ಬೆಂಗಳೂರು: ಸ್ಥಳೀಯ ಸಂಸ್ಥೆಗಳಿಂದ ಚುನಾಯಿಸಲ್ಪಡುವ ಅಭ್ಯರ್ಥಿಗಳನ್ನು ಗೆಲ್ಲಿಸಲು ಹಲವು ರೀತಿಯ ವಾಮ ಮಾರ್ಗದ ಮುಖಾಂತರ ಮತ ಹಾಕಿಸುವ ಕುರಿತು ತಯಾರಿ ನಡೆಯುತ್ತಿರುವ ವಿಷಯ ಕೇಳಿ ಬರುತ್ತಿದೆ. ಬೇರೆ ಬೇರೆ ವಾಮ ಮಾರ್ಗಗಳ ಮೂಲಕ ಸುಮಾರು 900ಕ್ಕೂ ಹೆಚ್ಚು ಮತಗಳನ್ನು ಹಾಕಿಸುವ ಪ್ರಯತ್ನ ಮಡುತ್ತಿದ್ದಾರೆಂದು ಖಚಿತವಾಗಿ ತಿಳಿದು ಬಂದಿದೆ. ಆದ್ದರಿಂದ ದಯವಿಟ್ಟು ಈ ಬಗ್ಗೆ ಕ್ರಮ ಜರುಗಿಸಬೇಕೆಂದು ರಾಜ್ಯ ಬಿಜೆಪಿ ವತಿಯಿಂದ ಇಂದು ಬೆಂಗಳೂರಿನಲ್ಲಿ ಮುಖ್ಯ ಚುನಾವಣಾಧಿಕಾರಿಗಳಿಗೆ ಮನವಿ ಸಲ್ಲಿಸಲಾಯಿತು.
ಇದಕ್ಕೆ ತಾಜಾ ಉದಾಹರಣೆಯಾಗಿ ಬಿಜಾಪುರ ಮತ್ತು ಬಾಗಲಕೋಟೆ ಜಿಲ್ಲಾ ವ್ಯಾಪ್ತಿಯಲ್ಲಿ ಸುನೀಲ್‍ಗೌಡ ಎಂಬಾತನು ತರಬೇತಿಯನ್ನು ಕೊಡುತ್ತಿರುವ ಮಾಹಿತಿ ಲಭ್ಯವಾಗಿದೆ. ಅನಕ್ಷರಸ್ಥರಂತೆ ನಟಿಸಿ ನಮಗೆ ವಿದ್ಯೆಯಿಲ್ಲ ಹಾಗಾಗಿ ನಮಗೆ ಮತ ಹಾಕಲು ಸಹಾಯಕರನ್ನು ಕಳುಹಿಸಿ ಎಂದು ಕೇಳುವುದು, ಅವರ ಜೊತೆಗೆ ಒಳಗೆ ಹೋಗಿ ಅಂಥವರಿಂದ ತಮಗೆ ಬೇಕಾದ ಅಭ್ಯರ್ಥಿಗೆ ಮತ ಹಾಕಿಸುವುದು, ಅಂಗವಿಕಲರು – ಇವರಿಗೆ ಓಡಾಡಲು ಆಗುವುದಿಲ್ಲ, ಕೈಗಳು ನಡುಗುತ್ತವೆ, ಮತ ಹಾಕಲು ಸಾಧ್ಯವಿಲ್ಲ ಹಾಗಾಗಿ ಇವರಿಗೆ ಮತ ಹಾಕಲು ಸಹಾಯಕರನ್ನು ಕೊಡಬೇಕು ಎಂದು ಹೇಳಿ ಅಂತಹವರಿಂದ ತಮ್ಮ ಅಭ್ಯರ್ಥಿಗೆ ಮತ ಹಾಕಿಸುವುದು. ಕುರುಡರಂತೆ ನಟಿಸಿ, ಕಣ್ಣು ಕಾಣುವುದಿಲ್ಲ, ಸಹಾಯಕರನ್ನು ಕೊಡಿ ಎಂದು ಅವರಿಂದ ತಮ್ಮ ಅಭ್ಯರ್ಥಿಗೆ ಮತ ಹಾಕಿಸುವುದು ಹಾಗೂ ಒಳಗೆ ಕುಳಿತಿರುವ ಚುನಾವಣಾ ಅಧಿಕಾರಿಗಳನ್ನು ತಮ್ಮ ದರ್ಪದಿಂದ ಹೆದರಿಸಿ ಇಂತಹ ಕೆಲಸ ಮಾಡಿಸುವ ಪ್ರಯತ್ನವೂ ಆರಂಭಗೊಂಡಿರುವ ಕುರಿತು ಮಾಹಿತಿಗಳು ಬರುತ್ತಿವೆ ಎಂದು ಮನವಿಯಲ್ಲಿ ಗಮನ ಸೆಳೆಯಲಾಗಿದೆ.
ಈ ತರಹದ ಸಂಗತಿಗಳು ಕನಕಪುರ ಪ್ರದೇಶ ಹಾಗೂ ಚಾಮರಾಜನಗರ, ಕೋಲಾರ ಜಿಲ್ಲೆಗಳಲ್ಲಿ ಆಗಬಹುದಾದ ಸಂಭವವಿದೆ. ನಿಜವಾದ ಮತದಾರನ ಪರವಾಗಿ ಅವನಂತೆ ಹೋಲುವ ಬೇರೆ ನಕಲಿ ಜನರಿಂದ ಮತ ಹಾಕಿಸುವ ಸಾಧ್ಯತೆಯಿದೆ. ಮತಪತ್ರದ ಮೇಲೆ ತನಗೆ ಮತ ಹಾಕಿದ್ದರ ಬಗ್ಗೆ ಸಂಕೇತ ಚಿಹ್ನೆ ಹಾಕಲಿಕ್ಕೆ ಹೇಳುವುದು. ತಮಗೆ ಮತ ಹಾಕದೆ ಇರುವ ಮತದಾರರನ್ನು ಗುರುತಿಸಿ, ಅಂತಹವರು ಸಮಯಕ್ಕೆ ಸರಿಯಾಗಿ ಬಂದು ಮತ ಹಾಕಲು ಸಾಧ್ಯವಾಗದಂತೆ ಮಾಡುವುದು, ಮಹಿಳಾ ಮತದಾರರೊಟ್ಟಿಗೆ ಅವಳಿಗೆ ತಿಳಿಯುವುದಿಲ್ಲ ಎಂಬ ನೆಪವೊಡ್ಡಿ ಅವಳ ಗಂಡ ಮತ ಕೇಂದ್ರದೊಳಗೆ ಹೋಗುವ ಸಾಧ್ಯತೆ ಇದೆ ಎಂದು ಬಿಜೆಪಿ ಮನವಿಯಲ್ಲಿ ತಿಳಿಸಿದೆ.
ಇಂತಹ ಕೃತ್ಯಕ್ಕೆ ಎಲ್ಲಿಯೂ ಆಸ್ಪದವಾಗದ ರೀತಿಯಲ್ಲಿ ಅತ್ಯಂತ ಕಠಿಣ ನಿಯಮವನ್ನು ಮತ ಕೇಂದ್ರದಲ್ಲಿ ಪಾಲಿಸಬೇಕು. ಪ್ರತಿಯೊಬ್ಬ ಅಭ್ಯರ್ಥಿಯೂ ನ್ಯಾಯಯುತ ಗೆಲುವು ಸಾಧಿಸಲು ಬೇಕಾದ ಶಾಂತಿ, ಸುವ್ಯವಸ್ಥೆ ಮತಗಟ್ಟೆಯಲ್ಲಿರಬೇಕು ಎಂದು ಬಿಜೆಪಿ ಚುನಾವಣಾಧಿಕಾರಿಗೆ ಮನವಿ ಮಾಡಿದೆ.
ಬೆಂಗಳೂರು ನಗರ ಸ್ಥಳೀಯ ಸಂಸ್ಥೆಗಳ ಕ್ಷೇತ್ರದ ಕಾಂಗ್ರೆಸ್ ಅಭ್ಯರ್ಥಿ ಯೂಸುಫ್ ಷರೀಫ್ ಬಾಬು ಅವರಿಂದ ಚುನಾವಣಾ ನೀತಿಸಂಹಿತೆಯ ಉಲ್ಲಂಘನೆ ಆಗಿದ್ದನ್ನು ಪರಿಗಣಿಸಿ ಅವರ ಅಭ್ಯರ್ಥಿತನವನ್ನು ಅಸಿಂಧುಗೊಳಿಸಲು ಆಗ್ರಹಿಸುವ ಮನವಿಯನ್ನು ಕೂಡ ರಾಜ್ಯ ಬಿಜೆಪಿ ಮುಖ್ಯ ಚುನಾವಣಾಧಿಕಾರಿಗಳಿಗೆ ಸಲ್ಲಿಸಿದೆ,
Admin
ಸಮಾಜದ ಉತ್ತಮ ಸುದ್ದಿಗಳನ್ನು ನಾವು ನಿಮ್ಮ ಮುಂದಿಡುವ ಪ್ರಯತ್ನವನ್ನು ಮಾಡುತ್ತಿದ್ದೇವೆ. ಪ್ರೋತ್ಸಾಹಿಸಿ, ಸ್ವೀಕರಿಸಿ. ನೀವು ಸ್ವೀಕರಿಸಿದಾಗ ನಾವು ಬೆಳೆಯಬಹುದು. ಒಳ್ಳೆಯ ಸುದ್ದಿಗಳಿಗೆ ಸಮಾಜ ತೆರೆದುಕೊಂಡಿದೆ ತಲುಪಿಸುವವರು ನಾವಾಗಬಾರದೇಕೆ?
ನ್ಯೂಸ್ 13 ಸಮಾಜದ ಧನಾತ್ಮಕ ಸುದ್ದಿಗಳನ್ನು ಹಾಗೂ ರಾಷ್ಟ್ರೀಯ ವಿಚಾರಗಳನ್ನು ನಿಮಗೆ ತಲುಪಿಸುವ ಪ್ರಯತ್ನ ಮಾಡುತ್ತದೆ. ಈ ರೀತಿ ಇನ್ನಷ್ಟು ಉತ್ತಮ ಸುದ್ದಿಗಳನ್ನು ತಲುಪಿಸಲು ನಿಮ್ಮ ಸಹಕಾರವನ್ನು ಅಪೇಕ್ಷಿಸುತ್ತಿದ್ದೇವೆ. ಈ ಕಾರ್ಯದಲ್ಲಿ ನೀವೂ ನಮ್ಮೊಂದಿಗೆ ಜೊತೆಯಾಗಿ.
News13 strives to publish and promote positive news/happenings and nationalistic thoughts. Join hands with us in this constructive cause. We hope and expect your co-operation in this objective of broadcasting news that shall keep up with quality journalism.
