ಕೊರೋನಾ 3ನೇ ಅಲೆ: ಹೆಚ್ಚುವರಿ ಆರೋಗ್ಯ ಸೌಲಭ್ಯ ಸೃಷ್ಟಿಗೆ 1,500 ಕೋಟಿ ರೂ ಮಂಜೂರು

ಬೆಂಗಳೂರು: ಕೊರೋನಾ ಮೂರನೇ ಅಲೆ ನಿಯಂತ್ರಣ ಹಿನ್ನೆಲೆಯಲ್ಲಿ ಹೆಚ್ಚುವರಿ ಆರೋಗ್ಯ ಸೌಲಭ್ಯ ಸೃಷ್ಟಿಗಾಗಿ ರಾಜ್ಯ ಸರ್ಕಾರ 1500 ಕೋಟಿ ರೂ. ಗಳನ್ನು ಮಂಜೂರು ಮಾಡಿದೆ.

ಕೊರೋನಾ ಟಾಸ್ಕ್‌ಫೋರ್ಸ್‌ ಸಭೆಯ ಬಳಿಕ ಮಾತನಾಡಿರುವ ಉಪಮುಖ್ಯಮಂತ್ರಿ ಡಾ ಅಶ್ವತ್ಥ್ ನಾರಾಯಣ್, ಮುಂದಿನ ಮೂರು ತಿಂಗಳೊಳಗೆ ರಾಜ್ಯದ 19 ಜಿಲ್ಲಾ ಆಸ್ಪತ್ರೆ‌ಗಳನ್ನು, 146 ತಾಲೂಕು ಆಸ್ಪತ್ರೆಗಳನ್ನು ಮೇಲ್ದರ್ಜೆಗೆ ಏರಿಸಲಾಗುವುದು. ರಾಜ್ಯದ ಎಲ್ಲಾ ಸರ್ಕಾರಿ ತಾಲೂಕು, ಜಿಲ್ಲಾ ಆಸ್ಪತ್ರೆಗಳಲ್ಲಿ ಐಸಿಯು ಸೌಲಭ್ಯ ಇರಬೇಕು ಎಂದು ರಾಜ್ಯ ಸರ್ಕಾರ ನಿರ್ಧರಿಸಿದೆ. ಈ ಹಿನ್ನೆಲೆಯಲ್ಲಿ ಹೆಚ್ಚುವರಿ ವೈದ್ಯಕೀಯ ಸೌಕರ್ಯ‌ಗಳ ಸೃಷ್ಟಿಗಾಗಿ ಈ ಮೊತ್ತವನ್ನು ಮಂಜೂರು ಮಾಡಿರುವುದಾಗಿ ಹೇಳಿದ್ದಾರೆ.

ಕೋವಿಡ್ ಮೂರನೇ ಅಲೆ ನಿಯಂತ್ರಣ‌ಕ್ಕೆ ಸಿದ್ಧವಾಗುವ ಸಂಬಂಧ ರಾಜ್ಯದ ಆರೋಗ್ಯ ಸೌಲಭ್ಯ‌ಗಳ ಕುರಿತಂತೆ ನಡೆದ ಸಭೆಯಲ್ಲಿ ಹಲವು ನಿರ್ಣಯ‌ಗಳನ್ನು ಕೈಗೊಳ್ಳಲಾಗಿದೆ. ಎಲ್ಲಾ ತಾಲೂಕು ಮತ್ತು ಜಿಲ್ಲಾಸ್ಪತ್ರೆ‌ಗಳಲ್ಲಿ 50 ಬೆಡ್ ಆಕ್ಸಿಜನ್, 25 ಐಸಿಯು ಬೆಡ್ ಇರಬೇಕು. ಇದಕ್ಕೆ ಅನುಕೂಲ ಆಗುವಂತೆ ಕನಿಷ್ಠ ನಾಲ್ಕು ಸಾವಿರಗಳಷ್ಟು ವೈದ್ಯರ ಅಗತ್ಯ ಇದೆ. ಗ್ರೂಪ್ ಡಿ ನರ್ಸ್‌ಗಳು ಬೇಕಾಗುತ್ತಾರೆ. ಈ ಸಂಬಂಧ ಅಗತ್ಯ ಕ್ರಮಗಳ ಬಗ್ಗೆ ಚರ್ಚೆ ನಡೆಸಿರುವುದಾಗಿ ಅವರು ತಿಳಿಸಿದ್ದಾರೆ.

ಹಾಗೆಯೇ ಕೊರೋನಾ ಮೂರನೇ ಅಲೆ ನಿಯಂತ್ರಣ‌ಗಳಿಗೆ ಪೂರಕವಾದ ಸಿದ್ಧತೆ ಮಾಡಲಾಗಿದೆ. ಈ ಕಾರ್ಯಗಳಿಗೆ ತಗುಲುವ ಖರ್ಚು ವೆಚ್ಚ‌ಗಳ ಬಗ್ಗೆ ಸಬ್ ಕಮಿಟಿ ವರದಿಯನ್ನು ನೀಡಿದೆ. ಈ ಹಿನ್ನೆಲೆಯಲ್ಲಿ 1500 ಕೋಟಿ ರೂ. ಗಭ ಬೇಡಿಕೆ‌ಗೂ ಅನುಮೋದಿಸಲಾಗಿದೆ. ಈ ಮೊತ್ತ ಬೆಂಗಳೂರು ಹೊರತಾದಂತೆ ಇರುವ ಆಸ್ಪತ್ರೆಗಳಿಗೆ ಮೀಸಲಿಟ್ಟ ಮೊತ್ತವಾಗಿದೆ. ಇದನ್ನು ಬಳಸಿ ತಾಲೂಕು ಆಸ್ಪತ್ರೆಗಳು, ಜಿಲ್ಲಾ ಆಸ್ಪತ್ರೆ‌ಗಳಲ್ಲಿ ಕೊರೋನಾ ಚಿಕಿತ್ಸೆಗೆ ಅನುಕೂಲ ಕಲ್ಪಿಸಲು ವ್ಯವಸ್ಥೆ ಮಾಡಲಾಗುತ್ತದೆ ಎಂದು ಅವರು ನುಡಿದಿದ್ದಾರೆ.