ಮೋದಿ ಜನ್ಮದಿನದಂದು ರಾಮೇಶ್ವರಂನಿಂದ ಅಯೋಧ್ಯೆಗೆ ಹೊರಟಿದೆ ವಿಶೇಷ ರಥಯಾತ್ರೆ

ನವದೆಹಲಿ: ಅಯೋಧ್ಯೆಯಲ್ಲಿ ಭವ್ಯ ರಾಮ ಮಂದಿರ ನಿರ್ಮಾಣವಾಗುತ್ತಿರುವ ಈ ಶುಭ ಸಂದರ್ಭದಲ್ಲಿ ರಾಮಭಕ್ತರು ಮತ್ತು ಬಿಜೆಪಿ ಸಂಸದರು ಹೊಸ ರಥಯಾತ್ರೆಯನ್ನು ಆರಂಭ ಮಾಡಿದ್ದಾರೆ. ಈ ರಥಯಾತ್ರೆಯು ದಕ್ಷಿಣದ ಪವಿತ್ರ ಕ್ಷೇತ್ರ ರಾಮೇಶ್ವರನಿಂದ ಆಯೋಧ್ಯೆ ನಗರಕ್ಕೆ ಸಾಗಲಿದೆ.

ಪ್ರಧಾನಿ ನರೇಂದ್ರ ಮೋದಿ ಅವರ ಜನ್ಮದಿನವಾದ ಸೆಪ್ಟೆಂಬರ್ 17ರಂದು ರಥಯಾತ್ರೆಗೆ ಆರಂಭವನ್ನು ನೀಡಲಾಗಿದೆ. ರಾಮೇಶ್ವರಂ ದೇಗುಲದಲ್ಲಿ ವಿಶೇಷ ಪೂಜೆಯನ್ನು ನಡೆಸಿದ ಬಳಿಕ ಇದಕ್ಕೆ ಚಾಲನೆ ನೀಡಲಾಯಿತು.

ಈ ರಥಯಾತ್ರೆಯು ಅತ್ಯಂತ ಭಿನ್ನವಾಗಿರಲಿದೆ. ಶ್ರೀರಾಮ್ ಎಂದು ಬರೆಯಲ್ಪಟ್ಟ 613 ಕೆಜಿ ತೂಕವನ್ನು ಹೊಂದಿರುವ ಕಂಚಿನ ಗಂಟೆಯನ್ನು ಹೊತ್ತುಕೊಂಡು ರಥವು ಯಾತ್ರೆ ನಡೆಸಲಿದೆ. ಈ ರಥದಲ್ಲಿ ರಾಮ, ಸೀತೆ ಮತ್ತು ಲಕ್ಷ್ಮಣ ಹಾಗೂ ಹಣಮಂತನ ವಿಗ್ರಹಗಳೂ ಇರಲಿವೆ.

ಈ ಹಿಂದೆ ಬಿಜೆಪಿ ಧುರೀಣ ಎಲ್ ಕೆ ಅಡ್ವಾಣಿ ಅವರು ಅಯೋಧ್ಯೆಯಲ್ಲಿ ರಾಮ ಮಂದಿರ ನಿರ್ಮಾಣವಾಗಬೇಕು ಎಂಬ ಉದ್ದೇಶದೊಂದಿಗೆ ಕನ್ಯಾಕುಮಾರಿಯಿಂದ ಕಾಶ್ಮೀರದ ವರೆಗೆ ಐತಿಹಾಸಿಕ ರಥಯಾತ್ರೆಯನ್ನು ನಡೆಸಿದ್ದರು. ಇದೀಗ ಅಯೋಧ್ಯೆಯಲ್ಲಿ ರಾಮಮಂದಿರ ನಿರ್ಮಾಣವಾಗುತ್ತಿದೆ. ಈ ಸಂದರ್ಭದಲ್ಲೂ ರಾಮೇಶ್ವರಂ ನಿಂದ ಅಯೋಧ್ಯೆಗೆ ರಥಯಾತ್ರೆ ನಡೆಸಲಾಗುತ್ತಿದೆ.

600 ಕಿಲೋಗ್ರಾಂ ತೂಕದ ಮತ್ತೊಂದು ಕಂಚಿನ ಗಂಟೆಯನ್ನು ಎರಲ್ ರಾಮಕೃಷ್ಣ ನಾಡರ್ ಎಂಬ ವ್ಯಾಪಾರಿಯ ಅಂಗಡಿಯಲ್ಲಿ ತಯಾರಿಸಲಾಗುತ್ತಿದೆ. ಪ್ರಸ್ತಾವಿತ ರಾಮ ಮಂದಿರದಲ್ಲಿ ಆಂಧ್ರ ಮತ್ತು ಇತರ ರಾಜ್ಯಗಳ ಗಂಟೆಗಳನ್ನೂ ಕೂಡ ಸ್ಥಾಪಿಸಲಾಗುತ್ತಿದೆ.