ಬುಡಕಟ್ಟು ಹೆಣ್ಣುಮಕ್ಕಳನ್ನು ಮದುವೆಯಾಗುವ ನುಸುಳುಕೋರರಿಗೆ ಭೂಮಿ ನೀಡಲು ಬಿಡುವುದಿಲ್ಲ: ಜಾರ್ಖಾಂಡ್‌ನಲ್ಲಿ ಅಮಿತ್‌ ಶಾ

ರಾಂಚಿ: ಬುಡಕಟ್ಟು ಸಮುದಾಯದ ಹುಡುಗಿಯನ್ನು ಮದುವೆಯಾಗುವ ಒಳನುಸುಳುಕೋರರಿಗೆ ಆಕೆಯ ಹೆಸರಿನಲ್ಲಿರುವ ಭೂಮಿಯನ್ನು ಪಡೆಯಲು ಅರ್ಹರಾಗಿರುವುದಿಲ್ಲ ಈ ನಿಟ್ಟಿನಲ್ಲಿ ನಾವು ಕಾನೂನು ತರುತ್ತೇವೆ ಎಂದು ಕೇಂದ್ರ ಗೃಹ ಸಚಿವ ಅಮಿತ್ ಶಾ ಅವರು ಚುನಾವಣಾ ಕಣ ಜಾರ್ಖಂಡ್‌ನಲ್ಲಿ  ಹೇಳಿದ್ದಾರೆ.

ಆಡಳಿತಾರೂಢ ಜಾರ್ಖಂಡ್ ಮುಕ್ತಿ ಮೋರ್ಚಾ-ಕಾಂಗ್ರೆಸ್ ಮೈತ್ರಿಕೂಟದ ವಿರುದ್ಧ ಹರಿಹಾಯ್ದ ಅವರು, ಭಾರತೀಯ ಜನತಾ ಪಕ್ಷವು ಗೆದ್ದರೆ, ಅದು ನುಸುಳುಕೋರರಿಗೆ ಭೂಮಿಯನ್ನು ಹಸ್ತಾಂತರಿಸುವುದನ್ನು ತಡೆಯಲು ಕಾನೂನನ್ನು ಜಾರಿಗೊಳಿಸುತ್ತದೆ ಎಂದು ಹೇಳಿದರು. ಬಾಂಗ್ಲಾದೇಶದ ‘ನುಸುಳುಕೋರರನ್ನು  ಉಲ್ಲೇಖಿಸಿ ಅವರು ಈ ಮಾತನ್ನು ಹೇಳಿದ್ದಾರೆ. ಈ ಹಿಂದೆ ಪ್ರಧಾನಿ ನರೇಂದ್ರ ಮೋದಿಯವರೂ ಇದೇ ರೀತಿಯ ಹೇಳಿಕೆ ನೀಡಿದ್ದರು.

ನುಸುಳುಕೋರರು ನಮ್ಮ ಹೆಣ್ಣುಮಕ್ಕಳನ್ನು ಮದುವೆಯಾಗಿ ಭೂಮಿಯನ್ನು ಕಸಿದುಕೊಳ್ಳುತ್ತಿದ್ದಾರೆ. ಬುಡಕಟ್ಟು ಮಹಿಳೆಯರನ್ನು ಮದುವೆಯಾದರೆ ನುಸುಳುಕೋರರಿಗೆ ಭೂಮಿಯನ್ನು ಹಸ್ತಾಂತರಿಸುವುದನ್ನು ತಡೆಯಲು ನಾವು ಕಾನೂನು ತರುತ್ತೇವೆ. ನುಸುಳುಕೋರರನ್ನು ಗುರುತಿಸಲು ನಾವು ಅವರನ್ನು ಓಡಿಸಲು ಮತ್ತು ಅವರಿಂದ ವಶಪಡಿಸಿಕೊಂಡ ಭೂಮಿಯನ್ನು ಮರಳಿ ಪಡೆಯಲು ನಾವು ಸಮಿತಿಯನ್ನು ರಚಿಸುತ್ತೇವೆ ಎಂದು ಶಾ ಸೆರೈಕೆಲಾದಲ್ಲಿ ನಡೆದ ಸಮಾವೇಶದಲ್ಲಿ ಹೇಳಿದ್ದಾರೆ.

ಅಲ್ಲದೇ ಶಾ ಅವರು ಚಂಪೈ ಸೊರೆನ್ ಅವರನ್ನು ಅವಮಾನಿಸಿ ಹೊರಹಾಕಿದ ರೀತಿಯ ವಿರುದ್ಧ ಜಾರ್ಖಾಂಡ್‌ ಸಿಎಂ ಹೇಮಂತ್‌ ಸೊರೇನ್‌ ಅವರನ್ನು ತರಾಟೆಗೆ ತೆಗೆದುಕೊಂಡರು. ಇದು ಕೇವಲ ಚಂಪೈ ಸೊರೆನ್‌ಗೆ ಮಾಡಿದ ಅವಮಾನವಲ್ಲ ಬುಡಕಟ್ಟು ಜನರಿಗೆ ಮಾಡಿದ ಅವಮಾನವಾಗಿದೆ ಎಂದು ಹೇಳಿದರು.

ಚಂಪೈ ಸೊರೆನ್ ಮಾಜಿ ಜೆಎಂ ನಾಯಕರಾಗಿದ್ದರು, ಹೇಮಂತ್ ಸೋರೆನ್ ಅವರನ್ನು ಭ್ರಷ್ಟಾಚಾರದ ಆರೋಪದಲ್ಲಿ ಬಂಧಿಸಿ ಜೈಲಿನಲ್ಲಿಟ್ಟ ನಂತರ ಜಾರ್ಖಾಂಡ್ ಮುಖ್ಯಮಂತ್ರಿಯಾದರು, ಆದರೆ ಹೇಮಂತ್ ಜಾಮೀನು ಪಡೆದ ತಕ್ಷಣ ಅವರನ್ನು ತೆಗೆದುಹಾಕಿದರು. ಅವರು ಆಗಸ್ಟ್‌ನಲ್ಲಿ ಬಿಜೆಪಿಗೆ ಸೇರಿದ್ದಾರೆ.