ಸಾರ್ವಜನಿಕ ಶೌಚಗೃಹ ಪತ್ತೆ ಹಚ್ಚುವ ‘ಟಾಯ್ಲೆಟ್ ಲೊಕೇಟರ್’ ಆ್ಯಪ್​ ಬಿಡುಗಡೆ ಮಾಡಿದ ಕೇಂದ್ರ

ನವದೆಹಲಿ: ಸನಿಹದಲ್ಲಿರುವ ಸಾರ್ವಜನಿಕ ಶೌಚಗೃಹ ಪತ್ತೆ ಮಾಡುವ ಗೂಗಲ್ ಮ್ಯಾಪ್­ನ ‘ಟಾಯ್ಲೆಟ್ ಲೊಕೇಟರ್’ ಎಂಬ ಆ್ಯಪ್​ಗೆ ಕೇಂದ್ರ ಸರ್ಕಾರ ಚಾಲನೆ ನೀಡಿದೆ.

ಶೌಚಗೃಹ ಹುಡುಕುವುದು ಒಂದು ದೊಡ್ಡ ಸಮಸ್ಯೆಯಾಗಿದ್ದು. ಈ ನೂತನ ಆ್ಯಪ್​­ನಿಂದಾಗಿ ಸನಿಹದಲ್ಲಿರುವ ಶೌಚಗೃಹ ಪತ್ತೆ ಮಾಡುವುದು ಸುಲಭವಾಗಲಿದೆ. ಸ್ವಚ್ಛ ಭಾರತದ ಅಂಗವಾಗಿ ಈ ಆ್ಯಪ್​ಗೆ ಕೇಂದ್ರ ಮಾಹಿತಿ ಮತ್ತು ಪ್ರಸಾರ ಸಚಿವ ವೆಂಕಯ್ಯ ನಾಯ್ಡು ಅವರು ಚಾಲನೆ ನೀಡಿದ್ದಾರೆ.

ಈ ಆ್ಯಪ್​­ನಿಂದ ಹತ್ತಿರದಲ್ಲಿರುವ ಸ್ವಚ್ಛ ಶೌಚಗೃಹವನ್ನು ಸಾರ್ವಜನಿಕರು ಸುಲಭವಾಗಿ ಪತ್ತೆ ಹಚ್ಚಬಹುದು. ಟಾಯ್ಲೆಟ್ ಲೊಕೇಟರ್ ಆ್ಯಪ್​­ನಲ್ಲಿ ಸಾರ್ವಜನಿಕ ಶೌಚ ಗೃಹ ಎಲ್ಲಿ ಎಂದು ಹುಡುಕಿದರೆ ಹತ್ತಿರದಲ್ಲಿರುವ ಶೌಚಗೃಹದ ಮಾಹಿತಿ ಸಿಗುತ್ತದೆ.

ಪ್ರಸ್ತುತ ದೆಹಲಿ, ಗುರುಗ್ರಾಮ್, ಫರೀದಾಬಾದ್, ಘಾಜಿಯಾಬಾದ್, ನೊಯ್ಡಾ, ಇಂದೋರ್ ಮತ್ತು ಭೋಪಾಲ್ ನಗರಗಳಲ್ಲಿರುವ ಸಾರ್ವಜನಿಕ ಶೌಚಗೃಹಗಳು ಮಾತ್ರ ಈ ಆ್ಯಪ್​­ನಲ್ಲಿ ಸಿಗಲಿವೆ. ಈ 7 ನಗರಗಳಿಂದ ಸುಮಾರು 6,200 ಕ್ಕೂ ಹೆಚ್ಚು ಸಾರ್ವಜನಿಕ ಶೌಚಗೃಹಗಳು ಈ ಆ್ಯಪ್​­ನಲ್ಲಿ ಸಿಗುತ್ತವೆ.

ಶೌಚಗೃಹಕ್ಕೆ ಸಂಬಂಧಿಸಿದಂತೆ ಈ ಆ್ಯಪ್​­ನಲ್ಲಿ ಸ್ವಚ್ಛತೆಯ ರೇಟಿಂಗ್, ಶೌಚಗೃಹವು ಇಂಡಿಯನ್ ಅಥವಾ ವೆಸ್ಟರ್ನ್ ಶೈಲಿಯದೇ, ಪೇಯ್ಡ್ ಅಥವಾ ಫ್ರೀ ಈ ಎಲ್ಲಾ ಮಾಹಿತಿಗಳನ್ನು ನೀಡಲಿದೆ. ಸದ್ಯಕ್ಕೆ ಇಂಗ್ಲೀಷ್ ಮತ್ತು ಹಿಂದಿ ಭಾಷೆಯಲ್ಲಿ ಮಾತ್ರ ಆ್ಯಪ್​­ ಕಾರ್ಯಾಚರಿಸಲಿದ್ದು, ಮುಂದಿನ ದಿನಗಳಲ್ಲಿ ರಾಷ್ಟ್ರದ ಪ್ರಮುಖ ಭಾಷೆಗಳನ್ನು ಅಳವಡಿಸಲಾಗುವುದು ಎಂದು ನಗರಾಭಿವೃದ್ಧಿ ಸಚಿವಾಲಯ ತಿಳಿಸಿದೆ.

ಈಗಾಗಲೇ  ಆಂಧ್ರಪ್ರದೇಶದ ಗುಂಟೂರು, ವಿಶಾಖಪಟ್ಟಣಂ, ಕುರ್ನೂಲ್  ನಗರಗಳು, ಪಟ್ನಾದಲ್ಲಿ  ಛತ್ತೀಸ್­ಗಢ, ಹರಿಯಾಣದಲ್ಲಿ ಥನೆಸರ್ ಮತ್ತು ಸಿರ್ಸಾ, ತಮಿಳುನಾಡಿನಲ್ಲಿ ಸುಚಿಂದ್ರಂ ಮತ್ತು ಮೈಲಾಡಿ, ಮಹಾರಾಷ್ಟ್ರದಲ್ಲಿನ ಖೋಪೊಲ್, ಕೊಲ್ಹಾಪುರ, ನಂದುರಬರ್ ಪ್ರದೇಶಗಳು ಬಯಲುಶೌಚ ಮುಕ್ತಗೊಂಡಿವೆ. ಕೇರಳವೂ ಶೀಘ್ರದಲ್ಲಿ ಈ ಪಟ್ಟಿಯಲ್ಲಿ ಸೇರಲಿದೆ.  ದೆಹಲಿಯ ಎನ್­ಡಿಎಂಸಿ ಪ್ರದೇಶವು ದೆಹಲಿಯಲ್ಲಿ ಮೊತ್ತ ಮೊದಲು ಬಯಲುಶೌಚ ಮುಕ್ತ ಪ್ರದೇಶ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ. ಮುಂದಿನ 2 ವರ್ಷಗಳಲ್ಲಿ ಸುಮಾರು 2.5 ಕೋಟಿ ಶೌಚಗೃಹಗಳನ್ನು ನಿರ್ಮಿಸಲಾಗುವುದು ಎಂದು ವೆಂಕಯ್ಯನಾಯ್ಡು ಹೇಳಿದರು.