ಪ್ರಾಡಾ ಜೊತೆಗಿನ ಒಪ್ಪಂದ ಮಹಾರಾಷ್ಟ್ರ ಕುಶಲಕರ್ಮಿಗಳಿಗೆ ದೊಡ್ಡ ಜಯ: ದೇವೇಂದ್ರ ಫಡ್ನವಿಸ್

ಮುಂಬೈ: ಇಟಲಿಯ ವಿಶ್ವಪ್ರಸಿದ್ಧ ಲಕ್ಷುರಿ ಬ್ರ್ಯಾಂಡ್ ಪ್ರಾಡಾ (Prada) ಮತ್ತು ಮಹಾರಾಷ್ಟ್ರ ಸರ್ಕಾರದ ಚರ್ಮೋದ್ಯಮ ಅಭಿವೃದ್ಧಿ ನಿಗಮಗಳಾದ LIDCOM ಹಾಗೂ ಕರ್ನಾಟಕದ LIDKAR ನಡುವೆ ಇತ್ತೀಚೆಗೆ ಸಹಕಾರ ಒಪ್ಪಂದ ನಡೆದಿದೆ.

ಈ ಒಪ್ಪಂದವು ಸಾಂಪ್ರದಾಯಿಕ ಕೊಲ್ಹಾಪುರಿ ಚಪ್ಪಲಿಗಳನ್ನು ಪ್ರಾಡಾದ ಆಧುನಿಕ ವಿನ್ಯಾಸದೊಂದಿಗೆ ಸಂಯೋಜಿಸಿ, ಜಾಗತಿಕ ಮಟ್ಟದಲ್ಲಿ ಮಾರಾಟ ಮಾಡಲು ಅವಕಾಶ ಕಲ್ಪಿಸಿದೆ.

ಮಹಾರಾಷ್ಟ್ರ ಮುಖ್ಯಮಂತ್ರಿ ದೇವೇಂದ್ರ ಫಡ್ನವೀಸ್ ಅವರು ಈ ಒಪ್ಪಂದವನ್ನು “ಮಹಾರಾಷ್ಟ್ರದ ಕುಶಲಕರ್ಮಿಗಳಿಗೆ ದೊಡ್ಡ ಜಯ” ಎಂದು ಕರೆದು ಹೊಗಳಿದ್ದಾರೆ.

ತಮ್ಮ ಸಾಮಾಜಿಕ ಮಾಧ್ಯಮದಲ್ಲಿ ಎಕ್ಸ್ ಪೋಸ್ಟ್ ಮಾಡಿರುವ ಅವರು, “ಜಾಗತಿಕ ಲಕ್ಷುರಿ ಬ್ರ್ಯಾಂಡ್ ಪ್ರಾಡಾ ಅಂತಿಮವಾಗಿ ಮಹಾರಾಷ್ಟ್ರದ ಕುಶಲಕಲೆಯನ್ನು ಅನನ್ಯ ಎಂದು ಒಪ್ಪಿಕೊಂಡಿದೆ! ಪ್ರಾಡಾ, LIDCOM ಮತ್ತು LIDKAR ನಡುವೆ ಐತಿಹಾಸಿಕ ಒಪ್ಪಂದ ನಡೆದಿದೆ. ನಮ್ಮ ಕುಶಲಕರ್ಮಿಗಳ ಸಹಾಯದಿಂದ ತಯಾರಾಗುವ ಈ ಲಿಮಿಟೆಡ್ ಎಡಿಷನ್ ಚಪ್ಪಲಿಗಳು 2026 ಫೆಬ್ರವರಿಯಿಂದ ಪ್ರಾಡಾದ 40 ಅಂಗಡಿಗಳಲ್ಲಿ ಮತ್ತು ಅಧಿಕೃತ ವೆಬ್‌ಸೈಟ್‌ನಲ್ಲಿ ಲಭ್ಯವಾಗಲಿವೆ” ಎಂದು ಬರೆದಿದ್ದಾರೆ.

ಈ ಸಹಕಾರದಡಿ “Prada Made in India – Inspired by Kolhapuri Chappals” ಎಂಬ ಲಿಮಿಟೆಡ್ ಎಡಿಷನ್ ಸಂಗ್ರಹ ಬಿಡುಗಡೆಯಾಗಲಿದೆ. ಸುಮಾರು 2000 ಜೋಡಿ ಚಪ್ಪಲಿಗಳನ್ನು ಮಹಾರಾಷ್ಟ್ರ ಮತ್ತು ಕರ್ನಾಟಕದ ಕುಶಲಕರ್ಮಿಗಳು ತಯಾರಿಸಲಿದ್ದಾರೆ. ಸಾಂಪ್ರದಾಯಿಕ ಕೊಲ್ಹಾಪುರಿ ತಂತ್ರಗಳನ್ನು ಪ್ರಾಡಾದ ಆಧುನಿಕ ವಿನ್ಯಾಸ ಮತ್ತು ಪ್ರೀಮಿಯಂ ವಸ್ತುಗಳೊಂದಿಗೆ ಸಂಯೋಜಿಸಲಾಗುವುದು. ಕುಶಲಕರ್ಮಿಗಳಿಗೆ ತರಬೇತಿ ಕಾರ್ಯಕ್ರಮಗಳು, ಉದ್ಯೋಗ ಅವಕಾಶಗಳು ಮತ್ತು ಜಾಗತಿಕ ಮಾನ್ಯತೆ ದೊರೆಯಲಿದೆ.

2025ರ ಜೂನ್‌ನಲ್ಲಿ ಪ್ರಾಡಾ ತನ್ನ ಸ್ಪ್ರಿಂಗ್/ಸಮ್ಮರ್ 2026 ಸಂಗ್ರಹದಲ್ಲಿ ಕೊಲ್ಹಾಪುರಿ ಚಪ್ಪಲಿಗಳಂತೆ ಕಾಣುವ ಸ್ಯಾಂಡಲ್‌ಗಳನ್ನು ಪ್ರದರ್ಶಿಸಿ ವಿವಾದಕ್ಕೀಡಾಗಿತ್ತು. ಕ್ರೆಡಿಟ್ ನೀಡದೇ ಡಿಸೈನ್ ಕಾಪಿ ಮಾಡಿದ್ದಾರೆ ಎಂದು ಆರೋಪ ಕೇಳಿ ಬಂದಿತ್ತು.