ರಷ್ಯಾ ಸೈನಿಕರು ಹೊಡೆದಾಡಿಕೊಂಡು ಸಾವನ್ನಪ್ಪಬೇಕು ಎಂಬುದು ಪಾಶ್ಚಿಮಾತ್ಯರ ಆಶಯ: ಪುಟಿನ್

ಮಾಸ್ಕೋ: ರಷ್ಯಾದ ಸೈನಿಕರು ಪರಸ್ಪರ ಹೊಡೆದಾಡಿಕೊಂಡು ಸಾವನ್ನಪ್ಪಬೇಕು ಎಂಬುದು ಪಾಶ್ಚಿಮಾತ್ಯ ರಾಷ್ಟ್ರಗಳ ಬಯಕೆಯಾಗಿದೆ ಎಂದು ರಷ್ಯಾದ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಆರೋಪಿಸಿದ್ದಾರೆ. ಉಕ್ರೇನ್ ಮತ್ತು ಅದರ ಪಾಶ್ಚಿಮಾತ್ಯ ಮಿತ್ರರಾಷ್ಟ್ರಗಳು ವ್ಯಾಗ್ನರ್ ಗುಂಪಿನ ದಂಗೆಯ ಸಮಯದಲ್ಲಿ ರಷ್ಯನ್ನರು ಒಬ್ಬರನ್ನೊಬ್ಬರು ಕೊಲ್ಲಬೇಕು ಎಂದು ಬಯಸುತ್ತಿದ್ದಾರೆ ಎಂದಿದ್ದಾರೆ.

ಬಂಡುಕೋರರು ಹಿಂದೆ ಸರಿದ ನಂತರ ರಾಷ್ಟ್ರವನ್ನುದ್ದೇಶಿಸಿ ಮಾಡಿದ ಮೊದಲ ಭಾಷಣದಲ್ಲಿ ಪುಟಿನ್ ಈ ಹೇಳಿಕೆ ನೀಡಿದ್ದಾರೆ. ರಕ್ತಪಾತವಾಗದಂತೆ ಆದೇಶ ಹೊರಡಿಸಿದ್ದೇನೆ. ವ್ಯಾಗ್ನರ್ ಹೋರಾಟಗಾರರಿಗೆ ಕ್ಷಮಾದಾನ ನೀಡಲಾಗಿದೆ ಎಂದು ಪುಟಿನ್ ಹೇಳಿದ್ದಾರೆ. ಹೋರಾಟಗಾರರು ರಷ್ಯಾದ ಸೈನ್ಯಕ್ಕೆ ಸೇರಬೇಕೆ ಅಥವಾ ಬೆಲಾರಸ್‌ಗೆ ಹೋಗಬೇಕೆ ಅಥವಾ ತಮ್ಮ ಮನೆಗಳಿಗೆ ಹಿಂತಿರುಗಬೇಕೆ ಎಂದು ಆಯ್ಕೆ ಮಾಡಬಹುದು ಎಂದು ಅವರು ಹೇಳಿದರು. ವಿಫಲವಾದ ವಾರಾಂತ್ಯದ ದಂಗೆಯಲ್ಲಿ ಹುತಾತ್ಮರಾದ ಪೈಲಟ್‌ಗಳಿಗೆ ಪುಟಿನ್ ಗೌರವ ಸಲ್ಲಿಸಿದರು.

ಸಶಸ್ತ್ರ ದಂಗೆಯ ಸಮಯದಲ್ಲಿ  ಮಾಡಿದ ಕೆಲಸಕ್ಕಾಗಿ ಅವರು ತಮ್ಮ ಭದ್ರತಾ ಅಧಿಕಾರಿಗಳಿಗೆ ಧನ್ಯವಾದಗಳನ್ನು ಅರ್ಪಿಸಿದರು. ಏತನ್ಮಧ್ಯೆ, ವ್ಯಾಗ್ನರ್ ದಂಗೆಯನ್ನು ಕೊನೆಗೊಳಿಸುವ ಒಪ್ಪಂದದ ಹೊರತಾಗಿಯೂ, ಸಶಸ್ತ್ರ ದಂಗೆಯನ್ನು ಸಂಘಟಿಸಲು ಪ್ರಯತ್ನಿಸಿದ್ದಕ್ಕಾಗಿ ಯೆವ್ಗೆನಿ ಪ್ರಿಗೊಜಿನ್ ತನಿಖೆಯಲ್ಲಿದ್ದಾರೆ. ಈ ಕ್ರಮವು ರಷ್ಯಾದ ಮಿಲಿಟರಿ ನಾಯಕತ್ವದ ವಿರುದ್ಧದ ಪ್ರತಿಭಟನೆಯೇ ಹೊರತು ದಂಗೆಯ ಪ್ರಯತ್ನವಲ್ಲ ಎಂದು ಪ್ರಿಗೋಜಿನ್ ಆಡಿಯೊ ಸಂದೇಶದಲ್ಲಿ ಹೇಳಿದ್ದಾರೆ.

ಈ ನಡುವೆ, ಯುನೈಟೆಡ್ ಸ್ಟೇಟ್ಸ್ ಅಧ್ಯಕ್ಷ ಜೋ ಬಿಡೆನ್ ವಾಗ್ನರ್ ದಂಗೆಯಲ್ಲಿ ವಾಷಿಂಗ್ಟನ್ ಮತ್ತು ನ್ಯಾಟೋ ಯಾವುದೇ ಭಾಗಿಯಾಗಿಲ್ಲ ಎಂದು ಹೇಳಿದ್ದಾರೆ. ವಿದೇಶಾಂಗ ಇಲಾಖೆಯ ಪ್ರಕಾರ, ಯುಎಸ್ ರಾಯಭಾರಿ ಲಿನ್ ಟ್ರೇಸಿ ನೇರವಾಗಿ ರಷ್ಯಾವನ್ನು ಸಂಪರ್ಕಿಸಿದ್ದಾರೆ ಮತ್ತು ಯುಎಸ್ ಭಾಗಿಯಾಗಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ.