ಬೆಂಗಳೂರು: ಹೊಸ ಎಲೆಕ್ಟ್ರಿಕ್ ವೆಹಿಕಲ್ ಟೆಸ್ಟಿಂಗ್ ಸೌಲಭ್ಯಕ್ಕೆ ಪ್ರಲ್ಹಾದ್‌ ಜೋಶಿ ಶಂಕುಸ್ಥಾಪನೆ

ನವದೆಹಲಿ: ಕೇಂದ್ರ ಸಚಿವ ಪ್ರಹ್ಲಾದ್ ಜೋಶಿ ಅವರು ಗುರುವಾರ ಬೆಂಗಳೂರಿನ ಪ್ರಾದೇಶಿಕ ರೆಫರೆನ್ಸ್ ಸ್ಟ್ಯಾಂಡರ್ಡ್ ಲ್ಯಾಬೋರೇಟರಿ ಕ್ಯಾಂಪಸ್‌ನಲ್ಲಿ ನ್ಯಾಷನಲ್‌ ಟೆಸ್ಟಿಂಗ್‌ ಹೌಸ್‌ನ ಹೊಸ ಎಲೆಕ್ಟ್ರಿಕ್ ವೆಹಿಕಲ್ ಪರೀಕ್ಷಾ ಸೌಲಭ್ಯಕ್ಕೆ ಶಂಕುಸ್ಥಾಪನೆ ಮಾಡಿದರು.

ಎಂಟು ತಿಂಗಳಲ್ಲಿ ಸಿದ್ಧಗೊಳ್ಳಲಿರುವ ಈ ಹೊಸ ಪ್ರಯೋಗಾಲಯವು ಸುಧಾರಿತ ಬ್ಯಾಟರಿ ಪರೀಕ್ಷಾ ಸಾಧನಗಳನ್ನು ಹೊಂದಿದ್ದು, ಎಲೆಕ್ಟ್ರಾನಿಕ್ ಸುರಕ್ಷತೆ, ಕ್ರಿಯಾತ್ಮಕ ಸುರಕ್ಷತೆ, ಹವಾಮಾನ ಪರೀಕ್ಷೆ, ಯುವಿ ವಿಕಿರಣದ ತುಕ್ಕು, ವಸ್ತು ಪರೀಕ್ಷೆ ಮತ್ತು ಬಾಳಿಕೆ ಪರೀಕ್ಷೆ ಸೇರಿದಂತೆ ವ್ಯಾಪಕ ಶ್ರೇಣಿಯ ಪರೀಕ್ಷೆಗಳನ್ನು ನಿರ್ವಹಿಸುವ ಸಾಮರ್ಥ್ಯವನ್ನು ಹೊಂದಿದೆ.

ಈ ಸೌಲಭ್ಯವು ಗ್ರಾಹಕರನ್ನು ತಲುಪುವ ಮೊದಲು ಕಟ್ಟುನಿಟ್ಟಾದ ಗುಣಮಟ್ಟದ ಮಾನದಂಡಗಳನ್ನು ಪೂರೈಸಲು EV ಉತ್ಪಾದನಾ ಉದ್ಯಮಕ್ಕೆ ಸಹಾಯ ಮಾಡುತ್ತದೆ.

ಈ ಸಂದರ್ಭದಲ್ಲಿ ಅಧಿಕಾರಿಗಳನ್ನು ಉದ್ದೇಶಿಸಿ ಮಾತನಾಡಿದ ಸಚಿವರು, ನಮ್ಮ ಬುಲೆಟ್ ರೈಲು, ಮೆಟ್ರೊ ರೈಲು, ಜಲ ಜೀವನ್ ಮಿಷನ್ ಮತ್ತು ಸೆಂಟ್ರಲ್ ವಿಸ್ತಾ ಯೋಜನೆಗೆ ರಾಷ್ಟ್ರೀಯ ಪರೀಕ್ಷಾ ಭವನವು ಗುಣಮಟ್ಟದ ಪರೀಕ್ಷೆ ನಡೆಸುತ್ತಿದೆ. ಇಂಟರ್ನ್ಯಾಷನಲ್ ಆರ್ಗನೈಸೇಶನ್ ಆಫ್ ಲೀಗಲ್ ಮೆಟ್ರೋಲಜಿ ಅಥವಾ OIML ಪ್ರಮಾಣಪತ್ರವನ್ನು ನೀಡಲು ಇದು ಅಧಿಕಾರ ಹೊಂದಿದೆ.
ಅಂತಾರಾಷ್ಟ್ರೀಯವಾಗಿ ಗುರುತಿಸಲ್ಪಟ್ಟ ಪ್ರಮಾಣೀಕರಣವನ್ನು ನೀಡುವ ಸಾಮರ್ಥ್ಯವು ನಿಖರವಾದ ಮಾಪನ ಮತ್ತು ಪ್ರಮಾಣೀಕರಣದಲ್ಲಿ ಭಾರತದ ಬೆಳೆಯುತ್ತಿರುವ ಸಾಮರ್ಥ್ಯಗಳನ್ನು ಎತ್ತಿ ತೋರಿಸುತ್ತದೆ ಎಂದರು.

ರಾಷ್ಟ್ರೀಯ ಪರೀಕ್ಷಾ ಭವನ ಭಾರತದಲ್ಲಿ ಡ್ರೋನ್ ಪ್ರಮಾಣೀಕರಣವನ್ನು ಒದಗಿಸುವ ಏಕೈಕ ಸರ್ಕಾರಿ ಸಂಸ್ಥೆಯಾಗಿದೆ. ಭಾರತದಲ್ಲಿ ಗುಣಮಟ್ಟದ ಪರೀಕ್ಷಾ ಮಾರುಕಟ್ಟೆ 500 ಕೋಟಿ ರೂಪಾಯಿಗಳು ಮತ್ತು ರಾಷ್ಟ್ರೀಯ ಟೆಸ್ಟ್ ಹೌಸ್‌ನ ಪಾಲು ಕೇವಲ 30 ಕೋಟಿ ರೂಪಾಯಿಗಳು. ಆದ್ದರಿಂದ ಮೂರು ವರ್ಷಗಳಲ್ಲಿ ತಮ್ಮ ಪಾಲನ್ನು 100 ಕೋಟಿ ರೂಪಾಯಿಗಳಿಗೆ ಹೆಚ್ಚಿಸುವಂತೆ ಅವರು ರಾಷ್ಟ್ರೀಯ ಟೆಸ್ಟ್ ಹೌಸ್‌ಗೆ ಕರೆ ನೀಡಿದ್ದಾರೆ.