ಶ್ರೀ ರಾಮ ಮಂದಿರ ನಿರ್ಮಾಣ ನಿಧಿ ಸಮರ್ಪಣಾ ಅಭಿಯಾನ: ಹುಬ್ಬಳ್ಳಿಯಲ್ಲಿ ಸಂತ ಸಮಾವೇಶ

ಹುಬ್ಬಳ್ಳಿ : ಅಯೋದ್ಯೆಯ ಶ್ರೀ ರಾಮ ಮಂದಿರ ನಿರ್ಮಾಣ ನಿಧಿ ಸಮರ್ಪಣಾ ಅಭಿಯಾನದ ನಿಮಿತ್ತ ಹುಬ್ಬಳ್ಳಿಯ ಕೇಶವ ‌ಕುಂಜದಲ್ಲಿ ಸಂತ ಸಮಾವೇಶ ನಡೆಯಿತು.

ಸಮಾವೇಶವನ್ನು ಉದ್ದೇಶಿಸಿ ಪ್ರಾಸ್ತಾವಿಕವಾಗಿ ಮಾತನಾಡಿದ ನಿಧಿ ಸಮರ್ಪಣಾ ಅಭಿಯಾನದ ರಾಜ್ಯ ಸಮಿತಿ ಸದ್ಯಸ್ಯ ಡಾ. ಎಸ್ ಆರ್ ರಾಮನಗೌಡರ, ಶ್ರೀ ರಾಮ ಜನ್ಮಭೂಮಿ ಹೋರಾಟದ ಪ್ರಾರಂಭದಿಂದಲೂ ಪೂಜ್ಯ ಸಂತರ ಆಶೀರ್ವಾದ ಹಾಗೂ ಮಾರ್ಗದರ್ಶನ ದೊರೆತ ಪರಿಣಾಮ ಇಂದು ನಮ್ಮ ಹೋರಾಟ ಯಶಸ್ವಿಯಾಗಿ, ಅಯೋಧ್ಯೆಯಲ್ಲಿ ಪ್ರಭು ಶ್ರೀರಾಮನ ಭವ್ಯ ಮಂದಿರ ನಿರ್ಮಾಣದ ಕಾರ್ಯ ಪ್ರಾರಂಭವಾಗಿದೆ. ಮಂದಿರ ನಿರ್ಮಾಣದ ಕಾರ್ಯದಲ್ಲಿ ಸಮಾಜದ ಎಲ್ಲ ವರ್ಗಗಳು ಕೊಡುಗೆಯನ್ನು ನೀಡಬೇಕೆಂಬ ಉದ್ದೇಶದಿಂದ ದೇಶಾಧ್ಯಂತ ನಿಧಿ ಸಮರ್ಪಣಾ ಅಭಿಯಾನ ಕೈಗೆತ್ತಿಕೊಳ್ಳಲಾಗಿದೆ. ಈ ಕಾರ್ಯಕ್ಕೂ ಕೂಡ ಪೂಜ್ಯ ಸಂತರ ಮಾರ್ಗದರ್ಶನ ಹಾಗೂ ಆಶೀರ್ವಾದ ಅವಶ್ಯಕ. ಈ ಹಿನ್ನಲೆಯಲ್ಲಿ ಸಂತರ ಸಮಾವೇಶ ಹಮ್ಮಿಕೊಳ್ಳಲಾಗಿದ್ದು, ಪೂಜ್ಯ ಸಂತರು ಎಂದಿನಂತೆಯೇ ನಮ್ಮ ಶಕ್ತಿಯಾಗಿ ನಮ್ಮ ಜೊತೆಗಿರಬೇಕೆಂದು ಕೋರಿಕೊಂಡರು.

ಸಮಾವೇಶದಲ್ಲಿ ಮಾತನಾಡಿದ ಮುರು ಸಾವಿರ ಮಠದ ಶ್ರೀ ಮನ್ನಿರಂಜನ ಶ್ರೀ ಗುರುಸಿದ್ಧರಾಜಯೋಗಿಂದ್ರ ಮಹಾಸ್ವಾಮಿಗಳು, ಶ್ರೀರಾಮ ಮಂದಿರ ನಿರ್ಮಾಣವಾಗುತ್ತಿರುವುದು ಬಹುಕೋಟಿ ಹಿಂದೂಗಳ ಕನಸು ನನಸಾದಂತಾಗಿದೆ ಪ್ರಭು ಶ್ರೀ ರಾಮ ನಮ್ಮೆಲ್ಲರ ಆರಾಧ್ಯದೈವ. ಆತನ ಮಂದಿರ ನಿರ್ಮಾಣಕ್ಕೆ ನಾವೆಲ್ಲಾ ಸಂತರು ಕೈ ಜೋಡಿಸಬೇಕು. ತಾವೂ ಕೂಡ ಇದರಲ್ಲಿ ಭಾಗಿಯಾಗಿದ್ದು ನಿಧಿ ಸಮರ್ಪಿಸುವುದಾಗಿ ಹೇಳಿದರು.

ದೇವರಹುಬ್ಬಳ್ಳಿಯ ಶ್ರೀ ಸಿದ್ದ ಶಿವಯೋಗಿಗಳು ಮಾತನಾಡಿ, ಶ್ರೀ ರಾಮನ ಮಂದಿರಕ್ಕಾಗಿ ಲಕ್ಷಾಂತರ ಭಕ್ತರು ಪ್ರಾಣಾರ್ಪಣೆ ಮಾಡಿದ್ದಾರೆ. ಜನರಲ್ಲಿ ಜಾಗೃತಿ ಮೂಡಿಸುವ ಈ ಅಭಿಯಾನವನ್ನು ನಾವೆಲ್ಲರೂ ಯಶಸ್ವಿಯಾಗಿ ನಡೆಸೋಣ ಎಂದರು.

ಸಭೆಯಲ್ಲಿ ಮಾತನಾಡಿದ ಮುರುಘಾ ಮಠದ ಶ್ರೀ ಮಲ್ಲಿಕಾರ್ಜುನ ಸ್ವಾಮೀಜಿ ಶ್ರೀ ರಾಮಮಂದಿರ ನಿರ್ಮಾಣವಾಗುತ್ತಿರುವುದು ಅತ್ಯಂತ ಸಂತಸದ ಸಂಗತಿಯಾಗಿದ್ದು, ನಾವೆಲ್ಲ ಸಂತರು ಈ ಕಾರ್ಯದಲ್ಲಿ ಶಕ್ತಿ ಮೀರಿ ಪ್ರಯತ್ನಿಸೋಣ ಎಂದು ಕರೆ ನೀಡಿದರು.

ಸಮಾವೇಶದಲ್ಲಿ ಮಾತನಾಡಿದ ರಾಮಕೃಷ್ಣ ವಿವೇಕಾನಂದ ಆಶ್ರಮದ ಪೂಜ್ಯ ಶ್ರೀ ವಿಜಯಾನಂದ ಸರಸ್ವತಿಯವರು, ರಾಮನ ಕಾರ್ಯ ರಾಷ್ಟ್ರ ಕಾರ್ಯ. ಮನುಷ್ಯನಾದವನು ಜೀವನದಲ್ಲಿ ಹೇಗೆ ನಡೆದುಕೊಳ್ಳಬೇಕೆನ್ನುವುದನ್ನು ಪ್ರಭು ಶ್ರೀ ರಾಮನಿಂದ ನೋಡಿ ಕಲಿಯಬೇಕು ಎಂದು ಹೇಳಿದರು.

ಸಮಾವೇಶದಲ್ಲಿ ಶ್ರೀ ರಘುವೀರಾನಂದ ಜೀ, ನವಚೇತನ ಭಾರತ ಭೂಷಣ ಶ್ರೀ ಷಡಾಕ್ಷರಿ ಮಹಾಸ್ವಾಮಿಗಳು, ಶ್ರೀ ಪರಮಾತ್ಮನಂದಜಿ ಮಹಾಸ್ವಾಮಿಗಳು, ಶ್ರೀ ನಿತ್ಯಾನಂದ ಸ್ವಾಮಿಗಳು, ಶ್ರೀ ರುದ್ರಯ್ಯ ಸ್ವಾಮಿಗಳು, ಶ್ರೀ ಮಾತಾಜಿ ತೇಜೋಮಯಿ,ಶ್ರೀ ಮಾತಾಜಿ ಅಮೂಲ್ಯಮಯಿ,ಶ್ರೀ ಉಮಾಪತಿದಾಸ ಇಸ್ಕಾನ್, ಶ್ರೀ ವಲ್ಲಭ ಗೋಸ್ವಾಮಿಗಳು,ಶ್ರೀ ಅಭಿನವ ರೇವಣಶಿದ್ದೇಶ್ವರ ಮಹಾಸ್ವಾಮಿಗಳು ಭಾಗವಹಿಸಿ ಮಾರ್ಗದರ್ಶನ ಮಾಡಿದರು.

R.S.S ಹಿರಿಯ ಪ್ರಚಾರಕ ಸು.ರಾಮಣ್ಣ ‌ಅವರು ದಿಕ್ಸೂಚಿ ಭಾಷಣ ಮಾಡಿದರು. ವಿನಾಯಕ ತಲಗೇರಿ ಕಾರ್ಯಕ್ರಮ ನಿರ್ವಹಣೆ ಹಾಗೂ ಸುಭಾಸಸಿಂಗ ಜಮಾದಾರ ಸ್ವಾಗತ ಪರಿಚಯ ಮಾಡಿದರು.