ದುರಂತ ಸಂಭವಿಸಿದಾಗ ಜಗತ್ತು ಭಾರತದೊಂದಿಗೆ ನಿಂತಿತು: ಜೈಶಂಕರ್

ನವದೆಹಲಿ:  ಒಡಿಶಾದಲ್ಲಿ ಸಂಭವಿಸಿದ ಭೀಕರ ರೈಲು ದುರಂತಕ್ಕೆ ಸಂಬಂಧಿಸಿದಂತೆ ಜಗತ್ತಿನ ಮೂಲೆ ಮೂಲೆಯಿಂದಲೂ ಭಾರತಕ್ಕೆ ಸಂತಾಪಗಳು ವ್ಯಕ್ತವಾಗುತ್ತಿವೆ. ಈ ಸಹಾನುಭೂತಿಯ ಹರಿವು ಭಾರತದೊಂದಿಗೆ ಜಗತ್ತು ಎಷ್ಟು ನಿಕಟ ಸಂಬಂಧ ಹೊಂದಿದೆ ಎಂಬುದನ್ನು ತೋರಿಸುತ್ತದೆ ಎಂದು ವಿದೇಶಾಂಗ ವ್ಯವಹಾರಗಳ ಸಚಿವ ಎಸ್.ಜೈಶಂಕರ್ ಹೇಳಿದ್ದಾರೆ.

ನಮೀಬಿಯಾದಲ್ಲಿ ಭಾರತೀಯ ವಲಸಿಗರನ್ನುದ್ದೇಶಿಸಿ ಮಾತನಾಡಿದ ಜೈಶಂಕರ್, “ಜಗತ್ತಿನಾದ್ಯಂತದ ಅನೇಕ ನಾಯಕರು ಮತ್ತು ನಮೀಬಿಯಾದ ವಿದೇಶಾಂಗ ಸಚಿವರು ರೈಲು ದುರಂತಕ್ಕೆ ಸಂಬಂಧಿಸಿದಂತೆ ಭಾರತಕ್ಕೆ ಒಗ್ಗಟ್ಟು ವ್ಯಕ್ತಪಡಿಸಿದ್ದಾರೆ ಮತ್ತು ಸಹಾನುಭೂತಿ ವ್ಯಕ್ತಪಡಿಸಿದ್ದಾರೆ. ಇದು ಜಾಗತೀಕರಣಗೊಂಡ ಜಗತ್ತಿನಲ್ಲಿ ಭಾರತಕ್ಕಿರುವ ಮಹತ್ವದ ಸಂಕೇತವಾಗಿದೆ. ಪ್ರಪಂಚದಾದ್ಯಂತದ ಹಲವಾರು ವಿದೇಶಾಂಗ ಮಂತ್ರಿಗಳು ಮತ್ತು ಸ್ನೇಹಿತರು ನನಗೆ ಮತ್ತು ಪ್ರಧಾನಿ ನರೇಂದ್ರ ಮೋದಿ ಅವರಿಗೆ ಪತ್ರ ಬರೆದಿದ್ದಾರೆ. ಭಾರತದಲ್ಲಿ ದುರಂತ ಸಂಭವಿಸಿದಾಗ ಜಗತ್ತು ಭಾರತದೊಂದಿಗೆ ನಿಲ್ಲಲು ನಿರ್ಧರಿಸಿತು” ಎಂದಿದ್ದಾರೆ

ಎರಡು ಪ್ಯಾಸೆಂಜರ್ ರೈಲುಗಳು ಮತ್ತು ಗೂಡ್ಸ್ ರೈಲನ್ನು ಒಳಗೊಂಡ ದುರಂತ ಘಟನೆಯು 275 ಜನರನ್ನು ಬಲಿ ತೆಗೆದುಕೊಂಡಿತು ಮತ್ತು 1,000 ಕ್ಕೂ ಹೆಚ್ಚು ಜನರು ಗಾಯಗೊಂಡಿದ್ದಾರೆ.

ನಮೀಬಿಯಾ ಭೇಟಿಯ ಸಮಯದಲ್ಲಿ ಜೈಶಂಕರ್ ದೇಶದ ಉನ್ನತ ನಾಯಕತ್ವದೊಂದಿಗೆ ಮಾತುಕತೆ ನಡೆಸಲಿದ್ದಾರೆ.

“ವಿಂಡ್‌ಹೋಕ್‌ಗೆ ಆಗಮಿಸಿದ್ದೇನೆ. ನಮೀಬಿಯಾದ ಅಂತರಾಷ್ಟ್ರೀಯ ಸಂಬಂಧಗಳು ಮತ್ತು ಸಹಕಾರದ ಉಪ ಮಂತ್ರಿ ಜೆನೆಲ್ಲಿ ಮಾತುಂಡು ನನ್ನನ್ನು ತುಂಬಾ ಪ್ರೀತಿಯಿಂದ ಸ್ವೀಕರಿಸಿದ್ದಕ್ಕಾಗಿ ಧನ್ಯವಾದಗಳು. ನಮ್ಮ ಸಮಯ-ಪರೀಕ್ಷಿತ ಸಂಬಂಧಗಳನ್ನು ಮುಂದಕ್ಕೆ ಕೊಂಡೊಯ್ಯುವ ಉತ್ಪಾದಕ ಭೇಟಿಗಾಗಿ ಎದುರುನೋಡುತ್ತಿದ್ದೇನೆ” ಎಂದು ಜೈಶಂಕರ್ ಮೊದಲು ಟ್ವೀಟ್ ಮಾಡಿದ್ದಾರೆ.