರ್ತಿ ಮಾಜಿ ರಾಷ್ಟ್ರಪತಿ ಅಬ್ದುಲ್ ಕಲಾಂ. ಅವರಂತೆ ವಿಜ್ಞಾನಿಯಾಗುವುದು ಮತ್ತು ರಾಷ್ಟ್ರದ ಸೇವೆ ಮಾಡುವುದು ನನ್ನ ಗುರಿ. ಈ ನಾಸಾ ಪ್ರಯಾಣ ನನ್ನ ಕನಸುಗಳಿಗೆ ಸ್ಫೂರ್ತಿಯಾಗಲಿದೆ ಎಂದು ನಾನು ನಂಬುತ್ತೇನೆ ” ಎಂದಿದ್ದಾಳೆ.
ಬಾಲ್ಯದಿಂದಲೇ ವಿಜ್ಞಾನಿಯಾಗುವ ಮಹತ್ವಾಕಾಂಕ್ಷೆಯನ್ನು ಬೆಳೆಸಿಕೊಂಡಿರುವ ತಾನ್ಯಾ ದಶ್ನಮಿ ಭವಿಷ್ಯದಲ್ಲಿ ಭಾರತದ ವಿಜ್ಞಾನಿಯಾಗಿ ಹೊರಹೊಮ್ಮುತ್ತಾಳೆ ಎಂಬ ಆಶಾವಾದ ಎಲ್ಲರದ್ದಾಗಿದೆ.
Admin
ಸಮಾಜದ ಉತ್ತಮ ಸುದ್ದಿಗಳನ್ನು ನಾವು ನಿಮ್ಮ ಮುಂದಿಡುವ ಪ್ರಯತ್ನವನ್ನು ಮಾಡುತ್ತಿದ್ದೇವೆ. ಪ್ರೋತ್ಸಾಹಿಸಿ, ಸ್ವೀಕರಿಸಿ. ನೀವು ಸ್ವೀಕರಿಸಿದಾಗ ನಾವು ಬೆಳೆಯಬಹುದು. ಒಳ್ಳೆಯ ಸುದ್ದಿಗಳಿಗೆ ಸಮಾಜ ತೆರೆದುಕೊಂಡಿದೆ ತಲುಪಿಸುವವರು ನಾವಾಗಬಾರದೇಕೆ?
ನ್ಯೂಸ್ 13 ಸಮಾಜದ ಧನಾತ್ಮಕ ಸುದ್ದಿಗಳನ್ನು ಹಾಗೂ ರಾಷ್ಟ್ರೀಯ ವಿಚಾರಗಳನ್ನು ನಿಮಗೆ ತಲುಪಿಸುವ ಪ್ರಯತ್ನ ಮಾಡುತ್ತದೆ. ಈ ರೀತಿ ಇನ್ನಷ್ಟು ಉತ್ತಮ ಸುದ್ದಿಗಳನ್ನು ತಲುಪಿಸಲು ನಿಮ್ಮ ಸಹಕಾರವನ್ನು ಅಪೇಕ್ಷಿಸುತ್ತಿದ್ದೇವೆ. ಈ ಕಾರ್ಯದಲ್ಲಿ ನೀವೂ ನಮ್ಮೊಂದಿಗೆ ಜೊತೆಯಾಗಿ.
News13 strives to publish and promote positive news/happenings and nationalistic thoughts. Join hands with us in this constructive cause. We hope and expect your co-operation in this objective of broadcasting news that shall keep up with quality journalism.
