ಡಿಎಂಆರ್‌ಸಿಯಿಂದ ಚಾಲಕ ರಹಿತ ರೈಲುಗಳಿಗೆ ಅಡಚಣೆ ತಡೆ ಸಾಧನ ಪ್ರಸ್ತಾಪ

ನವದೆಹಲಿ: ದೆಹಲಿ ಮೆಟ್ರೋ ರೈಲು ನಿಗಮ (ಡಿಎಂಆರ್‌ಸಿ)ದ ಪ್ರಸ್ತಾಪಿತ ರೈಲು ಅಡಚಣೆ ವಿಚಲನ ಸಾಧನ(ಆಡ್)ದಿಂದ ಚಾಲಕ ರಹಿತ ರೈಲುಗಳ ಅಡಚಣೆ, ಹಳಿ ತಪ್ಪುವಂತಹ ಘಟನೆ ತಪ್ಪಲಿದೆ.

ದೆಹಲಿ ಮೆಟ್ರೋ ನಿಗಮ ಈ ಯೋಜನೆಯನ್ನು ಆರಂಭಿಸಿದ್ದು, ಈ ಯೋಜನೆ ಮುಂದಿನ ವರ್ಷ ಪೂರ್ಣಗೊಳ್ಳಲಿದೆ ಎನ್ನಲಾಗಿದೆ.

ಆಟೋ-ಪೈಲಟ್ ಮೋಡ್ ಸಕ್ರಿಯಗೊಳ್ಳುವವರೆಗೆ ಚಾಲಕರ ಸಹಾಯದಿಂದಲೇ ಈ ರೈಲುಗಳು ಚಲಿಸಲಿವೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಚಾಲಕರಹಿತ ರೈಲುಗಳಲ್ಲಿ ಸಾರ್ವಜನಿಕ ಸುರಕ್ಷತೆಗೆ ಹೆಚ್ಚಿನ ಒತ್ತು ನೀಡಲಾಗುವುದು ಎಂದು ಡಿಎಂಆರ್‌ಸಿಯ ವ್ಯವಸ್ಥಾಪಕ ನಿರ್ದೇಶಕ ಮಾಂಗು ಸಿಂಗ್ ಹೇಳಿದ್ದಾರೆ.

ಈ ರೈಲುಗಳು ಎಲ್ಲಾ ಮೂಲಭೂತ ಆಧುನಿಕ ಸೌಲಭ್ಯಗಳಾದ ವೈಫೈ, ಪ್ರತಿ ರೈಲು ಬೋಗಿಗಳಲ್ಲಿ 3 ಸಿಸಿ ಕ್ಯಾಮೆರಾ, ಎಲ್‌ಇಡಿ ಪರದೆಗಳನ್ನು ಹೊಂದಲಿದೆ. ಚಾಲಕನ ಕ್ಯಾಬಿನ್‌ ಇರುವ ಸ್ಥಳದಲ್ಲಿ 2 ಎಲ್‌ಇಡಿ ಪರದೆಗಳಿರಲಿದ್ದು, ರೈಲಿನಲ್ಲಿ ಯಾವುದೇ ಅಹಿತಕರ ಘಟನೆಗಳು ಸಂಭವಿಸದಂತೆ ತಡೆಯಲು ಸಹಕಾರಿಯಾಗಲಿದೆ.

ಆದರೆ ಈ ರೈಲುಗಳಲ್ಲಿ ಚಾಲಕನಿಗೆ ಪ್ರತ್ಯೇಕ ಕ್ಯಾಬಿನ್ ಇರದೇ ಇದ್ದು, ಹೆಚ್ಚಿನ ಸಂಖ್ಯೆಯಲ್ಲಿ ಪ್ರಯಾಣಿಕರನ್ನು ಸಾಗಿಸಬಹುದು ಎಂದು ಮಾಂಗೂ ಸಿಂಗ್ ಹೇಳಿದ್ದಾರೆ.

ಕಾರ್ಯಾಚರಣೆ ನಿಯಂತ್ರಣ ಕೇಂದ್ರದ (OTC) ಅಧಿಕಾರಿಗಳು ಈ ರೈಲಿನ ಮೇಲ್ವಿಚಾರಣೆ ನಡೆಸಲಿದ್ದಾರೆ. ಪ್ರತಿ ಒಂದು ಕಿ.ಮೀ. ಅಂತರದಲ್ಲಿ ರೈಲು ನಿಯಂತ್ರಣ ಕೇಂದ್ರ ಇರಲಿದ್ದು, ತಕ್ಷಣದ ನೆರವಿಗೆ ಸಾಧ್ಯವಾಗಲಿದೆ ಎಂದು ಡಿಎಂಆರ್‌ಸಿ ವಕ್ತಾರ ಅನುಜ್ ದಯಾಳ್ ಹೇಳಿದ್ದಾರೆ.

ಚಾಲಕರಹಿತ ರೈಲುಗಳು ಸ್ಪೇನ್‌ನ ಬಾರ್ಸಿಲೋನಾ ಹಾಗೂ ಕೆನಡಾದ ವಾನ್ಕೋವರ್‌ಗಳಲ್ಲಿವೆ.