ಮೈಸೂರು: ದಲಿತ ಕಾಲೋನಿಗೆ ಶ್ರೀ ವಿಶ್ವ ಪ್ರಸನ್ನ ತೀರ್ಥ ಸ್ವಾಮೀಜಿ ಭೇಟಿ

ಮೈಸೂರು: ಮೈಸೂರು ನಗರದ ರಾಜೇಂದ್ರ ನಗರದ ಕುರಿಮಂಡಿಯ ದಲಿತ ಸಮುದಾಯದ ಪ್ರಮುಖ ಬೀದಿಗಳಿಗೆ ಮಂಗಳವಾರ ಸಂಜೆಯಂದು ಸಾಮರಸ್ಯ ವೇದಿಕೆ ಹಾಗೂ ಧರ್ಮಜಾಗರಣ ವತಿಯಿಂದ ಆಯೋಜಿಸಿದ್ದ ನಮ್ಮ ನಡಿಗೆ ಸಾಮರಸ್ಯದ ಕಡೆಗೆ ಎಂಬ ಕಾರ್ಯಕ್ರಮಕ್ಕೆ ಪರಮ ಪೂಜ್ಯ ಶ್ರೀ ವಿಶ್ವ ಪ್ರಸನ್ನ ತೀರ್ಥ ಸ್ವಾಮೀಜಿ ಪೇಜಾವರ ಉಡುಪಿ ಮಠ ಇವರು ಡಾ.ಬಾಬಾ ಸಾಹೇಬ್ ಅಂಬೇಡ್ಕರ್ ಅವರ ಭಾವಚಿತ್ರ ಕ್ಕೆ ಪುಷ್ಪಾರ್ಚಣೆ ಮಾಡುವ ಮೂಲಕ ಚಾಲನೆ ನೀಡಿದರು.

ಶ್ರೀಗಳು ಕಾಲೋನಿಗೆ ಬಂದ ತಕ್ಷಣ ಅಲ್ಲಿಯ ಸ್ಥಳೀಯರು ಹೂ ಮಳೆಯನ್ನು ಹರಿಸಿದರು ಹಾಗೂ ಮಂಗಳವಾದ್ಯ ಮತ್ತು ತಮಟೆ ನಗಾರಿಗಳೊಂದಿಗೆ ಬರಮಾಡಿಕೊಂಡರು ಹಾಗೂ ಮಾತೆಯರು ಮಕ್ಕಳು ಶ್ರದ್ಧಾಭಕ್ತಿಯಿಂದ 9 ಪೂರ್ಣ ಕುಂಭ ಗಳೊಂದಿಗೆ ಸ್ವಾಗತ ಮಾಡಿದರು. ಅನಂತರ ಎಲ್ಲಾ ಪ್ರಮುಖ ಬೀದಿಗಳಲ್ಲಿ ಶ್ರೀಗಳು ಪಾದಯಾತ್ರೆಯನ್ನು ನಡೆಸಿದರು ಹಾಗೂ ಸ್ಥಳೀಯ 7 ಮನೆಗಳಿಗೆ ಭೇಟಿ ನೀಡಿ ರಾಮಜ್ಯೋತಿ ದೀಪವನ್ನು ಬೆಳಗಿಸುವ ಮೂಲಕ ಅವರ ಮನೆಯ ದೇವರ ಫೋಟೋಗಳಿಗೆ ಸ್ವತಃ ಪೂಜೆ ಯನ್ನು ಮಾಡಿದರು ಹಾಗೂ ಅಲ್ಲಿನ ಮಾತೆಯರು ಮನೆಗಳಿಗೆ ಭೇಟಿ ನೀಡಿದ ಸಂದರ್ಭದಲ್ಲಿ ಭಕ್ತಿ ಭಾವದಿಂದ ಶ್ರೀಗಳ ಪಾದಗಳನ್ನು ತೊಳೆದು ಅರಿಶಿನ ಕುಂಕುಮವನ್ನು ಇಟ್ಟು ಪೂಜಿಸಿದರು.

ಮನೆಯ ಮುಂಭಾಗ ಬಿಡಿಸಿದಂತಹ ಬಣ್ಣ ಬಣ್ಣದ ರಂಗೋಲಿ ಗಳಿಂದ ರಸ್ತೆಗಳು ಕಂಗೊಳಿಸುತ್ತಿತ್ತು. ಅಲ್ಲಿನ ಎಲ್ಲಾ ತರುಣರು ರಸ್ತೆಗಳು ಹಸಿರು ಮಾವಿನ ತೋರಣ, ಬಾಳೆಕಂದು ಹಾಗೂ ಕೇಸರಿ ಧ್ವಜಗಳೊಂದಿಗೆ ರಾರಾಜಿಸುವಂತೆ ಮಾಡಿದರು. ಪುಟ್ಟ ಮಕ್ಕಳು ಸಹ ಆದರದಿಂದ ಸ್ವಾಮೀಜಿ ಅವರನ್ನು ಸ್ವಾಗತಿಸಿದರು. ಇದು ಸ್ವಾಮೀಜಿಯವರಲ್ಲಿ ಸಂತಸವನ್ನು ತಂದಿತ್ತು ಹಾಗೂ ಅಲ್ಲಿನ ಕರುಮಾರಿಯಮ್ಮ ದೇವಸ್ಥಾನ ಸಿದ್ದಪ್ಪಾಜಿ ದೇವಸ್ಥಾನ ಹಾಗೂ ಇನ್ನೂ ಅನೇಕ ದೇವಸ್ಥಾನಗಳಿಗೆ ಶ್ರೀಗಳು ಭೇಟಿ ನೀಡಿದರು.

ಈ ಸಂದರ್ಭದಲ್ಲಿ ಅಲ್ಲಿನ ಊರಿನ ಯಜಮಾನರಾದ  ದೊರೆಯವರು, ರಾಷ್ಟ್ರೀಯ ಸ್ವಯಂಸೇವಕ ಸಂಘದ ಮೈಸೂರು ಮಹಾನಗರದ ಸಂಘಚಾಲಕರಾದ  ವಾಸುದೇವ್ ಭಟ್ ರವರು , ಹಿರಿಯರಾದ  ಮ. ವೆಂಕಟರಾಮ್ ಜಿ ರವರು ಸಾಮಾಜಿಕ ನ್ಯಾಯ ವೇದಿಕೆಯ  ಡಾ.ಆನಂದ್ ರವರು ಸೇವಾ ಪ್ರಮುಖರಾದ ಆನಂದ ಎಸ್ ಎಲ್ ಹಾಗೂ ಸಾಮರಸ್ಯ ವೇದಿಕೆಯ ನಾಗೇಂದ್ರ ಅಲ್ಲಿಯ ಪ್ರಮುಖರಾದ ವಿನೋದ್, ವೇಲು, ನಾಗರಾಜ್, ಚಂದ್ರು ಮತ್ತು ಕಾರ್ತಿಕ್ ಮಂತಾದವರು ಉಪಸ್ಥಿತರಿದ್ದರು.