ತೈವಾನ್‌ ಭೇಟಿಯಲ್ಲಿ ಯುಎಸ್‌ ಸ್ಪೀಕರ್: ಎಚ್ಚರಿಕೆ ರವಾನಿಸಿದ ಚೀನಾ

ತೈಪೆ: ಚೀನಾದ 20ಕ್ಕೂ ಹೆಚ್ಚು ಮಿಲಿಟರಿ ವಿಮಾನಗಳು ಮಂಗಳವಾರ ತೈವಾನ್‌ನ ವಾಯು ರಕ್ಷಣಾ ವಲಯಕ್ಕೆ ಹಾರಿದವು ಎಂದು ತೈಪೆಯ ಅಧಿಕಾರಿಗಳು ತಿಳಿಸಿದ್ದಾರೆ.

ಯುಎಸ್ ಹೌಸ್ ಸ್ಪೀಕರ್ ನ್ಯಾನ್ಸಿ ಪೆಲೋಸಿ ಅವರು ತೈವಾನ್‌ಗೆ ಭೇಟಿ ನೀಡಿದ ಬಳಿಕ ಈ ಘಟನೆ ನಡೆದಿದೆ. ತೈವಾನ್ ಅನ್ನು ಚೀನಾ ತನ್ನ ಭೂಪ್ರದೇಶ ಎಂದು ಪರಿಗಣಿಸುತ್ತದೆ. ಇಲ್ಲಿಗೆ ಅಮೆರಿಕದ ವಕ್ತಾರರ ಭೇಟಿ ಚೀನಾ ಕೆಂಗಣ್ಣಿಗೆ ಗುರಿಯಾಗಿದೆ.

ನಾನ್ಸಿ ಪೆಲೋಸಿ ಅವರು ನಿನ್ನೆ ಸಂಜೆ ತೈವಾನ್ ನಲ್ಲಿ ಬಂದಿಳಿದಿದ್ದಾರೆ.‌ ಅವರ ಭೇಟಿಯನ್ನು ಚೀನಾ ವಿರೋಧಿಸುತ್ತಲೇ ಬಂದಿತ್ತು ಮತ್ತು ಇದಕ್ಕೆ ತಕ್ಕ ಬೆಲೆ ತೆರಬೇಕಾಗುತ್ತದೆ ಎಂಬ ಎಚ್ಚರಿಕೆಯನ್ನು ಅಮೆರಿಕಾಗಿ ನೀಡಿದೆ.

ಅಲ್ಲದೇ ತೈವಾನ್‌ ವಿರುದ್ಧ ಚೀನಾ ವ್ಯಾಪಾರ ನಿರ್ಬಂಧವನ್ನು ಘೋಷಿಸಿದೆ.

ಕಳೆದ 25 ವರ್ಷಗಳಲ್ಲಿ ತೈವಾನ್‌ಗೆ ಭೇಟಿ ನೀಡುತ್ತಿರುವ ಅಮೆರಿಕದ ಎರಡನೇ ಅತ್ಯುನ್ನತ ಹುದ್ದೆಯಲ್ಲಿರುವ ವ್ಯಕ್ತಿ ಈಕೆ ಆಗಿದ್ದಾರೆ. 82 ವರ್ಷದ ಇವರು ಯುಎಸ್ ಮಿಲಿಟರಿ ವಿಮಾನದಲ್ಲಿ ತೈಪೇ ಸಾಂಗ್‌ಶನ್ ಏರ್ಪೋರ್ಟ್ ನಲ್ಲಿ ವಿದೇಶಾಂಗ ಸಚಿವ ಜೋಸೆಫ್ ವು ಅವರೊಂದಿಗೆ ಬಂದಿಳಿಯುತ್ತಿರುವುದನ್ನು ಮತ್ತು ಅವರನ್ನು ತೈಪೇ ಅಧಿಕಾರಿಗಳು ಸ್ವಾಗತಿಸುತ್ತಿರುವುದನ್ನು ನೇರ ಪ್ರಸಾರ ಮಾಡಲಾಗಿದೆ.

“ತೈವಾನ್‌ಗೆ ನಮ್ಮ ಅಧಿಕಾರಿಗಳ ಭೇಟಿ ತೈವಾನಿನ ಪ್ರಜಾಪ್ರಭುತ್ವದ ಬಗ್ಗೆ ಇರುವ ಬದ್ಧತೆಯನ್ನು ಪುನರುಚ್ಚರಿಸುತ್ತದೆ” ಎಂದು ನಾನ್ಸಿ ಅವರು ಬಂದಿಳಿದ ಬಳಿಕ ಹೇಳಿಕೆ ನೀಡಿದ್ದಾರೆ.

ಇವರ ಭೇಟೆಯಿಂದ ಕೊತಕೊತ ಕುದಿಯುತ್ತಿರುವ ಚೀನಾ, ನಮ್ಮ ಮಿಲಿಟರಿ ಹೈ ಅಲರ್ಟ್ ನಲ್ಲಿ ಇದೆ. ಈ ಭೇಟಿಗೆ ಪ್ರತಿಕ್ರಿಯೆಯಾಗಿ ಸರಣಿ ಮಿಲಿಟರಿ ಕ್ರಮಗಳನ್ನು ನಡೆಸುತ್ತೇವೆ ಎಂದಿದೆ.