ಸುಳ್ಯದ 28 ಬೀಡಾಡಿ ದನಗಳನ್ನು ಸಂರಕ್ಷಿಸಿ ಶ್ರೀರಾಮಚಂದ್ರಾಪುರಮಠಕ್ಕೆ ಸಮರ್ಪಣೆ

ಬೆಂಗಳೂರು : ಗಿರಿನಗರದ ಶ್ರೀರಾಮಚಂದ್ರಾಪುರಮಠದಲ್ಲಿ ನಡೆಯುತ್ತಿರುವ ಅಭಯಚಾತುರ್ಮಾಸ್ಯ ಕಾರ್ಯಕ್ರಮದಲ್ಲಿ ಸುಳ್ಯದಲ್ಲಿ 28 ಬೀಡಾಡಿ ಗೋವುಗಳ ರಕ್ಷಣೆ ಮಾಡಿ ಗೋವುಗಳನ್ನು ಶ್ರೀರಾಮಚಂದ್ರಾಪುರಮಠಕ್ಕೆ ಸಮರ್ಪಿಸಲಾಯಿತು.

ಭಾರತೀಯ ಗೋಪರಿವಾರದ ಮೂಲಕ ಸುಳ್ಯದ 28 ಬೀಡಾಡಿ ದನಗಳನ್ನು ಸಂರಕ್ಷಿಸಲಾಗಿದ್ದು, ಸುಳ್ಯದ ಗೋಕಿಂಕರರು ಅವುಗಳನ್ನು ರಕ್ಷಿಸಿ, ಸ್ಥಳೀಯ ಆಡಳಿತದ ಅನುಮತಿಯನ್ನು ಪಡೆದು ಶ್ರೀರಾಮಚಂದ್ರಾಪುರಮಠಕ್ಕೆ ಸಮರ್ಪಿಸಿದರು. ಬೆಂಗಳೂರಿನ ಝಾನ್ಸಿರಾಣಿ ಅವರ ಕೋರಿಕೆಯ ಮೇರೆಗೆ ಸಂರಕ್ಷಿಸಿದ 28 ಗೋವುಗಳನ್ನು ಶ್ರೀಮಠದಿಂದ ಆಶೀರ್ವಾದ ಪೂರ್ವಕವಾಗಿ ನೀಡಲಾಯಿತು. ಆ ಮೂಲಕ ದಿಕ್ಕಿಲ್ಲದ ಗೋವುಗಳನ್ನು ಆಸರೆ ನೀಡಲಾಯಿತು.

ಇಂದು ನಡೆದ ಕಾರ್ಯಕ್ರಮದಲ್ಲಿ ಉದ್ಯಮಿಗಳಾದ ಗೋವರ್ಧನ್ ಶೆಟ್ಟಿ, ರಾಜ್ಯ ಗೋಪರಿವಾರದ ಕುಮಾರ್ ಗಾಣಿಗೇರ್, ಹಾಸನ ಜಿಲ್ಲಾ ಗೋಪರಿವಾರದ ಅಧ್ಯಕ್ಷರಾದ ಗೋರಾಮಣ್ಣ ಮುಂತಾದ ಗಣ್ಯರು ’ಅಭಯಾಕ್ಷರ’ದ ಹಕ್ಕೊತ್ತಾಯಕ್ಕೆ ಸಹಿಮಾಡಿ ಜಗದ್ಗುರು ಶಂಕರಾಚಾರ್ಯ ಶ್ರೀಶ್ರೀರಾಘವೇಶ್ವರಭಾರತೀ ಮಹಾಸ್ವಾಮಿಗಳಿಗೆ ಸಮರ್ಪಿಸಿದರು. ಗೋಕಿಂಕರರಾಗಿ ಸೇವೆಸಲ್ಲಿಸಲು ಇಚ್ಚಿಸುವ ಗೋಪ್ರೇಮಿಗಳಿಗೆ ’ಗೋದೀಕ್ಷೆ’ ಹಾಗೂ ಗೋವಿನ ಕುರಿತಾದ ಅಕ್ಷರ ಸೇವೆ ಸಲ್ಲಿಸುವ ಗೋಕಿಂಕರರಿಗೆ ’ಅಕ್ಷರದೀಕ್ಷೆ’ಯನ್ನು ಪೂಜ್ಯ ಶ್ರೀಗಳು ನೀಡಿದರು.

ಡಾಲ್ಫಿನ್ ಇರಿಗೇಷನ್ ಸಿಸ್ಟಮ್ಸ್­ನ ಮಾಲಿಕರಾದ ಗಜಾನನ ಹೆಗಡೆ ದಂಪತಿಗಳಿಂದ ಸರ್ವಸೇವೆ ನೆರವೇರಿತು. ಎಂದಿನಂತೆ ಶ್ರೀಕರಾರ್ಚಿತ ಪೂಜೆ, ಅಭಯಂಕರ ಮಂತ್ರ ಹವನ ಹವನ, ಆದಿತ್ಯ ಹೃದಯ ಹವನ, ಮಾತೆಯರಿಂದ ಕುಂಕುಮಾರ್ಚನೆ, ಫಲಸಮರ್ಪಣೆ, ಮಂತ್ರಾಕ್ಷತೆ ಹಾಗೂ ಸಾಯಂಕಾಲ ಶ್ರೀಶಂಕರಾಚಾರ್ಯ ವಿರಚಿತ ಸಾಧನಾಪಂಚಕದ ಪ್ರವಚನ ನಡೆಯಿತು.

ನಾಳೆ (ಜುಲೈ 28) ಜೆ.ಪಿ.ನಗರದಲ್ಲಿ ಹಾಲುಹಬ್ಬ:
ಶ್ರೀಶ್ರೀ ರಾಘವೇಶ್ವರಭಾರತೀಮಹಾಸ್ವಾಮೀಜಿಯವರ ವಿಶಿಷ್ಟ ಪರಿಕಲ್ಪನೆಯಾದ ಅಭಯಾಕ್ಷರ- ಹಾಲುಹಬ್ಬ, ಬೃಹತ್ ಉತ್ಸವವಾಗಿ ರೂಪುಗೊಳ್ಳುತ್ತಿದ್ದು, ಶನಿವಾರ ಜೆ.ಪಿ.ನಗರ ನಡೆಯಲಿದೆ. ಮಧ್ಯಾಹ್ನ 3 ಗಂಟೆಗೆ ಜೆಪಿನಗರ 7ನೇ ಹಂತದ ಆರ್‍ಬಿಐ ಬಡಾವಣೆ ಆಟದ ಮೈದಾನದಲ್ಲಿ ನಡೆಯುವಹಾಲುಹಬ್ಬದಲ್ಲಿ ಶಾಸಕರಾದ ಎಂ.ಕೃಷ್ಣಪ್ಪ ಭಾಗವಹಿಸುವರು. ಗೋಪೂಜೆ, ಗೋದೀಕ್ಷೆ, ಅಕ್ಷರದೀಕ್ಷೆ, ಗೋಗ್ರಾಸ, ಗೋವಿಚಾರ, ಪ್ರಸ್ತುತಿ, ಅಭಯಾಕ್ಷರ, ಗೋಕಲೆ, ಗವ್ಯೋತ್ಪನ್ನಗಳಪ್ರದರ್ಶನ ಮತ್ತು ಮಾರಾಟ, ರಥಯಾತ್ರೆ ಮುಂತಾದ ವಿಶಿಷ್ಟ ಕಾರ್ಯಕ್ರಮಗಳು ನಡೆಯಲಿವೆ.