ಪಾಕ್ ಪರ ಹೇಳಿಕೆ: ನಾಸಿರುದ್ದೀನ್ ಷಾಗೆ ಶಿವಸೇನೆ ತಿರುಗೇಟು

ಮುಂಬಯಿ: ಭಾರತ ಮತ್ತು ಪಾಕಿಸ್ಥಾನದ ಹಳಸುತ್ತಿರುವ ಸಂಬಂಧದ ಬಗ್ಗೆ ವಿಷಾದ ವ್ಯಕ್ತಪಡಿಸಿ, ಪಾಕಿಸ್ಥಾನ ಶತ್ರು ರಾಷ್ಟ್ರ ಎಂದು ನಂಬುವಂತೆ ಭಾರತೀಯರಿಗೆ ಬ್ರೇನ್‌ವಾಶ್ ಮಾಡಲಾಗುತ್ತಿದೆ ಎಂದು ಸಂದರ್ಶನವೊಂದರಲ್ಲಿ ಹೇಳಿಕೆ ನೀಡಿದ್ದ ಬಾಲಿವುಡ್ ನಟ ನಾಸಿರುದ್ದೀನ್ ಷಾ ವಿರುದ್ಧ ಶಿವಸೇನೆ ಕಿಡಿ ಕಾರಿದೆ.

ತನ್ನ ಪತ್ರಿಕೆ ಸಾಮ್ನಾದಲ್ಲಿ ಶಿವಸೇನೆ ಷಾರಿಗೆ ತಿರುಗೇಟು ನೀಡಿದ್ದು ‘ಪಾಕಿಸ್ಥಾನವನ್ನು ಯಾಕೆ ದ್ವೇಷಿಸುತ್ತೀರಿ ಎಂದು ಷಾ 26/11ರಲ್ಲಿ ತನ್ನ ಪ್ರೀತಿಪಾತ್ರರನ್ನು ಕಳೆದುಕೊಂಡವರಲ್ಲಿ ಕೇಳಲಿ, ಅವರು ಆ ಪ್ರಶ್ನೆಗೆ ಚೆನ್ನಾಗಿ ಉತ್ತರ ನೀಡುತ್ತಾರೆ. ಪಾಕಿಸ್ಥಾನ ನಿರಂತರ ರಕ್ತಪಾತದಲ್ಲಿ ತೊಡಗಿದೆ. ಕೇವಲ ಮುಂಬಯಿ ದಾಳಿ ಮಾತ್ರವಲ್ಲ ಸಂಸತ್ ದಾಳಿ, ಅದಕ್ಕಿಂತ ಮುಂಚಿನ ಎಲ್ಲಾ ದಾಳಿಗಳೂ ಪಾಕಿಸ್ಥಾನದ ಮಾಸ್ಟರ್ ಮೈಂಡ್’

ಕೆಲ ದಿನಗಳ ಹಿಂದೆಯಷ್ಟೇ ಕುತ್ವಾ ಪೊಲೀಸ್ ಚೆಕ್‌ಪೋಸ್ಟ್ ಮೇಲೆ ಉಗ್ರರ ದಾಳಿ ನಡೆದಿತ್ತು. ಅದರಲ್ಲಿ ಭಾರತೀಯ ಯೋಧ ಸಾವಿಗೀಡಾಗಿದ್ದಾರೆ. ಆ ಯೋಧನ ಹೆತ್ತವರಲ್ಲಿ ಹೋಗಿ ಕೇಳಿ ನೀವ್ಯಾಕೆ ಪಾಕಿಸ್ಥಾನವನ್ನು ದ್ವೇಷಿಸುತ್ತೀರಿ ಎಂದು’

ಈ ಎಲ್ಲವನ್ನು ಮರೆತು ನಾವು ಪಾಕಿಸ್ಥಾನವನ್ನು ಪ್ರೀತಿಸಬೇಕು ಎಂದು ನೀವು ಹೇಳುತ್ತೀರಾ? ಭಾರತ ಮಣ್ಣಿನಲ್ಲಿ ಅದು ನಡೆಸಿದ ಅಮಾನವೀಯ ಕೃತ್ಯವನ್ನು ನಾವು ಮರೆಯಬೇಕಾ? ಅದು ಮುಂದೆ ಏನು ಮಾಡುತ್ತದೆ ಎಂಬುದನ್ನು ನಿರ್ಲಕ್ಷ್ಯಿಸಬೇಕೆ? ಎಂದು ಷಾಗೆ ತಿರುಗೇಟು ನೀಡಿದೆ.

ಅಲ್ಲದೇ ‘ನೀವು ನಿಮ್ಮ ಪರಿಶ್ರಮದಿಂದ ಇದುವರೆಗೆ ಏನು ಸಾಧಿಸಿದ್ದೀರೋ ಅದನ್ನು ಈಗ ಕಳೆದುಕೊಂಡಿದ್ದೀರಿ. ನೀವು ಈ ಹಿಂದೆ ಹೀಗಿರಲಿಲ್ಲ. ಲಾಹೋರ್‌ನಿಂದ ಬಂದ ಮಂತ್ರವಾದಿ ನಿಮ್ಮನ್ನು ವಶೀಕರಣ ಮಾಡಿರಬೇಕು’ ಎಂದು ಷಾರನ್ನು ವ್ಯಂಗ್ಯವಾಡಿದೆ.

ಬಾಲಿವುಡ್‌ನ ಖ್ಯಾತ ನಟನಾಗಿರುವ ನಾಸಿರುದ್ದೀನ್ ಷಾ ಪಾಕಿಸ್ಥಾನದ ಹಲವಾರು ಚಿತ್ರಗಳಲ್ಲಿ ನಟಿಸಿದ್ದಾರೆ. ಜನರೊಂದಿಗೆ ನೇರ ಸಂಬಂಧ ಹೊಂದಲು ಬಯಸುವ ನಾನು ಆಗಾಗ ಪಾಕಿಸ್ಥಾನಕ್ಕೆ ಭೇಟಿ ನೀಡುತ್ತಿರುತ್ತೇನೆ ಎಂದು ಅವರು ಸಂದರ್ಶನದಲ್ಲಿ ಹೇಳಿದ್ದಾರೆ.