ಗೋವುಗಳನ್ನು ನೀಡುವಂತೆ ಕೇರಳದ ಚಿಮೇನಿ ಕಾರಾಗೃಹದಿಂದ ಶ್ರೀರಾಮಚಂದ್ರಾಪುರಮಠಕ್ಕೆ ಕೋರಿಕೆ

ಬೆಂಗಳೂರು : ಕೇರಳದ ಚಿಮೇನಿ ತೆರೆದ ಕಾರಾಗೃಹದ ಗೋಶಾಲೆಗೆ ದೇಶೀ ತಳಿಯ 18 ಗೋವುಗಳನ್ನು ಪೂರೈಸುವಂತೆ ಕಾರಾಗೃಹದ ಸೂಪರಿಂಟೆಂಡೆಂಟ್ ಶ್ರೀರಾಮಚಂದ್ರಾಪುರಮಠದ ಕಾಮದುಘಾ ಯೋಜನೆಗೆ ಕೋರಿಕೆಯನ್ನು ಸಲ್ಲಿಸಿದ್ದಾರೆ.

ಜೈಲಿನ ಗೋಶಾಲೆಗೆ ಒಟ್ಟು 20 ದೇಶೀ ಗೋವುಗಳನ್ನು ಪೂರೈಸುವಂತೆ ಮಾಡಲಾಗಿದ್ದ ಕೋರಿಕೆಯ ಮೇರೆಗೆ, ಕಳೆದ ಜನವರಿಯಲ್ಲಿ ಪ್ರಥಮಹಂತವಾಗಿ 2 ಗೋವುಗಳನ್ನು ನೀಡಲಾಗಿತ್ತು, ಸ್ವತಃ ಶ್ರೀರಾಮಚಂದ್ರಾಪುರಮಠದ ಜಗದ್ಗುರು ಶಂಕರಾಚಾರ್ಯ ಶ್ರೀಶ್ರೀರಾಘವೇಶ್ವರಭಾರತೀ ಮಹಾಸ್ವಾಮಿಗಳು ಚಿಮೇನಿ ಕಾರಾಗೃಹಕ್ಕೆ ಚಿತ್ತೈಸಿ ಗೋವುಗಳನ್ನು ಹಸ್ತಾಂತರಿಸಿದ್ದರು. ಜೈಲಿನ ಆವರಣದಲ್ಲಿ ಪೂಜೆಯನ್ನು ಮಾಡಲಾಗಿದೆ ಎಂಬ ಅಪಪ್ರಚಾರದಿಂದಾಗಿ; ಜೈಲಿಗೆ ಗೋವಿನ ಹಸ್ತಾಂತರದ ವಿಚಾರ ಚರ್ಚೆಗೆ ಗ್ರಾಸವಾಗಿತ್ತು. ಆದರೆ ಇದೀಗ ಕೇರಳ ರಾಜ್ಯದ ಕಾರಾಗೃಹಗಳ ಮಹಾನಿರ್ದೇಶಕರೇ 18 ದೇಶೀ ಗೋವುಗಳನ್ನು ಶ್ರೀರಾಮಚಂದ್ರಾಪುರಮಠದ ಕಾಮದುಘಾ ಯೋಜನೆಯಿಂದ ದೇಣಿಗೆಯಾಗಿ ಪಡೆದುಕೊಳ್ಳಲು ಚಿಮೇನಿ ತೆರೆದ ಕಾರಾಗೃಹದ ಸೂಪರಿಂಟೆಂಡೆಂಟ್ ಅವರಿಗೆ ಪತ್ರದ(P2/11485/2017 PrHQ 09-06-2017) ಮೂಲಕ ಸಮ್ಮತಿ ಸೂಚಿಸಿದ್ದಾರೆ.

ಕಾರಾಗೃಹಗಳ ಮಹಾನಿರ್ದೇಶಕರೇ ಗೋವುಗಳನ್ನು ಪಡೆದುಕೊಳ್ಳಲು ಸಮ್ಮತಿ ನೀಡಿರುವುದು, ಕೇರಳದ ಸರ್ಕಾರವೇ ಸಮ್ಮತಿ ಸೂಚಿಸಿದಂತಾಗಿದೆ. ಈ ಹಿನ್ನೆಲೆಯಲ್ಲಿ ಚಿಮೇನಿ ಕಾರಾಗೃಹದ ಸೂಪರಿಂಟೆಂಡೆಂಟ್ ಅವರು ಶ್ರೀರಾಮಚಂದ್ರಾಪುರಮಠದ ಕಾಮದುಘಾ ಯೋಜನೆಯಿಂದ ದೇಶಿ ಗೋವುಗಳನ್ನು ಗೋಸಂರಕ್ಷಣೆಯ ಉದ್ದೇಶಕ್ಕಾಗಿ ಜೈಲಿನಲ್ಲಿರುವ ಗೋಶಾಲೆಗೆ ಪೂರೈಸುವಂತೆ ಕೋರಿಕೆ ಸಲ್ಲಿಸಿರುತ್ತಾರೆ ಎಂದು ಪ್ರಕಟಣೆ ತಿಳಿಸಿದೆ.