ದಾಳಿ ನಡೆಸಿದರೆ ಪ್ರತಿದಾಳಿ ನಡೆಸುತ್ತೇವೆ: ಚೀನಾಗೆ ಎಚ್ಚರಿಕೆ ನೀಡಿದ ತೈವಾನ್

ತೈವಾನ್: ತೈವಾನ್‌ನ ಏರ್ ಡಿಫೆನ್ಸ್ ಐಡೆಂಟಿಫಿಕೇಶನ್ ಝೋನ್ (ಎಡಿಐಝಡ್) ಮೇಲೆ ಯುದ್ಧವಿಮಾನ ಹಾರಿಸಿದ ಚೀನಾಗೆ ತೈವಾನ್ ಎಚ್ಚರಿಕೆ ನೀಡಿದ್ದು, ಚೀನಾ ತೈವಾನ್ ಮೇಲೆ ದಾಳಿ ನಡೆಸಿದಲ್ಲಿ ಪ್ರತಿದಾಳಿ ನಡೆಸುವ ದಿಟ್ಟ ಸಂದೇಶ ನೀಡಿದೆ.

ಈ ಸಂಬಂಧ ತೈವಾನ್‌ನ ರಾಷ್ಟ್ರೀಯ ರಕ್ಷಣಾ ಸಚಿವಾಲಯದ ಅಧಿಕಾರಿಯೊಬ್ಬರು ಮಾತನಾಡಿದ್ದು, ಆತ್ಮ ರಕ್ಷಣೆಗಾಗಿ ಪ್ರತಿದಾಳಿ ನಡೆಸುವ ಹಕ್ಕಿದೆ. ರಕ್ಷಣಾ ಸಚಿವಾಲಯದ ಅನುಮೋದನೆಯೊಂದಿಗೆ ಈ ದಾಳಿಯನ್ನು ಎದುರಿಸಲಾಗುವುದು ಎಂದು ಅವರು ತಿಳಿಸಿದ್ದಾರೆ.

ತೈವಾನ್‌ನಲ್ಲಿ ನಡೆದ ಲೀ ಟೆಂಗ್‌ ಹೂ ಅಂತಿಮ ಗೌರವ ಸಮಾರಂಭದಲ್ಲಿ ಅಮೆರಿಕದ ವಿದೇಶಾಂಗ ಇಲಾಖೆಯ ಉನ್ನತ ಅಧಿಕಾರಿ ಕೀತ್ ಕ್ರಾಚ್ ಭಾಗವಹಿಸಿದ ಕಾರಣವನ್ನಿಟ್ಟುಕೊಂಡು ತೈವಾನ್‌ ಎಡಿಐಝಡ್ ಪ್ರದೇಶಕ್ಕೆ ವಿಮಾನಗಳನ್ನು ಚೀನಾ ರವಾನಿಸಿತ್ತು. ಶನಿವಾರ ಬೀಜಿಂಗ್‌ನಿಂದ ಮತ್ತೆ 19 ಯುದ್ಧ ವಿಮಾನಗಳು ತೈವಾನ್‌ನತ್ತ ಬಂದಿವೆ. ಚೀನಿ ವಿಮಾನಗಳು ನುಗ್ಗಿ ಬಂದಿರುವುದನ್ನು ತೈವಾನ್ ಸಹ ಒಪ್ಪಿಕೊಂಡಿದೆ. ತೈವಾನ್‌ನತ್ತ ನುಗ್ಗಿದ 19 ಯುದ್ಧ ವಿಮಾನಗಳಲ್ಲಿ 2 ಬಾಂಬರ್‌ ವಿಮಾನಗಳೂ ಇದ್ದು ಆತಂಕವನ್ನು ಹೆಚ್ಚಿಸಿದೆ. ಹೀಗಾಗಿ ಚೀನಾದ ಚಟುವಟಿಕೆಗಳ ಮೇಲೆ ನಿಗಾ ಇಡಲು ತೈವಾನ್ ವಾಯು ರಕ್ಷಣಾ ಕ್ಷಿಪಣಿಯನ್ನು ನಿಯೋಜಿಸಿದೆ. ಚೀನಾದ ವೈರಿ ಅಮೆರಿಕ ಜೊತೆಗೆ ಸಂಬಂಧ ಹೊಂದದಂತೆ ತೈವಾನ್‌ನ ವಿರುದ್ಧ ಚೀನಾ ಈ ರೀತಿಯ ದಾಳಿ ನಡೆಸುತ್ತಿದೆ.

ಇನ್ನು ತೈವಾನ್‌ನ ವಾಯುಪ್ರದೇಶದ ಒಳಕ್ಕೆ ನುಗ್ಗುವ ಚೀನಾದ ಯುದ್ಧ ವಿಮಾನಗಳಿಗೆ ಹೇಗೆ ಪ್ರತ್ಯುತ್ತರ ನೀಡಬೇಕು ಎಂಬ ಬಗ್ಗೆ ತೈವಾನ್‌ನ ಎಂಎನ್‌ಡಿ ಪಡೆ ಪೈಲಟ್‌ಗಳಿಗೆ ತರಬೇತಿ ನೀಡುತ್ತಿದೆ. ಉಭಯ ದೇಶಗಳ ನಡುವೆ ಯುದ್ಧ ನಡೆದರೆ ಗುವಾನ್ ಯುದ್ಧ ಯೋಜನೆಯನ್ನು ಅನುಸರಿಸಲು ತರಬೇತಿ ನೀಡಲಾಗುತ್ತಿದೆ. ಈ ನಡುವೆಯೂ ಚೀನಾದ ಪೈಲಟ್‌ಗಳು, ಯುದ್ಧ ವಿಮಾನಗಳನ್ನು ಪ್ರಚೋದಿಸದಂತೆ ಅವರಿಗೆ ಸೂಚನೆ ನೀಡಲಾಗಿದೆ. ಆದರೆ ಚೀನಾದಿಂದ ಗುಂಡು ಹಾರಿದರೆ ಯಾವುದೇ ಮುಲಾಜಿಲ್ಲದೆ ಪ್ರತಿದಾಳಿ ನಡೆಸುವ ಎಚ್ಚರಿಕೆಯನ್ನೂ ತೈವಾನ್‌ ಚೀನಾಗೆ ನೀಡಿದೆ.