ವಿರಾಜಪೇಟೆ‌: ಶೀಘ್ರದಲ್ಲೇ ರಾಜ್ಯದ ಮೊದಲ ಆಮ್ಲಜನಕ ಪರಿವರ್ತಿತ ಘಟಕ ಕಾರ್ಯಾರಂಭ

ಬೆಂಗಳೂರು: ಕೊಡಗು ಜಿಲ್ಲೆಯ ವಿರಾಜಪೇಟೆ ಸರ್ಕಾರಿ ಆಸ್ಪತ್ರೆಯಲ್ಲಿ ರಾಜ್ಯದ ಮೊದಲ ಆಮ್ಲಜನಕ ಪರಿವರ್ತಿತ ಘಟಕ ಸ್ಥಾಪನೆಯಾಗುತ್ತಿದೆ.

ಮುಂದಿನ 15 ದಿನಗಳಲ್ಲಿ ಪ್ರತಿನಿತ್ಯ 1 ಟನ್‌ಗಳಷ್ಟು ಆಮ್ಲಜನಕ ಪರಿವರ್ತಿಸುವ ಘಟಕಗಳು ಸಿದ್ಧವಾಗಲಿದೆ. ಇದರಿಂದ 100 ಬೆಡ್‌ಗಳಷ್ಟು ಕೊರೋನಿ ರೋಗಿಗಳಿಗೆ ಆಮ್ಲಜನಕ ಪೂರೈಕೆ ಮಾಡಲಾಗುತ್ತದೆ. ಘಟಕ ಆರಂಭವಾದ ಬಳಿಕ ಇದು ನಿರಂತರ‌ವಾಗಿ ಕಾರ್ಯ ನಿರ್ವಹಿಸಲಿದೆ.

ಮಡಿಕೇರಿಗೆ ಸಂಬಂಧಿಸಿದಂತೆ ಈ ಆಸ್ಪತ್ರೆ ತೀವ್ರ ಮತ್ತು ಮಧ್ಯಮ ಸ್ವರೂಪ‌ದ ಸೋಂಕಿತರಿಗೆ ಚಿಕಿತ್ಸೆ ನೀಡುವ ಏಕೈಕ ಕೇಂದ್ರ ಇದಾಗಿತ್ತು. ಆ ಬಳಿಕ ವಿರಾಜಪೇಟೆ ಮತ್ತು ಸೋಮವಾರ ಪೇಟೆ ತಾಲೂಕು‌ಗಳಲ್ಲಿ ಕೊರೋನಾ ಕೇರ್ ಸೆಂಟರ್‌ಗಳನ್ನು ತೆರೆಯಿತು. 1 ಕೋಟಿ ರೂ. ವೆಚ್ಚದಲ್ಲಿ ಇದೀಗ ವಿರಾಜಪೇಟೆ ಸರ್ಕಾರಿ ಆಸ್ಪತ್ರೆಯ‌ಲ್ಲಿ ಈ ಘಟಕ ಸ್ಥಾಪನೆಯಾಗುತ್ತಿದೆ.

ಇದು ರಾಜ್ಯದಲ್ಲೇ ಮೊದಲನೆಯ ಮತ್ತು ಒಮ್ಮೆ ಸ್ಥಾಪಿಸಿದ ನಂತರ ಆಮ್ಲಜನಕ ಕೊರತೆಗೆ ಸಮರ್ಪಕ ಪರಿಹಾರವಾಗಬಲ್ಲ ಘಟಕವಾಗಿ ಕಾರ್ಯ ನಿರ್ವಹಿಸಲಿದೆ. ಈಗಾಗಲೇ ಜಂಬೋ ಆಕ್ಸಿಜನ್ ಸಿಲಿಂಡರ್ ಕೊರತೆಯಿಂದ ಸ್ಥಗಿತಾಗಿರುವ 50 ಹಾಸಿಗೆಗಳ ವಿರಾಜಪೇಟೆ ಆಸ್ಪತ್ರೆಯನ್ನು 98 ಹಾಸಿಗೆಗಳಿಗೆ ಪರಿವರ್ತನೆ ಮಾಡಿ, ಅದನ್ನು ಈ ಘಟಕದ ಜೊತೆಗೆ ಸಂಪರ್ಕಿಸಲಾಗುತ್ತದೆ ಎಂದು ಮೂಲಗಳು ತಿಳಿಸಿವೆ.