ʼಸಿಂಧೂರ್‌ ಆಪರೇಷನ್‌ʼಗೆ ಸೇನೆ ಬಳಸಿತ್ತು ‌ʼಸೊಸೈಡ್‌ ಡ್ರೋನ್ʼ

ನವದೆಹಲಿ: 26 ನಾಗರಿಕರ ಪ್ರಾಣಕ್ಕೆ ಕಾರಣವಾದ ಪಹಲ್ಗಾಮ್ ದಾಳಿಗೆ ಪ್ರತೀಕಾರವಾಗಿ, ಭಾರತೀಯ ಸೇನೆಯು ಪಾಕಿಸ್ತಾನ ಮತ್ತು ಪಾಕಿಸ್ತಾನ ಆಕ್ರಮಿತ ಕಾಶ್ಮೀರ (ಪಿಒಕೆ) ದಲ್ಲಿನ ಭಯೋತ್ಪಾದಕ ಅಡಗುತಾಣಗಳ ಮೇಲೆ ನಿಖರವಾದ ದಾಳಿಗಳನ್ನು ನಡೆಸಿ ಯಶಸ್ವಿಯಾಗಿದೆ.

ಅಧಿಕೃತವಾಗಿ ಆಪರೇಷನ್ ಸಿಂಧೂರ್ ಎಂದು ಕರೆಯಲ್ಪಡುವ ಈ ಕಾರ್ಯಾಚರಣೆಯು ಭಾರತದ ಯುದ್ಧತಂತ್ರದ ಸಾಮರ್ಥ್ಯಗಳಲ್ಲಿ ಗಮನಾರ್ಹ ಬದಲಾವಣೆಯನ್ನು ಸಾಕ್ಷೀಕರಿಸಿದೆ ಮತ್ತು ಹೊಸ ವರ್ಗದ ಶಸ್ತ್ರಾಸ್ತ್ರಗಳನ್ನು ಪ್ರದರ್ಶಿಸಿದೆ. ಈ ಕಾರ್ಯಾಚರಣೆಯನ್ನು ನಿರ್ವಹಿಸುವಲ್ಲಿ ದೇಶವು ಸ್ಥಳೀಯವಾಗಿ ನಿರ್ಮಿತ “ಸುಸೈಡ್ ಡ್ರೋನ್‌”‌ಗಳನ್ನು  ಬಳಸಿದೆ ಎಂದು ವರದಿಯಾಗಿದೆ.

ಆತ್ಮಹತ್ಯಾ ಡ್ರೋನ್‌ಗಳು ಎಂದರೇನು?

ಗುರಿಯೆಡೆಗೆ ನಿಖರವಾಗಿ ನುಗ್ಗಿ ಹೊಡೆದು ಸ್ಪೋಟಗಳ್ಳುವ ಕಾರಣಕ್ಕೆ ಈ ಡ್ರೋನ್‌ಗಳನ್ನು ʼಸುಸೈಡ್‌ ಡ್ರೋನ್‌ʼ ಎಂದು ಕರೆಯಲಾಗುತ್ತದೆ. ದಾಳಿಗಳಲ್ಲಿ ಬಳಸಲಾಗುವ ಈ ಡ್ರೋನ್‌ಗಳನ್ನು ಅಧಿಕೃತವಾಗಿ ಕಡಿಮೆ-ವೆಚ್ಚದ ಮಿನಿಯೇಚರ್ ಸ್ವಾರ್ಮ್ ಡ್ರೋನ್‌ಗಳು ಅಥವಾ ಲೊಯಟರಿಂಗ್ ಮ್ಯುನಿಷನ್ ಸಿಸ್ಟಮ್ಸ್ (ಎಲ್‌ಎಂಎಸ್) ಎಂದು ಕರೆಯಲಾಗುತ್ತದೆ. ಬೆಂಗಳೂರು ಮೂಲದ ಆಲ್ಫಾ ಡಿಸೈನ್ ಮತ್ತು ಇಸ್ರೇಲ್‌ನ ಎಲ್ಬಿಟ್ ಸಿಸ್ಟಮ್ಸ್ ಜಂಟಿಯಾಗಿ ಅಭಿವೃದ್ಧಿಪಡಿಸಿದ ‘ಸ್ಕೈಸ್ಟ್ರೈಕರ್’ ಡ್ರೋನ್‌ ಇದಾಗಿದೆ. ಸಾಂಪ್ರದಾಯಿಕ ಯುಎವಿಗಳಿಗಿಂತ ಭಿನ್ನವಾಗಿರುವ ಇವು ಹೆಚ್ಚಿನ ನಿಖರತೆಯೊಂದಿಗೆ ದಾಳಿ ಮಾಡಬಹುದಾಗಿದೆ.

ಪ್ರತಿಯೊಂದು ಸ್ಕೈಸ್ಟ್ರೈಕರ್ ಡ್ರೋನ್ 5 ಕೆಜಿ ಅಥವಾ 10 ಕೆಜಿ ಸಿಡಿತಲೆಯನ್ನು ಹೊತ್ತೊಯ್ಯಬಲ್ಲದು ಮತ್ತು ಸರಿಸುಮಾರು 100 ಕಿಲೋಮೀಟರ್ ಕಾರ್ಯಾಚರಣೆಯ ವ್ಯಾಪ್ತಿಯನ್ನು ಹೊಂದಿದೆ. ಇದು ವಿದ್ಯುತ್ ಪ್ರೊಪಲ್ಷನ್ ಅನ್ನು ಬಳಸುತ್ತದೆ, ಇದು ಬಹುತೇಕ ಮೌನವಾಗಿದ್ದು, ಕಡಿಮೆ ಎತ್ತರದ, ರಹಸ್ಯ ಕಾರ್ಯಾಚರಣೆಗಳಿಗೆ ಸೂಕ್ತವಾಗಿದೆ. ಆಪರೇಟರ್ ಗೊತ್ತುಪಡಿಸಿದ ಗುರಿಗಳನ್ನು ಪತ್ತೆಹಚ್ಚಲು, ಟ್ರ್ಯಾಕ್ ಮಾಡಲು ಮತ್ತು ನಾಶಮಾಡಲು ವಿನ್ಯಾಸಗೊಳಿಸಲಾದ ಸ್ಕೈಸ್ಟ್ರೈಕರ್, ಡ್ರೋನ್‌ನ ಹಾರಾಟದ ಗುಣಲಕ್ಷಣಗಳನ್ನು ಕ್ಷಿಪಣಿಯ ವಿನಾಶಕಾರಿ ಶಕ್ತಿಯೊಂದಿಗೆ ಸಂಯೋಜಿಸುತ್ತದೆ.