ಶ್ರೀನಿವಾಸ್ ಪೂಜಾರಿ ಧರಣಿಗೆ ಕಾರ್ಣಿಕ್ ಬೆಂಬಲ

ಮಂಗಳೂರು : ಗುತ್ತಿಗೆ ಸ್ಟಾಫ್ ನರ್ಸ್‌ಗಳಿಗೆ ಪರಿಷ್ಕೃತ ಕನಿಷ್ಠ ವೇತನ ಹಾಗೂ ಖಾಯಂಗೊಳಿಸಲು ಒತ್ತಾಯಿಸಿ ಕೋಟಾ ಶ್ರೀನಿವಾಸ ಪೂಜಾರಿಯವರು ಆರೋಗ್ಯ ಸಚಿವ ಯು.ಟಿ. ಖಾದರ್ ಕಛೇರಿ ಎದುರು ನಾಳೆ ನಡೆಸಲು ಉದ್ದೇಶಿಸಿರುವ ಧರಣಿಗೆ ಕ್ಯಾಪ್ಟನ್ ಗಣೇಶ್ ಕಾರ್ಣಿಕ್‌ರವರು ಬೆಂಬಲ ಸೂಚಿಸಿದ್ದಾರೆ.

ಅರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆಯಲ್ಲಿ ಗುತ್ತಿಗೆ ಆಧಾರದ ಮೇಲೆ 13 ವರ್ಷಗಳ ಹಿಂದೆ ನೇಮಕಗೊಂಡಿರುವ ಶುಶ್ರೂಷಕಿ (ಸ್ಟಾಫ್ ನರ್ಸ್) ಗಳಿಗೆ ಇದುವರೆಗೆ ಪರಿಷ್ಕೃತ ಕನಿಷ್ಠ ವೇತನವಾದ ರೂ. 17,650/- ಬದಲಿಗೆ ಇನ್ನೂ ರೂ. 4,575/- ಮಾಸಿಕ ವೇತನದಲ್ಲೇ ದುಡಿಸಿಕೊಳ್ಳುತ್ತಾ ಅನ್ಯಾಯವೆಸಗುತ್ತಿರುವುದು ಹಾಗೂ ಸಕ್ರಮಾತಿಗೆ ಈ ಹಿಂದೆ ಶ್ರೀ ಜಗದೀಶ್ ಶೆಟ್ಟರ್ ಮುಖ್ಯಮಂತ್ರಿಗಳಾಗಿದ್ದ ಸಂದರ್ಭದಲ್ಲಿ ಕೈಗೊಂಡ ನಿರ್ಣಯವನ್ನು ಅನುಷ್ಠಾನಗೊಳಿಸದೆ ನಿರ್ಲಕ್ಷ್ಯ ತೋರುತ್ತಿರುವ ಆರೋಗ್ಯ ಸಚಿವರಾದ ಶ್ರೀ ಯು.ಟಿ. ಖಾದರ್ ಕಛೇರಿಯ ಎದುರು ಮಾಚಿ ಸಚಿವರು ಹಾಗೂ ವಿಧಾನ ಪರಿಷತ್ ಸದಸ್ಯರೂ ಆಗಿರುವ ಶ್ರೀ ಶ್ರೀನಿವಾಸ ಪೂಜಾರಿಯವರು ಹಮ್ಮಿಕೊಂಡಿರುವ ಧರಣಿಗೆ ವಿಧಾನ ಪರಿಷತ್ತಿನ ವಿರೋಧ ಪಕ್ಷದ ಮುಖ್ಯ ಸಚೇತಕರಾದ ಕ್ಯಾಪ್ಟನ್ ಗಣೇಶ್ ಕಾರ್ಣಿಕ್ ರವರು ತನ್ನ ಸಂಪೂರ್ಣ ಬೆಂಬಲವನ್ನು ಘೋಷಿಸಿದ್ದಾರೆ.

ಗುತ್ತಿಗೆ ಶುಶ್ರೂಷಕಿಯರ ಬಗ್ಗೆ ಸಹನುಭೂತಿಯನ್ನು ವ್ಯಕ್ತಪಡಿಸುತ್ತಾ, 13 ವರ್ಷಗಳ ಹಿಂದೆ ಮೆರಿಟ್ ಹಾಗೂ ರೋಸ್ಟರ್ ಆಧಾರದಲ್ಲಿ ರಾಜ್ಯದ ವಿವಿಧ ಭಾಗಗಳಲ್ಲಿ ಗುತ್ತಿಗೆ ಆಧಾರದಲ್ಲಿ ನೇಮಕಗೊಂಡಿರುವ ಶುಶ್ರೂಷಕಿಯರಿಗೆ ಪರಿಷ್ಕೃತ ವೇತನ ನೀಡಲು ಹಾಗೂ ಖಾಯಂಗೊಳಿಸಲು ಕೂಡಲೆ ಕ್ರಮಕೈಗೊಳ್ಳುವಂತೆ ಆರೋಗ್ಯ ಸಚಿವರನ್ನು ಆಗ್ರಹಿಸಿದ್ದಾರೆ.