ಇಂಡಿಯಾ ಬುಕ್ ಆಫ್ ರೆಕಾರ್ಡ್‌ನಲ್ಲಿ ದಾಖಲೆ ಬರೆದ ಪುತ್ತೂರಿನ ಪುಟಾಣಿ ಕೋಗಿಲೆ ಜ್ಞಾನ

ಪುತ್ತೂರು: ಸಂಗೀತ ಲೋಕದ ಪುಟಾಣಿ ತಾರೆ 5 ರ ಹರೆಯದ ಜ್ಞಾನ ಗುರುರಾಜ್ ಇಂಡಿಯಾ ಬುಕ್ ಆಫ್ ರೆಕಾರ್ಡ್ಸ್‌ನಲ್ಲಿ ತಮ್ಮ ಹೆಸರು ದಾಖಲಾಗುವಂತಹ ಸಾಧನೆಯೊಂದನ್ನು ಮಾಡಿದ್ದಾರೆ.

ಸಂಗೀತ ಯಾನದಲ್ಲಿ 20 ಹಾಡುಗಳನ್ನು ಹಾಡುವ ಮೂಲಕ ಜ್ಞಾನ ಮುಡಿಗೆ ಈ ಸಾಧನೆಯ ಗರಿ ಸೇರಿದೆ. ಕನ್ನಡ ಖಾಸಗಿ ವಾಹಿನಿಯೊಂದರ ಸರಿಗಮಪ ಸಂಗೀತ ಸ್ಪರ್ಧೆ‌ಯ ಮೂಲಕ ಮನೆಮಾತಾಗಿದ್ದ ಈ ಪುಟಾಣಿ ಈವರೆಗೆ 112 ಮೆಡಲ್‌ಗಳು, ಟ್ರೋಫಿಯನ್ನು ತಮ್ಮದಾಗಿಸಿಕೊಂಡಿದ್ದಾರೆ. ಜೊತೆಗೆ ಸದ್ಯ ಇಂಡಿಯಾ ಬುಕ್ ಆಫ್ ರೆಕಾರ್ಡ್ಸ್‌ನಲ್ಲಿಯೂ ತಮ್ಮ ಹೆಸರು ಬರುವಂತೆ ಚಿಕ್ಕ ಪ್ರಾಯದಲ್ಲೇ ಮಹತ್ವದ ಸಾಧನೆ ಮೆರೆದಿದ್ದಾರೆ.

ಈ ಪುಟಾಣಿ ಕಡಬ ತಾಲೂಕಿನ ಕೊಂಬಾರು ಕಟ್ಟೆ ಇಡ್ಯಡ್ಕ‌ದವರಾಗಿದ್ದು, ಪ್ರಸ್ತುತ ಬೆಂಗಳೂರಿನಲ್ಲಿ ನೆಲೆಸಿದ್ದಾರೆ. ಇವರ ತಾಯಿ ರೇಖಾ ಅವರು ರಾಮನಗರ ಮೊರಾರ್ಜಿ ದೇಸಾಯಿ ಶಾಲೆಯ ಶಿಕ್ಷಕಿ, ತಂದೆ ಗುರುರಾಜ್ ಹಿನ್ನೆಲೆ ಗಾಯಕರಾಗಿದ್ದಾರೆ. ತಮ್ಮ ಎರಡೂವರೆ ವರ್ಷ‌ದಲ್ಲೇ 10 ಕಷ್ಟಕರ ಹಾಡುಗಳನ್ನು ಹಾಡಿದ್ದ ಈ ಪುಟಾಣಿ ಮೂರನೇ ವರ್ಷದ‌ಲ್ಲಿ ಕರ್ನಾಟಕ ಬುಕ್ ಆಫ್ ರೆಕಾರ್ಡ್‌ನಲ್ಲಿ ದಾಖಲಾಗಿದ್ದರು. ಇದೀಗ ಈ ‘ಪುಟಾಣಿ ಸಂಗೀತ ಜ್ಞಾನ’ ಇಂಡಿಯಾ ಬುಕ್ ಆಫ್ ರೆಕಾರ್ಡ್ ಮಾಡುವ ಮೂಲಕ ಮತ್ತಷ್ಟು ಸಾಧನೆ ಮೆರೆದಿದ್ದಾರೆ. ಹಾಗೆಯೇ ರಾಮನಗರ‌ದ ಸ್ವಚ್ಛ ಸರ್ವೇಕ್ಷಣ ಸಮಿತಿಯ ರಾಯಭಾರಿ‌ಯೂ ಹೌದು.