ದೇಶದಲ್ಲೇ ಮೊದಲ ಬಾರಿಗೆ ಎರಡು ವಿಶ್ವದಾಖಲೆಗೆ ಯತ್ನ ‘ಪೂಜ್ಯಪಾದರ’ ಬೃಹತ್ ಚರಣ, ಬೃಹದಾಕಾರ ದೀಪಗಳ ಸ್ವಸ್ತಿಕ ದಾಖಲೆಗೆ ಸಾಕ್ಷಿಯಾಗಲಿದೆ ಚಾಮರಾಜನಗರ ಜಿಲ್ಲೆಯ ‘ಕನಕಗಿರಿ’ ಜೈನ ಪಾವನ ಕ್ಷೇತ್ರ
ಬೆಂಗಳೂರು: ಅಂತರ್ಮನ ಮುನಿಶ್ರೀ ಪ್ರಸನ್ನ ಸಾಗರ್ ಜೀ ಮಹಾರಾಜ್, ನೇತೃತ್ವದಲ್ಲಿ ಚಾಮರಾಜನಗರ ಜಿಲ್ಲೆಯ ‘ಕನಕಗಿರಿ’ ಜೈನ ಪಾವನ ಕ್ಷೇತ್ರ ದೇಶದಲ್ಲೇ ಮೊದಲ ಬಾರಿಗೆ ಎರಡು ವಿಶ್ವದಾಖಲೆಗೆ ನಾಂದಿ ಹಾಡಲಿದೆ. ‘ಪೂಜ್ಯಪಾದರ’ ಬೃಹತ್ ಚರಣ, ಬೃಹದಾಕಾರ ದೀಪಗಳ ಸ್ವಸ್ತಿಕ ದಾಖಲೆಗೆ ಸಾವಿರಾರು ಜನರು ಸಾಕ್ಷಿಯಾಗಲಿದ್ದಾರೆ.
11 ಕ್ಕೂ ಹೆಚ್ಚು ಕಾಲೇಜುಗಳ 1600 ಕ್ಕೂ ಹೆಚ್ಚು ವಿದ್ಯಾರ್ಥಿಗಳಿಂದ ಮಹರ್ಷಿ ‘ಪೂಜ್ಯಪಾದರ’ ಬೃಹತ್ ಚರಣದ ಆಕೃತಿ ನಿರ್ಮಾಣ ಮತ್ತು 1200 ಮಕ್ಕಳಿಂದ 1 ನಿಮಿಷದೊಳಗೆ ಸ್ವಸ್ತಿಕ್ ಆಕಾರದಲ್ಲಿ 5 ಸಾವಿರ ದೀಪ ಬೆಳಗಿಸಿ ದಾಖಲೆಗೆ ಕನಕಗಿರಿ ಕ್ಷೇತ್ರ ಸಜ್ಜುಗೊಂಡಿದೆ. ಚಾಮರಾಜ ನಗರ ಜಿಲ್ಲೆಯ ಶ್ರೀಕನಕಗಿರಿ ಜೈನ ಕ್ಷೇತ್ರದ ಅತಿಶಯ ಮಹೋತ್ಸವ ಸಮಿತಿ ಈ ಜವಾಬ್ದಾರಿ ಹೊತ್ತುಕೊಂಡಿದೆ. ಮುನಿಶ್ರೀ ಪೀಯೂಷ ಸಾಗರ್ ಜೀ ಮಹಾರಾಜರು ವಿಶ್ವ ದಾಖಲೆ ಕಾರ್ಯಕ್ರಮದ ನಿರ್ದೇಶನದ ಹೊಣೆ ಹೊತ್ತಿದ್ದಾರೆ. ಜನವರಿ 29-1-2017 ರ ಭಾನುವಾರ ಮಧ್ಯಾಹ್ನ 1 ಗಂಟೆಯಿಂದ ಸಂಜೆ 4.30 ರ ವರೆಗೆ ಚಾಮರಾಜನಗರ ಜಿಲ್ಲೆಯ ಶ್ರೀ ಕನಕಗಿರಿ ಕ್ಷೇತ್ರದಲ್ಲಿ ಈ ಕಾರ್ಯಕ್ರಮ ನಡೆಯಲಿದೆ.
ಚಾಮರಾಜನಗರ ಜಿಲ್ಲೆಯ ಜೈನರ ದಕ್ಷಿಣ ಕಾಶಿ ಎಂದೇ ಖ್ಯಾತವಾಗಿರುವ; ಹಿಂದೊಮ್ಮೆ ಜೈನ ತೀರ್ಥಂಕರ ಮಹಾವೀರರು ನಡೆದುಹೋಗಿದ್ದ ಈ ಶ್ರೀಕನಕಗಿರಿ ಎಂಬ ಜೈನ ಪಾವನ ಕ್ಷೇತ್ರ ಈ ಬಾರಿ ವಿಶ್ವ ದಾಖಲೆಗೆ ಸಾಕ್ಷಿಯಾಗಲಿರುವುದು ವಿಶೇಷ.
ಭಾರತದ ಎಲ್ಲ ಸಂಸ್ಕೃತಿಗಳಲ್ಲಿ ಗುರು-ಹಿರಿಯರ ಪಾದಪೂಜೆಗೆ ವಿಶೇಷ ಮಹತ್ವ ಇದೆ. ಗುರುವಿನ ಪರಮ ಪಾದಗಳಿಗೆ ಪೊಡಮೊಟ್ಟು ಅವರ ಕೃಪಾಶೀರ್ವಾದ ಪಡೆಯಲಾಗುತ್ತದೆ. ವಿಶೇಷವೆಂದರೆ ಸಾವಿರಾರು ವಿದ್ಯಾರ್ಥಿಗಳು, ದೇಶದಲ್ಲೇ ಮೊದಲ ಬಾರಿಗೆ ನೆಲದ ಮೇಲೆ ಪಾದದ ಆಕಾರದಲ್ಲಿ ನಿಂತು ಮಹರ್ಷಿ ಪೂಜ್ಯಪಾದರ ಪಾದದ ಆಕೃತಿಯನ್ನು ನಿರ್ಮಿಸಲಿದ್ದಾರೆ. ಈ ಮೂಲಕ ಪರಮ ಗುರುವಿಗೆ ಗೌರವಾರ್ಪಣೆಯನ್ನು ಅರ್ಪಿಸಲಿದ್ದಾರೆ.
11 ಕ್ಕೂ ಹೆಚ್ಚು ಕಾಲೇಜುಗಳ 1600 ಕ್ಕೂ ಹೆಚ್ಚು ವಿದ್ಯಾರ್ಥಿಗಳು ನೆಲದ ಮೇಲೆ ಬಿಡಿಸಿದ 100 ಅಡಿ ಅಗಲ ಮತ್ತು 200 ಅಡಿ ಉದ್ದದ ಪಾದದ ಗುರುತಿನ ಮೇಲೆ ನಿಂತು ಮಹರ್ಷಿ ಪೂಜ್ಯಪಾದರ ಪಾದದ ಆಕೃತಿಯನ್ನು ನಿರ್ಮಿಸಲಿದ್ದಾರೆ. ಬುಕ್ ಆಫ್ ರೇಕಾರ್ಡ್ ಅಧಿಕಾರಿಗಳು ವಿಶ್ವ ದಾಖಲೆಗೆ ಸೇರ್ಪಡೆಗೊಳಿಸಲಿದ್ದಾರೆ.
ಇದೇ ವೇಳೆ 1200 ಕ್ಕೂ ಹೆಚ್ಚು ಮಕ್ಕಳು, 1 ನಿಮಿಷದೊಳಗೆ ಸ್ವಸ್ತಿಕ್ ಆಕಾರದಲ್ಲಿ 5 ಸಾವಿರ ದೀಪ ಬೆಳಗಿಸಿ ದಾಖಲೆ ಬರೆಯಲಿದ್ದಾರೆ. ಮಹರ್ಷಿ ಪೂಜ್ಯಪಾದರ ಈ ಬೃಹತ್ ಪಾದ ನಿರ್ಮಾಣದ ಅದ್ಭುತ ಕಾರ್ಯಕ್ರಮವನ್ನು ಎಲ್ಲ ಕೋನಗಳಿಂದಲೂ ದ್ರೋಣ್ ಕ್ಯಾಮರಾ ಮೂಲಕ ಸೆರೆಹಿಡಿಯಲಾಗುತ್ತದೆ. ಜೈನ ಸ್ವಾಮೀಜಿಗಳು ಸೇರಿದಂತೆ ವಿವಿಧ ಕ್ಷೇತ್ರಗಳ ಗಣ್ಯರು ಹಾಗೂ ಸಾವಿರಾರು ಮಂದಿ ಸಾರ್ವಜನಿಕರು ಈ ಅಭೂತಪೂರ್ವ ಕಾರ್ಯಕ್ರಮಕ್ಕೆ ಸಾಕ್ಷಿಯಾಗಲಿದ್ದಾರೆ.
ಹೆಚ್ಚಿನ ವಿವರಗಳಿಗೆ 9741751122 ನ್ನು ಸಂಪರ್ಕಿಸಬಹುದಾಗಿದೆ.
News13
ಸಮಾಜದ ಉತ್ತಮ ಸುದ್ದಿಗಳನ್ನು ನಾವು ನಿಮ್ಮ ಮುಂದಿಡುವ ಪ್ರಯತ್ನವನ್ನು ಮಾಡುತ್ತಿದ್ದೇವೆ. ಪ್ರೋತ್ಸಾಹಿಸಿ, ಸ್ವೀಕರಿಸಿ. ನೀವು ಸ್ವೀಕರಿಸಿದಾಗ ನಾವು ಬೆಳೆಯಬಹುದು. ಒಳ್ಳೆಯ ಸುದ್ದಿಗಳಿಗೆ ಸಮಾಜ ತೆರೆದುಕೊಂಡಿದೆ ತಲುಪಿಸುವವರು ನಾವಾಗಬಾರದೇಕೆ?
ನ್ಯೂಸ್ 13 ಸಮಾಜದ ಧನಾತ್ಮಕ ಸುದ್ದಿಗಳನ್ನು ಹಾಗೂ ರಾಷ್ಟ್ರೀಯ ವಿಚಾರಗಳನ್ನು ನಿಮಗೆ ತಲುಪಿಸುವ ಪ್ರಯತ್ನ ಮಾಡುತ್ತದೆ. ಈ ರೀತಿ ಇನ್ನಷ್ಟು ಉತ್ತಮ ಸುದ್ದಿಗಳನ್ನು ತಲುಪಿಸಲು ನಿಮ್ಮ ಸಹಕಾರವನ್ನು ಅಪೇಕ್ಷಿಸುತ್ತಿದ್ದೇವೆ. ಈ ಕಾರ್ಯದಲ್ಲಿ ನೀವೂ ನಮ್ಮೊಂದಿಗೆ ಜೊತೆಯಾಗಿ.
News13 strives to publish and promote positive news/happenings and nationalistic thoughts. Join hands with us in this constructive cause. We hope and expect your co-operation in this objective of broadcasting news that shall keep up with quality journalism.
