ಮೋದಿ ಹೇಳಿಕೆ: ಸಂಸತ್ತಿನಲ್ಲಿ ಪತ್ರಿಪಕ್ಷಗಳ ರಂಪಾಟ

ನವದೆಹಲಿ: ಪ್ರಧಾನಿ ನರೇಂದ್ರ ಮೋದಿ ವಿದೇಶದಲ್ಲಿ ಪ್ರತಿಪಕ್ಷಗಳನ್ನು ದೂರುತ್ತಾರೆ ಎಂದು ಆರೋಪಿಸಿ ರಾಜ್ಯಸಭೆಯಲ್ಲಿ ಕಾಂಗ್ರೆಸ್ ಸೇರಿದಂತೆ ಇತರ ಪಕ್ಷಗಳು ದೊಡ್ಡ ರಂಪಾಟವನ್ನೇ ಮಾಡಿವೆ. ಇದರಿಂದಾಗಿ ಎರಡು ಬಾರಿ ಕಲಾಪವನ್ನು ಮುಂದೂಡಬೇಕಾಯಿತು.

‘ಕಳೆದ 60 ವರ್ಷಗಳಿಂದ ಹಿಂದಿನ ಸರ್ಕಾರ ಮಾಡಿದ ಕೊಳೆಯನ್ನು ನಾನು ತೊಳೆಯುತ್ತಿದ್ದೇನೆ ಎನ್ನುವ ಮೂಲಕ ಮೋದಿ 60 ವರ್ಷಗಳ ಭಾರತದ ಇತಿಹಾಸವನ್ನು ಅವಮಾನ ಮಾಡಿದ್ದಾರೆ. ಅವರು ನೆಹರೂ, ವಾಜಪೇಯಿಗೆ ಅವಮಾನ ಮಾಡಿದ್ದಾರೆ’ ಎಂದು ಕಾಂಗ್ರೆಸ್ ಮುಖಂಡ ಆನಂದ್ ಶರ್ಮಾ ಆರೋಪಿಸಿದರು.

ಪ್ರತಿಪಕ್ಷಗಳಿಗೆ ತಿರುಗೇಟು ನೀಡಿದ ವಿತ್ತ ಸಚಿವ ಅರುಣ್ ಜೇಟ್ಲಿ ‘ಕಳೆದ 60 ವರ್ಷಗಳಲ್ಲಿ ಏನಾಯಿತು ಎಂಬುದರ ಬಗ್ಗೆ ಮೋದಿ ಏಕೆ ಮಾತನಾಡಬಾರದು ?’ ಎಂದು ಪ್ರಶ್ನಿಸಿದರು.

ಅಲ್ಲದೇ ತಂತ್ರಜ್ಞಾನ ಬಹಳಷ್ಟು ಮುಂದುವರೆದಿದೆ, ಯಾವ ಮೂಲೆಯಲ್ಲಿ ಕೂತು ಮಾತನಾಡಿದರು ಇಡೀ ವಿಶ್ವದ ಜನ ಅದನ್ನು ಗಮನಿಸುತ್ತಾರೆ. 60 ವರ್ಷ ಭಾರತದಲ್ಲಿ ಏನಾಯಿತು ಎಂಬುದು ಎಲ್ಲರಿಗೆ ತಿಳಿದಿದೆ ಎಂದರು.

ಕೆನಡಾಗೆ ತೆರಳಿದ್ದ ಸಂದರ್ಭ ಮೋದಿ ‘ಭಾರತದ ಸರ್ಕಾರ ಈಗ ಬದಲಾಗಿದೆ, ಹಿಂದೆ ಮಾಡಿದ ಕೊಳೆಯನ್ನು ತೊಳೆಯುವ ಕೆಲಸ ನಾನು ಮಾಡುತ್ತಿದ್ದೇನೆ. ಹಗರಣಗಳ ಭಾರತವನ್ನು ಕೌಶಲಗಳ ಭಾರತವಾಗಿ ಪರಿವರ್ತಿಸುತ್ತೇನೆ’ ಎಂದಿದ್ದರು. ಇದು ಕಾಂಗ್ರೆಸ್ ಆಕ್ರೋಶಕ್ಕೆ ಕಾರಣವಾಗಿತ್ತು.