ಟ್ವಿಟರ್‌ನಲ್ಲಿ ಅಕ್ಸಾಯ್‌ ಚೀನ್‌,‌ ಲಡಾಖ್ ಇಲ್ಲದ ಭೂಪಟ ಹಾಕಿದ ರಾಬರ್ಟ್‌ ವಾದ್ರಾ

ನವದೆಹಲಿ: ಕಾಂಗ್ರೆಸ್ ನಾಯಕಿ ಪ್ರಿಯಾಂಕಾ ಗಾಂಧಿಯವರ ಪತಿ ರಾಬರ್ಟ್ ವಾದ್ರಾ ಭಾರತದ ತಪ್ಪಾದ ನಕ್ಷೆಯನ್ನು ಟ್ವಿಟರ್‌ನಲ್ಲಿ ಪೋಸ್ಟ್ ಮಾಡಿ ಆವಾಂತರ ಸೃಷ್ಟಿಸಿದ್ದಾರೆ.

ದೆಹಲಿಯಲ್ಲಿ ನಡೆದ ಟ್ರಾಕ್ಟರ್ ಮೆರವಣಿಗೆಯ ವೇಳೆ ನಡೆದ ಹಿಂಸಾಚಾರದ ಬಗ್ಗೆ ಸಂದೇಶವನ್ನು ಪೋಸ್ಟ್ ಮಾಡುವಾಗ, ವಾದ್ರಾ ಚೀನಾ ಮತ್ತು ಪಾಕಿಸ್ಥಾನ ಆಕ್ರಮಿಸಿರುವ ಭಾರತದ ಪ್ರದೇಶಗಳು ಇಲ್ಲದ ಭೂಪಟ ಹಾಕಿದ್ದಾರೆ. ಅಕ್ಸಾಯ್ ಚೀನ್ ಮತ್ತು ಪಿಓಕೆ ಇಲ್ಲದ ಭಾರತೀಯ ನಕ್ಷೆಯನ್ನು ಬಳಸಿದ್ದಾರೆ.

ಗಣರಾಜ್ಯೋತ್ಸವದಂದು ನಡೆದ ‘ರೈತ ಆಂದೋಲನ’ ಹಿಂಸಾಚಾರಕ್ಕೆ ತಿರುಗಿದೆ ಮತ್ತು ಪ್ರತಿಭಟನಾಕಾರರು ಪೊಲೀಸ್ ಸಿಬ್ಬಂದಿಯ ಮೇಲೆ ಹಲ್ಲೆ ನಡೆಸಿದ್ದಾರೆ ಎಂದು ಹೇಳಿರುವ ವಾದ್ರಾ, ಈ ಬಗ್ಗೆ ಆಳವಾದ ತನಿಖೆ ನಡೆಸಬೇಕೆಂದು ಕರೆ ನೀಡಿದ್ದಾರೆ. ವಾದ್ರಾ ತನ್ನ ಟ್ವಿಟ್ಟರ್ ಮತ್ತು ಇನ್‌ಸ್ಟಾಗ್ರಾಮ್ ಖಾತೆಗಳಲ್ಲಿ ಇಮೇಜ್ ರೂಪದಲ್ಲಿ ಸಂದೇಶವನ್ನು ಪೋಸ್ಟ್ ಮಾಡಿದ್ದು, ಅದರಲ್ಲಿ ಭಾರತದ ನಕ್ಷೆಯೂ ಸೇರಿದೆ. ಆದರೆ ಆಘಾತಕಾರಿ ಸಂಗತಿಯೆಂದರೆ, ಪಾಕಿಸ್ಥಾನ ಮತ್ತು ಚೀನಾವನ್ನು ಮೆಚ್ಚಿಸುವಂತಹ ನಕ್ಷೆಯನ್ನು ಅವರು ಬಳಸಿದ್ದು, ಏಕೆಂದರೆ ಈ ನಕ್ಷೆಯು ಪಾಕಿಸ್ಥಾನ ಆಕ್ರಮಿತ ಕಾಶ್ಮೀರ ಮತ್ತು ಅಕ್ಸಾಯ್ ಚಿನ್ ಅನ್ನು ಹೊರತುಪಡಿಸಿತ್ತು. ಈ ಪ್ರದೇಶ ಭಾರತದ ಸಂಸತ್ತಿನ ಪ್ರಕಾರ ಭಾರತದ ಅವಿಭಾಜ್ಯ ಅಂಗವಾಗಿದೆ.

ಕೊನೆಗೆ, ನಕ್ಷೆಯಲ್ಲಿನ ಗಂಭೀರ ಸಮಸ್ಯೆಯನ್ನು ಸಾಮಾಜಿಕ ಮಾಧ್ಯಮ ಬಳಕೆದಾರರು ಗಮನಸೆಳೆದ ನಂತರ, ರಾಬರ್ಟ್ ವಾದ್ರಾ ತಮ್ಮ ಸಾಮಾಜಿಕ ಮಾಧ್ಯಮ ಖಾತೆಗಳಿಂದ ಪೋಸ್ಟ್ ಅನ್ನು ತೆಗೆದುಹಾಕಿದ್ದಾರೆ. ಸ್ವಲ್ಪ ಸಮಯದ ನಂತರ, ಅವರು ಇನ್ಸ್ಟಾಗ್ರಾಮ್‌ನಲ್ಲಿ ಸಂದೇಶವನ್ನು ಮರು ಪೋಸ್ಟ್ ಮಾಡಿದ್ದಾರೆ, ಈ ಬಾರಿ ಭಾರತದ ಸರಿಯಾದ ನಕ್ಷೆಯನ್ನು ಬಳಸಿದ್ದಾರೆ.

ಕಾಂಗ್ರೆಸ್ ಪಕ್ಷದೊಂದಿಗೆ ಸಂಪರ್ಕ ಹೊಂದಿದ ಯಾರಾದರೂ ದೇಶದ ತಪ್ಪು ನಕ್ಷೆಯನ್ನು ಬಳಸುತ್ತಿರುವುದು ಇದೇ ಮೊದಲಲ್ಲ. ಕಳೆದ ತಿಂಗಳು, ಅಸ್ಸಾಂ ಕಾಂಗ್ರೆಸ್‌ನ ಅಧಿಕೃತ ಟ್ವಿಟರ್ ಖಾತೆಯು ಇದೇ ರೀತಿಯ ವಿರೂಪ ನಕ್ಷೆಯನ್ನು ಬಳಸಿದೆ. ಈ ಹಿಂದೆ ಕಾಂಗ್ರೆಸ್ ಸಂಸದ ಶಶಿ ತರೂರ್ ಮತ್ತು ಛತ್ತೀಸ್‌ಗಢ ಕಾಂಗ್ರೆಸ್ ಇದೇ ರೀತಿಯ ನಕ್ಷೆಗಳನ್ನು ಪೋಸ್ಟ್ ಮಾಡಿದ್ದವು.