ಸೈನಿಕರ ತ್ಯಾಗವನ್ನು ಭಾರತ ಎಂದೂ ಮರೆಯುವುದಿಲ್ಲ – ಮೋದಿ

ನವದೆಹಲಿ : ಕಾರ್ಗಿಲ್ ವಿಜಯ ದಿವಸದ ಅಂಗವಾಗಿ ಪ್ರಧಾನಿ ನರೇಂದ್ರ ಮೋದಿ ಮಂಗಳವಾರ ಭಾರತೀಯ ಸೈನಿಕರಿಗೆ ಗೌರವ ನಮನ ಸಲ್ಲಿಸಿದರು.

ಟ್ವ್ವಿಟರ್‌ನಲ್ಲಿ ತನ್ನ ಅನಿಸಿಕೆಯನ್ನು ವ್ಯಕ್ತಪಡಿಸಿರುವ ಮೋದಿ ಕಾರ್ಗಿಲ್ ವಿಜಯ ದಿವಸದ ಅಂಗವಾಗಿ, ‘ಭಾರತಕ್ಕಾಗಿ ಕೊನೆಯುಸಿರುವವರೆಗೂ ಹೋರಾಡಿದ ಪ್ರತಿಯೊಬ್ಬ ಯೋಧನಿಗೂ ನನ್ನ ಗೌರವ ನಮನ. ಯುದ್ಧದಲ್ಲಿ ದಿಟ್ಟತನ ತೋರಿದ ವೀರ ಯೋಧರೆಲ್ಲರಿಗೂ ನಾನು ಚಿರಋಣಿಯಾಗಿದ್ದೇನೆ. ಅವರ ಅಪ್ರತಿಮ ತ್ಯಾಗ ನಮಗೆ ಪ್ರೇರಣಾದಾಯಕವಾಗಿದೆ’ ಎಂದಿದ್ದಾರೆ.

1999 ರ ಕಾರ್ಗಿಲ್ ಯುದ್ಧದಲ್ಲಿ ನಮ್ಮ ಯೋಧರು ಧೈರ್ಯಶಾಲಿಗಳಾಗಿ ಶತ್ರುಗಳಿಗೆ ದಿಟ್ಟ ಉತ್ತರವನ್ನೇ ನೀಡಿದ್ದಾರೆ. ಅವರ ಪರಾಕ್ರಮ, ಅಪ್ರತಿಮ ತ್ಯಾಗವನ್ನು ಭಾರತ ಎಂದಿಗೂ ಮರೆಯುವುದಿಲ್ಲ ಎಂದಿದ್ದಾರೆ.

ಯುದ್ಧದ ವೇಳೆ ಸಮರ್ಥ ನಾಯಕತ್ವ ಪ್ರದರ್ಶಿಸಿದ ಅಟಲ್ ಬಿಹಾರಿ ವಾಜಪೇಯಿ ಸರ್ಕಾರವನ್ನು ಅವರು ಶ್ಲಾಘಿಸಿದ್ದಾರೆ.

ಭಾರತ – ಪಾಕ್ ಸೇನೆ 1999 ರ ಮೇ ಇಂದ ಜುಲೈವರೆಗೆ ಕಾರ್ಗಿಲ್ ಸಮರ ನಡೆಸಿತ್ತು. ಆಪರೇಷನ್ ವಿಜಯ್ ಆರಂಭಿಸಿದ ಭಾರತ ಪಾಕ್ ಸೇನೆ ಮತ್ತು ಉಗ್ರರನ್ನು ದಮನಿಸಿ ಭಾರತದ ವಿಜಯ ಪತಾಕೆಯನ್ನು ಹಾರಿಸಿತ್ತು. ಇದರ ಸ್ಮರಣಾರ್ಥ ಪ್ರತಿ ವರ್ಷ ಜುಲೈ 26 ರಂದು ಕಾರ್ಗಿಲ್ ವಿಜಯ ದಿವಸವನ್ನು ಆಚರಿಸಲಾಗುತ್ತದೆ.