ಇಸ್ರೇಲ್ ಚುನಾವಣಾ ಬ್ಯಾನರ್­ಗಳಲ್ಲಿ ರಾರಾಜಿಸುತ್ತಿದ್ದಾರೆ ಮೋದಿ

ಟೆಲ್ ಅವೀವ್: ಇದೇ ವರ್ಷದ ಸೆಪ್ಟೆಂಬರ್ 17 ರಂದು ಇಸ್ರೇಲ್­­ನಲ್ಲಿ ಚುನಾವಣೆ ನಡೆಯಲಿದ್ದು, ಈ ಹಿನ್ನಲೆಯಲ್ಲಿ ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಅವರು ಪ್ರಧಾನಿ ನರೇಂದ್ರ ಮೋದಿಯವರೊಂದಿಗೆ ಇರುವ ಬ್ಯಾನರ್­ಗಳು ಅಲ್ಲಿ ರಾರಾಜಿಸುತ್ತಿವೆ. ಮೋದಿ ಮಾತ್ರವಲ್ಲೇ,  ಯುಎಸ್ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮತ್ತು ರಷ್ಯಾ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಅವರೊಂದಿಗೆ ಇರುವ ಚಿತ್ರಗಳನ್ನು ಒಳಗೊಂಡ ಬ್ಯಾನರ್­ಗಳನ್ನು  ಪ್ರದರ್ಶಿಸಲಾಗುತ್ತಿದೆ.  ಲಿಕುಡ್ ಪಕ್ಷದ ಮುಖಂಡರಾಗಿರುವ ನೆತನ್ಯಾಹು ಅವರ ವ್ಯಕ್ತಿತ್ವವನ್ನು ವಿಭಿನ್ನವಾಗಿ ಬಿಂಬಿಸುವ ಸಲುವಾಗಿ ಈ ಬ್ಯಾನರ್­ಗಳನ್ನು ಅಳವಡಿಸಲಾಗಿದೆ.

ಟೆಲ್ ಅವೀವ್‌ನ ಮೆಟ್ಜುಡಾಟ್ ಜೀವ್ 38, ಕಿಂಗ್ ಜಾರ್ಜ್ ಸ್ಟ್ರೀಟ್‌ನಲ್ಲಿರುವ ಲಿಕುಡ್ ಪಕ್ಷದ ಪ್ರಧಾನ ಕಛೇರಿಯಲ್ಲಿ ಚುನಾವಣಾ ಜಾಹೀರಾತು ಬ್ಯಾನರ್‌ಗಳೊಂದಿಗೆ, ನೆತನ್ಯಾಹು ಅವರು ಮೂವರು ವಿಶ್ವ ನಾಯಕರೊಂದಿಗೆ  ನಿಕಟರಾಗಿರುವ ಫೋಟೋಗಳ ಬ್ಯಾನರ್­ಗಳನ್ನು ಹಾಕಲಾಗಿದೆ. ಹೀಬ್ರೂ ಭಾಷೆಯಲ್ಲಿ,  Netanyahu (in a) “different league” ಎಂದು ಬರೆಯಲಾಗಿದೆ.

ವಿಶ್ವ ನಾಯಕರೊಂದಿಗೆ ಅವರ ನಿಕಟತೆಯನ್ನು ಕೇಂದ್ರೀಕರಿಸಿ ನೆತನ್ಯಾಹು ಅವರ ಚುನಾವಣಾ ಪ್ರಚಾರ ಕಾರ್ಯ ನಡೆಯುತ್ತಿದೆ ಮತ್ತು ಆ ದೇಶದ ಭದ್ರತೆಗೆ ನಿರ್ಣಾಯಕವಾಗಿರುವ ಇಸ್ರೇಲಿ ರಾಜಕೀಯದಲ್ಲಿ ಸಾಟಿಯಿಲ್ಲದ ನಾಯಕನಾಗಿ ಅವರನ್ನು ಬಿಂಬಿಸಲು ಪ್ರಯತ್ನಿಸಲಾಗುತ್ತಿದೆ.

 ಈ ಯಹೂದಿ ರಾಷ್ಟ್ರದಲ್ಲಿ ಮತದಾನ ನಡೆಯಲು ಕೇವಲ ಎಂಟು ದಿನಗಳು ಇರುವ ಮೊದಲು ಇಸ್ರೇಲಿ ಪ್ರಧಾನ ಮಂತ್ರಿ ನೆತನ್ಯಾಹು ಅವರು ಸೆಪ್ಟೆಂಬರ್ 9 ರಂದು ಮೋದಿಯವರನ್ನು ಭೇಟಿಯಾಗಲು ದೆಹಲಿಗೆ ಬರಲಿದ್ದಾರೆ. ಕೆಲವು ರಾಜಕೀಯ ವಿಶ್ಲೇಷಕರ ಪ್ರಕಾರ, ವಿಶ್ವ ಒಪ್ಪಿತ ನಾಯಕನೆಂದು ತೋರಿಸಿಕೊಳ್ಳಲು ಮತ್ತು ಮತದಾನಕ್ಕೂ ಮುನ್ನ ತನ್ನ ಇಮೇಜ್ ಅನ್ನು ಇನ್ನಷ್ಟು ಬಿಲ್ಡ್ ಮಾಡಲು ಅವರು ಮೋದಿಯನ್ನು ಭೇಟಿಯಾಗುತ್ತಿದ್ದಾರೆ.