ಪಹಲ್ಗಾಮ್‌ ದಾಳಿ : ಮೃತಪಟ್ಟವರನ್ನು ಹಿಂದೂಗಳು ಎಂದು ಉಲ್ಲೇಖಿಸದ ವಿದೇಶಿ ಮಾಧ್ಯಮಗಳು

ನವದೆಹಲಿ: ಎಪ್ರಿಲ್ 22 ರಂದು, ಜಮ್ಮು ಮತ್ತು ಕಾಶ್ಮೀರದ ಪಹಲ್ಗಾಮ್ ಕಣಿವೆಯಲ್ಲಿ ರಕ್ತಪಿಪಾಸು ಜಿಹಾದಿ ಉಗ್ರರು ನಡೆಸಿದ ರಕ್ತದೋಕುಳಿಗೆ ಭೂಲೋಕದ ಸ್ವರ್ಗದಂತಿದ್ದ ಪಹಲ್ಗಾಮ್‌ ಅಕ್ಷರಶಃ ಸ್ಮಶಾನವಾಗಿ ಪರಿವರ್ತನೆಗೊಂಡಿದೆ. ಪಾಕಿಸ್ತಾನ ಮೂಲದ ಲಷ್ಕರ್-ಎ-ತೊಯ್ಬಾದ ಅಂಗ ಸಂಘಟನೆಯಾದ ದಿ ರೆಸಿಸ್ಟೆನ್ಸ್ ಫ್ರಂಟ್‌ಗೆ ಸಂಬಂಧಿಸಿದ ಇಸ್ಲಾಮಿಕ್ ಭಯೋತ್ಪಾದಕರು ನಡೆಸಿದ ಈ ದಾಳಿಯಲ್ಲಿ ಬಲಿಯಾಗಿದ್ದು ನಿರಾಯುಧ ಹಿಂದೂ ಪ್ರವಾಸಿಗರು. ಧರ್ಮವನ್ನು ಖಚಿತಪಡಿಸಿಕೊಂಡೇ ಅವರ ಮೇಲೆ ಮನಸೋ ಇಚ್ಛೆ ಗುಂಡು ಹಾರಿಸಿ ಕೊಂದು ಹಾಕಲಾಗಿದೆ. ಆದರೆ ವಿದೇಶಿ ಮಾಧ್ಯಗಳು ಮತ್ತು ಕೆಲ ಮಾಧ್ಯಮಗಳು ಕೊಂದವರ ಮತ್ತು ಸತ್ತವರ ಧಾರ್ಮಿಕ ಗುರುತನ್ನು ಅತ್ಯಂತ ಚಾಣಾಕ್ಷ ರೀತಿಯಲ್ಲಿ ಮರೆಮಾಚಲು ಯತ್ನಿಸಿವೆ.

ಎಡಬಿಡಂಗಿ ಬುದ್ಧಿಜೀವಿಗಳ ಮುಖವಾಣಿಯಂತಿರುವ ಬಿಬಿಸಿ ಪಹಲ್ಗಾಮ್‌ ಘಟನೆಯ ವರದಿಗೆ ನೀಡಿದ ಶಿರ್ಷಿಕೆ ಏನು ಗೊತ್ತಾ? “ಭಾರತೀಯ ಆಡಳಿತಕ್ಕೊಳಪಟ್ಟ ಕಾಶ್ಮೀರದಲ್ಲಿ ಪ್ರವಾಸಿಗರ ಮೇಲೆ ಬಂದೂಕುಧಾರಿಗಳು ಗುಂಡು ಹಾರಿಸಿದ ಪರಿಣಾಮ 20 ಕ್ಕೂ ಹೆಚ್ಚು ಜನರ ಸಾವು”. ತನ್ನ ಇಡೀ ವರದಿಯಲ್ಲಿ ಬಿಬಿಸಿ ಅಪ್ಪಿತಪ್ಪಿಯೂ ಉಗ್ರರು ಎಂಬ ಪದವನ್ನು ಬಳಸಿಲ್ಲ, ಪಾಕಿಸ್ಥಾನ ಮೂಲಕ ಉಗ್ರ ಸಂಘಟನೆಯೊಂದಿಗೆ ಬಂದೂಕುದಾರಿಗಳ ಸಂಬಂಧವನ್ನು ಉಲ್ಲೇಖಿಸಿಲ್ಲ. ಹತ್ಯೆಯ ಹಿಂದಿನ ಸೈದ್ಧಾಂತಿಕ ಉದ್ದೇವನ್ನು ವಿವರಿಸಿಲ್ಲ. ಮೃತಪಟ್ಟವರನ್ನು ಹಿಂದೂಗಳೆಂದೂ ಅದು ಉಲ್ಲೇಖಿಸಿಲ್ಲ.

ಬಿಬಿಸಿಗಿಂತ ಒಂದು ಹೆಜ್ಜೆ ಮುಂದೆ ಹೋಗಿರುವ ಅಲ್‌ ಜಜೀರಾ ಪಹಲ್ಗಾಮ್‌ ಕೃತ್ಯದ ಹೊಣೆಯನ್ನು ಯಾರೂ ಹೊತ್ತುಕೊಂಡಿಲ್ಲ. ಭಾರತದ ವಿರುದ್ಧ ಕೆಲಸ ಮಾಡುತ್ತಿರುವ ಸಶಸ್ತ್ರ ಗುಂಪುಗಳು ಈ ಘಟನೆ ನಡೆಸಿವೆ ಎಂದು ಪೊಲೀಸರು ಹೇಳಿಕೊಂಡಿದ್ದಾರೆ. ರಾಜಕೀಯ ಸಂಘರ್ಷದಿಂದಾಗಿ ಈ ಘಟನೆ ನಡೆದಿದೆ ಎಂದಿದೆ. ಅಲ್ಲದೇ ಪಹಲ್ಗಾಮ್‌ ಅನ್ನು ʼಭಾರತ ಆಡಳಿತದ ಕಾಶ್ಮೀರʼ ಎಂದು ಒತ್ತಿ ಹೇಳಿದೆ.

ವಾಷಿಂಗ್ಟನ್‌ ಪೋಸ್ಟ್, ಫ್ರಾನ್ಸ್ 24 , ಎಸ್‌ಬಿಎಸ್‌ ನ್ಯೂಸ್‌, ಬಾಂಗ್ಲಾದೇಶ್‌ ಗಾರ್ಡಿಯನ್‌, ಮಿಡ್ಲ್‌ ಈಸ್ಟ್‌ ಐಸ್‌, ಯುರೋ ನ್ಯೂಸ್, ಏಷ್ಯಾ ನ್ಯೂಸ್‌ ನೆಟ್‌ವರ್ಕ್‌ಗಳು ಕೂಡ ಇದೇ ರೀತಿಯ ವರದಿಗಳನ್ನು ಪ್ರಕಟಿಸಿ ಮುಸ್ಲಿಂ ಭಯೋತ್ಪಾದಕರ ಕೃತ್ಯವನ್ನು ಬಂದೂಕುಧಾರಿಗಳ ಕೃತ್ಯವಾಗಿ ಪರಿವರ್ತಿಸಿದೆ. ಬಲಿಪಶುಗಳನ್ನು ಹಿಂದೂಗಳು ಎಂಬುದನ್ನು ಮರೆಮಾಚಿ ಕೇವಲ ಪ್ರವಾಸಿಗರು ಎಂದು ಉಲ್ಲೇಖಿಸಿದೆ. ಇದು ಅವುಗಳ ಹಿಂದಿನ ಅಜೆಂಡಾವನ್ನು, ಇಸ್ಲಾಮಿಕ್‌ ಮೂಲಭೂತದ ಬಗ್ಗೆ ಅವುಗಳಿಗಿರುವ ಒಲವನ್ನು ಬಹಿರಂಗಪಡಿಸಿದೆ.