ಬಾಂಗ್ಲಾದೇಶ ಪ್ರವೇಶಿಸಿದ ವಿಶ್ವದ ಅತಿ ಉದ್ದದ ರಿವರ್ ಕ್ರೂಸ್ ಗಂಗಾ ವಿಲಾಸ್

ನವದೆಹಲಿ: ಪ್ರಧಾನಿ ನರೇಂದ್ರ ಮೋದಿ ಅವರು ಜನವರಿ 13 ರಂದು ವಾರಣಾಸಿಯಿಂದ ಚಾಲನೆ ನೀಡಿದ ವಿಶ್ವದ ಅತಿ ಉದ್ದದ ರಿವರ್ ಕ್ರೂಸ್ ಗಂಗಾ ವಿಲಾಸ್ ಶುಕ್ರವಾರ ಬಾಂಗ್ಲಾದೇಶದ ಜಲ ಪ್ರದೇಶವನ್ನು ತಲುಪಿದೆ. ಪ್ರಯಾಣ ಆರಂಭಿಸಿದ 21 ನೇ ದಿನದಂದು ಅದು ಬಾಂಗ್ಲಾ ತಲುಪಿದೆ.

ಕ್ರೂಸ್ ಸದಸ್ಯರು ತಮ್ಮ ಕಸ್ಟಮ್ಸ್ ಮತ್ತು ಇಮಿಗ್ರೇಶನ್ ಫಾರ್ಮಾಲಿಟಿಗಳನ್ನು ಮಧ್ಯಾಹ್ನ ಪೂರ್ಣಗೊಳಿಸಿದ ನಂತರ ಕ್ರೂಸ್‌ ಅನ್ನು ಆಂಟಿಹರಾದಲ್ಲಿ ಲಂಗರು ಹಾಕಿದೆ. ಆಂಟಿಹರಾದಲ್ಲಿ ರಾತ್ರಿಯ ತಂಗುವಿಕೆಯ ನಂತರ, ಕ್ರೂಸ್ ತನ್ನ ಮುಂದಿನ ಗಮ್ಯಸ್ಥಾನಕ್ಕೆ ಇಂದು ಬೆಳಿಗ್ಗೆ ಯಾನ ಆರಂಭಿಸಿದೆ ಮತ್ತು ಮಧ್ಯಾಹ್ನ ಮೊಂಗ್ಲಾ ಬಂದರನ್ನು ತಲುಪುತ್ತದೆ.

ಬಾಂಗ್ಲಾದೇಶದಲ್ಲಿರುವ ಭಾರತದ ಹೈ ಕಮಿಷನರ್ ಪ್ರಣಯ್ ವರ್ಮಾ ಅವರು ಇಂದು ಮೊಂಗ್ಲಾಗೆ ಆಗಮಿಸಿದ ಪ್ರವಾಸಿಗರನ್ನು ಸ್ವಾಗತಿಸಲಿದ್ದಾರೆ. ಮೊಂಗ್ಲಾಗೆ ಆಗಮಿಸಿದಾಗ ರಿವರ್ ಕ್ರೂಸ್ ಸದಸ್ಯರನ್ನು ಸ್ವಾಗತಿಸಲು‌ ಬಾಂಗ್ಲಾ ಹಡಗು ಸಚಿವ ಖಾಲಿದ್ ಮಹಮೂದ್ ಸೇರಿದಂತೆ ಬಾಂಗ್ಲಾದೇಶದ ಹಲವಾರು ಗಣ್ಯರು ಉಪಸ್ಥಿತರಿರುತ್ತಾರೆ. ಮಧ್ಯಾಹ್ನದ ನಂತರ, ಪ್ರವಾಸಿಗರು ಬಾಗರ್‌ಹಾಟ್‌ನಲ್ಲಿರುವ ಯುನೆಸ್ಕೋ ಪರಂಪರೆಯ ತಾಣ 60 ಗುಮ್ಮಟಗಳ ಮಸೀದಿಯನ್ನು ಭೇಟಿ ಮಾಡಲು ತೆರಳಲಿದ್ದಾರೆ.

ಕ್ರೂಸ್ ಹಡಗಿನ ಮಹತ್ವದ ಭೇಟಿಯು ಉಭಯ ದೇಶಗಳ ನಡುವಿನ ಪ್ರವಾಸೋದ್ಯಮದ ಸಾಮರ್ಥ್ಯವನ್ನು ಅರಿತುಕೊಳ್ಳುವಲ್ಲಿ, ಜನರೊಂದಿಗೆ ಜನರ ಸಂಬಂಧಗಳನ್ನು ಬಲಪಡಿಸುವಲ್ಲಿ ಮತ್ತು ಭಾರತ ಮತ್ತು ಬಾಂಗ್ಲಾದೇಶದ ನಡುವಿನ ಸಂಪರ್ಕದ ಹೊಸ ಮಾರ್ಗಗಳನ್ನು ತೆರೆಯುವಲ್ಲಿ ಪ್ರಮುಖ ಹೆಜ್ಜೆ ಎಂದು ಪ್ರಶಂಸಿಸಲಾಗುತ್ತಿದೆ.

ಬಾಂಗ್ಲಾದೇಶದಲ್ಲಿ ಎರಡು ವಾರಗಳ ಕಾಲ ವಿಹರಿಸುವ ನೌಕೆಯು ಪ್ರವಾಸಿಗರನ್ನು ಕೆಲವು ಐತಿಹಾಸಿಕ ಮತ್ತು ಪಾರಂಪರಿಕ ಸ್ಥಳಗಳಾದ ಸುಂದರಬನ್, ವಿಶ್ವದ ಅತಿದೊಡ್ಡ ಮ್ಯಾಂಗ್ರೋವ್ ಅರಣ್ಯಗಳಿಗೆ ಕರೆದೊಯ್ಯುತ್ತದೆ. ಫೆಬ್ರವರಿ 16 ರಂದು ಅಸ್ಸಾಂನ ಧುಬ್ರಿ ಪ್ರವೇಶಿಸಲಿದೆ.