ಮಂಗಳೂರು ಲಿಟ್ ಫೆಸ್ಟ್‌ನ ಗೋಷ್ಠಿ ಪಾಕಿಸ್ಥಾನದಲ್ಲೂ ಪ್ರಸಾರ ಆದಾಗ..!

ಮಂಗಳೂರು ಲಿಟ್ ಫೆಸ್ಟ್ ಎಂಬ ಸಾಹಿತ್ಯ ಜಾತ್ರೆಯ ಎಂಟನೇ ಆವೃತ್ತಿ ಸಂಪನ್ನಗೊಂಡು ಒಂದು ದಿನ ಕಳೆದಿದೆ. ಅಂತರರಾಷ್ಟ್ರೀಯ ವಿಚಾರಗಳಿಂದ ಹಿಡಿದು, ಪ್ರಾದೇಶಿಕ ಆಚಾರ ವಿಚಾರಗಳವರೆಗೆ, ಇತಿಹಾಸದಿಂದ ಹಿಡಿದು ವರ್ತಮಾನ, ಭವಿಷ್ಯಕ್ಕೆ ಸಂಬಂಧಪಟ್ಟ ವಿಚಾರದವರೆಗೆ, ಸಿನೆಮಾ ಕ್ಷೇತ್ರದಿಂದ ಹಿಡಿದು ಕ್ರೀಡೆಯವರೆಗೆ ಹಲವು ಗೋಷ್ಠಿಗಳು ಎರಡು ದಿನಗಳ ಕಾಲ ನಡೆದವು. ಈ ಎಲ್ಲಾ ಗೋಷ್ಠಿಗಳಲ್ಲಿ ದೇಶದ ವಿವಿಧ ಭಾಗಗಳಿಂದ ಆಗಮಿಸಿದ್ದ ಸಾಹಿತ್ಯಾಭಿಮಾನಿಗಳು ಆಸಕ್ತಿಯಿಂದ ಭಾಗವಹಿಸಿದ್ದು ಕೂಡ ಉಲ್ಲೇಖನೀಯ.

ಮಂಗಳೂರು ಲಿಟ್ ಫೆಸ್ಟ್‌ನ ಗೋಷ್ಠಿಯೊಂದು ಪಾಕಿಸ್ತಾನದಲ್ಲೂ ಪ್ರತಿಧ್ವನಿಸಿದೆ.

ಹೌದು. ಮಂಗಳೂರು‌ ಲಿಟ್ ಫೆಸ್ಟ್‌ನ ಗೋಷ್ಠಿಯೊಂದನ್ನು ಪಾಕಿಸ್ತಾನದ ಪತ್ರಿಕೆಯೊಂದು ಪ್ರಕಟ ಮಾಡುವ ಮೂಲಕ ಮಂಗಳೂರು ಲಿಟ್ ಫೆಸ್ಟ್‌ ಅನ್ನು ಅಂತರರಾಷ್ಟ್ರೀಯ ಮಟ್ಟದಲ್ಲಿ ಸುದ್ದಿಯಾಗುವಂತೆ ಮಾಡಿದೆ. ಅಂತರರಾಷ್ಟ್ರೀಯ ವಿಚಾರದ ಕುರಿತಾಗಿನ ‘ಗ್ರೇಟ್ ಪವರ್ ಗೇಮ್ಸ್’ ಗೋಷ್ಠಿಯನ್ನು ಪಾಕಿಸ್ತಾನದ ಪತ್ರಿಕೆಯಾದ ಪಾಕಿಸ್ತಾನ್ ಟುಡೇ ವರದಿ ಮಾಡಿದೆ. ಈ ಗೋಷ್ಠಿಯಲ್ಲಿ ಭಾರತೀಯ ಗುಪ್ತಚರ ಸಂಸ್ಥೆ ‘ರಾ’ ದ ಮಾಜಿ ಮುಖ್ಯಸ್ಥರಾದ ವಿಕ್ರಮ್ ಸೂದ್ ಭಾಗವಹಿಸಿದ್ದರು.

ಈ ಗೋಷ್ಠಿಯಲ್ಲಿ ಮಾತನಾಡಿದ ವಿಕ್ರಮ್ ಸೂದ್ ಅವರು, ಭಾರತ ಮತ್ತು ನೆರೆ ರಾಷ್ಟ್ರಗಳ ಜೊತೆಗಿನ ಸ್ನೇಹದ ಕುರಿತು ಮಾತನಾಡುವಾಗ, “ಪಾಕಿಸ್ತಾನ, ಚೀನಾ ಹಾಗೂ ಭಾರತ ನಡುವೆ ಸಮಸ್ಯೆ ಇರುವುದು ಎಲ್ಲರಿಗೂ ಗೊತ್ತಿರುವಂಥದ್ದು. ಭಯೋತ್ಪಾದನೆಯ ಮೂಲಕ ಆಟ ಆಡುವ ಪಾಕಿಸ್ತಾನದ ಜೊತೆ ರಾಜಿ, ಸಂಧಾನ ಮಾಡಿ ಪ್ರಯೋಜನವಿಲ್ಲ. ಅವರ ಜೊತೆ ಶಾಂತಿ ಅಸಾಧ್ಯ” ಎಂದು ಹೇಳಿದರು. ಮುಂದುವರಿದು, ಈ ಹಿಂದೆ ಶ್ರೀಲಂಕಾ ಅಥವಾ ಬಾಂಗ್ಲಾದೇಶ ಕಷ್ಟದಲ್ಲಿದೆ ಎಂದಾಗ ಭಾರತ ಅವರ ಸಹಾಯಕ್ಕೆ ಧಾವಿಸಿತ್ತು. ಆದರೆ ಭಾರತ ಸಂಕಷ್ಟಕ್ಕೆ ಬಂದರೆ ಯಾರೂ ಜೊತೆ ನಿಲ್ಲಲ್ಲ ಎಂದು ಹೇಳಿದರು.

ಭಾರತದ ‘ರಾ’ ಸಂಸ್ಥೆಯ ಮಾಜಿ ಮುಖ್ಯಸ್ಥರು ಆಡಿದ್ದ ಈ ಮಾತುಗಳನ್ನು ಪಾಕಿಸ್ತಾನದ ಪತ್ರಿಕೆಯಾದ ಪಾಕಿಸ್ತಾನ್ ಟುಡೇ ಯಥಾವತ್ತಾಗಿ ಪ್ರಕಟ ಮಾಡಿದೆ. ಜೊತೆಗೆ ಸೂದ್ ಅವರ ಹೇಳಿಕೆಯು ನವದೆಹಲಿಯಲ್ಲಿ ಆಳವಾಗಿ ಬೇರೂರಿರುವ ನೀತಿ-ನಿರೂಪಣೆಗಳ ಮನಸ್ಥಿತಿಯನ್ನು ಸ್ಪಷ್ಟವಾಗಿ ಪ್ರತಿಬಿಂಬಿಸುತ್ತದೆ ಎಂದು ಹೇಳಿದೆ.

ಭಾರತದ ಸಣ್ಣ ನಗರವಾದ ಮಂಗಳೂರಿನಲ್ಲಿ ನಡೆದ ಗೋಷ್ಠಿಯೊಂದು ಪಾಕಿಸ್ತಾನದಲ್ಲೂ ಸುದ್ದಿಯಾಗುತ್ತದೆ ಎಂದರೆ ಅದು ಮಂಗಳೂರು ಲಿಟ್ ಫೆಸ್ಟ್‌ನ ಯಶಸ್ಸಿನ ಕಥೆ ಎಂದೇ ಹೇಳಬಹುದು. ಭಾರತ, ಭಾರತೀಯತ್ವದ ಪರಿಕಲ್ಪನೆಯಾದ ಸ್ವತ್ವದ ಆಧಾರದಲ್ಲಿ ನಡೆಯುವ ಈ ಮಂಗಳೂರು ಲಿಟ್ ಫೆಸ್ಟ್ ಅಂತರರಾಷ್ಟ್ರೀಯ ಮಟ್ಟದಲ್ಲಿ ಮನ್ನಣೆ ಪಡೆಯುತ್ತಿರುವುದು ಖುಷಿಯ ವಿಚಾರವೂ ಹೌದು.