ಕೋಚಿಂಗ್‌ ಸಂಸ್ಥೆಗಳ ಸುಳ್ಳು ಜಾಹೀರಾತಿಗೆ ಕಡಿವಾಣ ಹಾಕಲು ಮಾರ್ಗಸೂಚಿ ಹೊರಡಿಸಿದ ಕೇಂದ್ರ

ನವದೆಹಲಿ: ಪೋಷಕರು ಮತ್ತು ಅಭ್ಯರ್ಥಿಗಳನ್ನು ತಪ್ಪುದಾರಿಗೆಳೆಯುವುದನ್ನು ತಡೆಯಲು ಎಲ್ಲಾ ಕೋಚಿಂಗ್ ಸಂಸ್ಥೆಗಳು ತಮ್ಮ ವಿದ್ಯಾರ್ಥಿಗಳು ಮತ್ತು ಕೋರ್ಸ್‌ಗಳಿಗೆ ಸಂಬಂಧಿಸಿದ ಮಾಹಿತಿಯನ್ನು ಬಹಿರಂಗಪಡಿಸಬೇಕು ಎಂದು ಕೇಂದ್ರ ಗ್ರಾಹಕ ರಕ್ಷಣಾ ಪ್ರಾಧಿಕಾರ (CCPA) ಮಾರ್ಗಸೂಚಿಯನ್ನು ಹೊರಡಿಸಿದೆ. ಗ್ರಾಹಕ ವ್ಯವಹಾರಗಳ ಕಾರ್ಯದರ್ಶಿ ನಿಧಿ ಖರೆ ಅವರು ವಿವಿಧ ಕೋಚಿಂಗ್ ಸಂಸ್ಥೆಗಳು ಬಳಸುವ ತಪ್ಪುದಾರಿಗೆಳೆಯುವ ಜಾಹೀರಾತಿನ ವಿರುದ್ಧ ನವದೆಹಲಿಯಲ್ಲಿ ಮಾರ್ಗಸೂಚಿಗಳನ್ನು ಬಿಡುಗಡೆ ಮಾಡಿದ್ದಾರೆ.

ಮಾರ್ಗಸೂಚಿಗಳ ಪ್ರಕಾರ ತರಬೇತಿ ಸಂಸ್ಥೆಗಳು ತಮ್ಮ ಕಾರ್ಯನಿರ್ವಹಣೆಯ ಬಗೆಗಿನ ಸ್ಪಷ್ಟೀಕರಣವನ್ನು ಪ್ರಮುಖವಾಗಿ ಪ್ರದರ್ಶಿಸಬೇಕು. ಅಲ್ಲದೇ ಆಯ್ಕೆಯ ನಂತರವೇ ಅಭ್ಯರ್ಥಿಗಳ ಛಾಯಾಚಿತ್ರ ಮತ್ತು ಪ್ರಶಂಸಾಪತ್ರವನ್ನು ಜಾಹೀರಾತಿಗೆ ಬಳಸಲು ಒಪ್ಪಿಗೆ ಪಡೆಯಬೇಕು. ಮಾರ್ಗಸೂಚಿಗಳ ಪ್ರಕಾರ, ಸಂಸ್ಥೆಗಳು ತಮ್ಮ ಸೇವೆಗಳು, ಸೌಲಭ್ಯಗಳು ಮತ್ತು ಮೂಲಸೌಕರ್ಯಗಳನ್ನು ನಿಖರವಾಗಿ ಘೋಷಿಸಬೇಕು. ಮಾರ್ಗಸೂಚಿ ಕೋಚಿಂಗ್, ಕೋಚಿಂಗ್ ಸೆಂಟರ್ ಮತ್ತು ಎಂಡೋಸರ್‌ಗಳ ಸ್ಪಷ್ಟ ವ್ಯಾಖ್ಯಾನಗಳನ್ನು ಸ್ಥಾಪಿಸಿದೆ.

ಸುಳ್ಳು ಮತ್ತು ಪರಿಶೀಲಿಸದ ಘೊಷಣೆಗಳು, ಖಾತರಿಗಳು ಮತ್ತು ಯಶಸ್ಸಿನ ದರವನ್ನು ಜಾಹೀರಾತು ಮಾಡುವುದರ ವಿರುದ್ಧ ಕೋಚಿಂಗ್‌ ಸೆಂಟರ್‌ಗಳಿಗೆ ಎಚ್ಚರಿಕೆ ನೀಡಲಾಗಿದೆ. ಕಳೆದ ವರ್ಷ ನಾಗರಿಕ ಸೇವಾ ಪರೀಕ್ಷೆಯಲ್ಲಿ ಒಂಬತ್ತು ಯುಪಿಎಸ್‌ಸಿ ಕೋಚಿಂಗ್ ಸಂಸ್ಥೆಗಳು ಒಟ್ಟು 2600 ವಿದ್ಯಾರ್ಥಿಗಳು ಯುಪಿಎಸ್‌ಸಿ ಪರೀಕ್ಷೆಯಲ್ಲಿ ಆಯ್ಕೆಯಾಗಿದ್ದಾರೆ ಎಂದು ಹೇಳಿಕೊಂಡಿದೆ, ಆದರೆ ಆ ವರ್ಷದಲ್ಲಿ ಕೇವಲ 1 ಸಾವಿರ ಅಭ್ಯರ್ಥಿಗಳನ್ನು ಮಾತ್ರ ಆಯ್ಕೆ ಮಾಡಲಾಗಿದೆ. ಸಿಸಿಪಿಎ ಇದುವರೆಗೆ 45 ಯುಪಿಎಸ್‌ಸಿ ಕೋಚಿಂಗ್ ಇನ್‌ಸ್ಟಿಟ್ಯೂಟ್‌ಗಳಿಗೆ ನೊಟೀಸ್ ನೀಡಿದೆ ಮತ್ತು ತಪ್ಪುದಾರಿಗೆಳೆಯುವ ಜಾಹೀರಾತುಗಳಿಗಾಗಿ 56 ಲಕ್ಷ ರೂಪಾಯಿಗಳಿಗೆ ದಂಡ ವಿಧಿಸಿದೆ. ಪುನರಾವರ್ತಿತ ಉಲ್ಲಂಘನೆಗಳು ಹೆಚ್ಚಿನ ದಂಡಗಳಿಗೆ ಕಾರಣವಾಗಬಹುದು ಮತ್ತು ಅಮಾನತಿಗೆ ಕಾರಣವಾಗಬಹುದು ಎಂದು ಎಚ್ಚರಿಸಿದೆ.

ಕೋಚಿಂಗ್ ಇನ್‌ಸ್ಟಿಟ್ಯೂಟ್‌ಗಳು ಗ್ರಾಹಕರ ಪರವಾದ ಕುಂದುಕೊರತೆ ಪರಿಹಾರ ಕಾರ್ಯವಿಧಾನವನ್ನು ಸಹ ಹೊಂದಿರಬೇಕು. ಕಳೆದ ವರ್ಷ ಸೆಪ್ಟೆಂಬರ್‌ನಿಂದ ಈ ವರ್ಷದ ಆಗಸ್ಟ್‌ವರೆಗೆ ರಾಷ್ಟ್ರೀಯ ಗ್ರಾಹಕ ಸಹಾಯವಾಣಿಯ ಮಧ್ಯಸ್ಥಿಕೆಯ ನಂತರ ಇದುವರೆಗೆ ಒಂದು ಕೋಟಿ ರೂಪಾಯಿಗಳನ್ನು ಸಂಸ್ಥೆಗಳು ಮರುಪಾವತಿಸಿವೆ. ಈ ಮಾರ್ಗಸೂಚಿಗಳು ಗ್ರಾಹಕರಿಗೆ ಪಾರದರ್ಶಕತೆ ಮತ್ತು ಸತ್ಯತೆಯನ್ನು ತರುತ್ತವೆ ಎಂದು ಕಾರ್ಯದರ್ಶಿ ಹೇಳಿದ್ದಾರೆ.