‘ಡ್ಯಾನ್ಸಿಂಗ್ ಸರ್’ – ವಿಭಿನ್ನ ಬೋಧನಾ ಶೈಲಿಯಿಂದ ಮಕ್ಕಳ ಶಾಲಾ ತೊರೆಯುವಿಕೆ ತಡೆದ ಒರಿಸ್ಸಾ ಶಿಕ್ಷಕ

ಭುವನೇಶ್ವರ: ಒರಿಸ್ಸಾದ ಶಾಲಾ ಶಿಕ್ಷಕರೊಬ್ಬರ ಅನನ್ಯ ಬೋಧನಾ ವಿಧಾನವು ಈಗ ಎಲ್ಲರ ಪ್ರಶಂಸೆಗೆ ಪಾತ್ರವಾಗುತ್ತಿದೆ. ಒರಿಸ್ಸಾದ ಕೊರಪುಟ್ ಜಿಲ್ಲೆಯ ಲ್ಯಾಮ್‌ಟಾಪುಟ್ ಅಪ್ಪರ್ ಪ್ರೈಮರಿ ಸ್ಕೂಲಿನಲ್ಲಿ ಅವರು ಬೋಧನೆ ಮಾಡುತ್ತಿರುವ ದೃಶ್ಯ ಈಗ ಸಾಮಾಜಿಕ ಮಾಧ್ಯಮಗಳಲ್ಲಿ ಭಾರೀ ವೈರಲ್ ಆಗಿದೆ. ಅವರಿಗೆ ಶ್ಲಾಘನೆಗಳ ಮಹಾಪೂರವೂ ಹರಿದು ಬರುತ್ತದೆ.

ವೀಡಿಯೊದಲ್ಲಿ, ಶಾಲೆಯ ಉಸ್ತುವಾರಿ ಮುಖ್ಯೋಪಾಧ್ಯಾಯರಾಗಿರುವ ಪ್ರಫುಲ್ಲಾ ಕುಮಾರ್ ಪಾಥಿ ಪಠ್ಯದ ಅಧ್ಯಾಯಗಳನ್ನು ನೃತ್ಯ ಮಾದರಿಯ ಭಂಗಿಯನ್ನು ಮಾಡಿ ಮಕ್ಕಳಿಗೆ ಮನದಟ್ಟಾಗುವಂತೆ ಹೇಳಿಕೊಡುತ್ತಾರೆ. ವಿದ್ಯಾರ್ಥಿಗಳೂ ಕೂಡ ಅವರ ಭಂಗಿಗಳನ್ನು ಅನುಸರಿಸುತ್ತಾರೆ ಮತ್ತು ಅವರ ಪಾಠಗಳನ್ನು ಅತ್ಯಂತ ಏಕಾಗ್ರತೆಯಿಂದ ಆಲಿಸುತ್ತಾರೆ.

ಕೊರಾಪುಟ್‌ನ “ಡ್ಯಾನ್ಸಿಂಗ್ ಸರ್” ಎಂದು ಜನಪ್ರಿಯವಾಗಿರುವ 56 ವರ್ಷದ ಪಾಥಿ ಅವರು, 2008 ರಿಂದ ಸರ್ವಾ ಶಿಕ್ಷಾ ಅಭಿಯಾನದ ಸಂಪನ್ಮೂಲ ವ್ಯಕ್ತಿಯಾಗಿ ಆಯ್ಕೆಯಾದಾಗಿನಿಂದ ವಿದ್ಯಾರ್ಥಿಗಳಿಗೆ ತಮ್ಮ ವಿಶಿಷ್ಟ ಶೈಲಿಯಲ್ಲಿ ಬೋಧನೆ ಮಾಡುತ್ತಿದ್ದಾರೆ.

“ಬೋಧನೆ ವಿನೋದಮಯವಾಗಿರಬೇಕು ಮತ್ತು ಏಕತಾನತೆಯಿಂದ ಕೂಡಿಬಾರದು ಎಂಬುದನ್ನು ನಾನು ಕಂಡುಕೊಂಡಿದ್ದೇನೆ. ಹಾಗಾಗಿ ನನ್ನ ಶಿಕ್ಷಣದ ವಿಧಾನವನ್ನು ನಾನೇ ರೂಪಿಸಿದೆ ”ಎಂದು ಪಾಥಿ ಹೇಳುತ್ತಾರೆ.

“ನಾನು ಹಾಡು ಮತ್ತು ನೃತ್ಯದ ಮೂಲಕ ಕಲಿಸಲು ಪ್ರಾರಂಭಿಸಿದ ನಂತರ ಮಕ್ಕಳು ಅಧ್ಯಯನದಲ್ಲಿ ಹೆಚ್ಚು ಆಸಕ್ತಿ ತೋರಿಸುತ್ತಿದ್ದಾರೆ. ಮಕ್ಕಳು ಶಾಲೆಗೆ ಬರಲು ಹೆಚ್ಚಿನ ಒಲವು ತೋರಿಸುತ್ತಿದ್ದಾರೆ ”ಎಂದು ಅವರು ಹೇಳಿದ್ದಾರೆ.

ವಿಶೇಷವೆಂದರೆ, ಪಾಥಿ ಅವರು ತರಗತಿಗೆ ಬರುವ ಮೊದಲು ಪಠ್ಯಗಳನ್ನು ಪದ್ಯವಾಗಿ ಬದಲಾಯಿಸಿ ಅಭ್ಯಾಸ ಮಾಡುತ್ತಾರೆ, ನಂತರ ತರಗತಿಗೆ ಬಂದು ಅದನ್ನು ಮಕ್ಕಳಿಗೆ ಹೇಳಿಕೊಡುತ್ತಾರೆ. “ಮಧ್ಯಾಹ್ನದ ಬಿಸಿಯೂಟವನ್ನು ಸೇವಿಸಿದ ಮಕ್ಕಳು ನಿದ್ರೆಗೆ ಜಾರುವ ಸಾಧ್ಯತೆ ಇರುತ್ತದೆ. ಹೀಗಾಗಿ ದೈಹಿಕವಾಗಿ ಅವರನ್ನು ಚಟುವಟಿಕೆಯಿಂದ ಇಡಲು ನಾನು ಪ್ರಯತ್ನಿಸುತ್ತೇನೆ. ನೃತ್ಯ ಮಾಡುವುದರಿಂದ ಅವರು ನಿದ್ರೆಗೆ ಜಾರುವುದಿಲ್ಲ” ಎಂದು ಅವರು ಹೇಳುತ್ತಾರೆ.

ಪಾಥಿ ಅವರ ವಿಭಿನ್ನ ಶೈಲಿಯ ಬೋಧನೆಯು ಮಕ್ಕಳ ಸ್ಕೂಲ್ ಡ್ರಾಪ್ ಔಟ್ ಪ್ರಮಾಣವನ್ನೂ ತಗ್ಗಿಸಿದೆ ಎಂದು ಸ್ಥಳಿಯರು ಹೇಳುತ್ತಾರೆ.