ಮೋದಿ ಅವರ ವೋಕಲ್ ಫಾರ್ ಲೋಕಲ್ ಕರೆ : ಚೀನಾದಿಂದ ಭಾರತಕ್ಕೆ ಉತ್ಪಾದನಾ ವಹಿವಾಟು ಸ್ಥಳಾಂತರಕ್ಕೆ ಮುಂದಾದ ಲಾವಾ

ನವದೆಹಲಿ: ಪ್ರಧಾನ ಮಂತ್ರಿ ಮೋದಿ ಅವರ ವೋಕಲ್ ಫಾರ್ ಲೋಕಲ್ ಕರೆಯಿಂದ ಆಸಕ್ತಗೊಂಡಿರುವ ದೇಶೀಯ ಬ್ರ್ಯಾಂಡ್ ಲಾವಾ ತನ್ನ ಸಂಪೂರ್ಣ ಮೊಬೈಲ್ ಆರ್ ಆಂಡ್ ಡಿ ಯ ಮಾರುಕಟ್ಟೆ ವಿನ್ಯಾಸ ಮತ್ತು ಉತ್ಪಾದನೆಯನ್ನು ಚೀನಾದಿಂದ ಭಾರತಕ್ಕೆ ಮುಂದಿನ ಆರು ತಿಂಗಳುಗಳಲ್ಲಿ ಸ್ಥಳಾಂತರಿಸಲು ಸಂಸ್ಥೆ ನಿರ್ಧರಿಸಿದೆ. ಇದಕ್ಕಾಗಿ ಸುಮಾರು 800 ಕೋಟಿ ರೂ. ಗಳನ್ನು ಹೂಡಿಕೆ ಮಾಡುವ ಕುರಿತಂತೆಯೂ ಮಾಹಿತಿ ನೀಡಿದೆ.

ಲಾವಾ ತನ್ನ ಮೊಬೈಲ್ ಫೋನ್‌ಗಳ 33% ದಷ್ಟು ಉತ್ಪಾದನೆಯನ್ನು ಮೆಕ್ಸಿಕೊ, ಆಗ್ನೇಯ ಏಷ್ಯಾ, ಪಶ್ಚಿಮ ಏಷ್ಯಾ ಮತ್ತು ಆಫ್ರಿಕಾದ ಮಾರುಕಟ್ಟೆಗಳಿಗೆ ರಫ್ತು ಮಾಡುತ್ತದೆ. ಆದರೆ ಕಳೆದ ವರ್ಷ ಚೀನಾದ ಮೊಬೈಲ್ ಗಳಿಗಿಂತ ಭಾರತೀಯ ಉತ್ಪನ್ನಗಳಿಗೆ ಗಮನಾರ್ಹ ವೆಚ್ಚದ ಲಾಭವನ್ನು ಗಳಿಸಿದ ನಂತರದಲ್ಲಿ ಲಾವಾ ತನ್ನ ಸಂಸ್ಥೆಯನ್ನು ಭಾರತಕ್ಕೆ ಸ್ಥಳಾಂತರ ಮಾಡುತ್ತಿದೆ. ಇದರ ಭಾಗವಾಗಿ ಈ ಬಾರಿ 800 ಕೋಟಿ ರೂ. ಗಳನ್ನು ಹೂಡಿಕೆ ಮಾಡುವುದು ಮತ್ತು ಮುಂದಿನ 5 ವರ್ಷಗಳಿಗೆ ಸಂಬಂಧಿಸಿದಂತೆ 800 ಕೋಟಿ ರೂ. ಗಳನ್ನು ಹೂಡಿಕೆ ಮಾಡುವುದಾಗಿಯೂ ಸಂಸ್ಥೆ ತಿಳಿಸಿದೆ.

ಈ ಬಗ್ಗೆ ಮಾಹಿತಿ ನೀಡಿರುವ ಲಾವಾ ಅಧ್ಯಕ್ಷ ಮತ್ತು ವ್ಯವಸ್ಥಾಪಕ ನಿರ್ದೇಶಕ ಹರಿ ಓಂ ರೈ ಅವರು ಈ ಸ್ಥಳಾಂತರಕ್ಕೆ ಸಂಬಂಧಿಸಿದ ಅವಕಾಶವನ್ನು ಸಂಸ್ಥೆ ಕಾತರದಿಂದ ಎದುರು ನೋಡುತ್ತಿರುವುದಾಗಿ ತಿಳಿಸಿದ್ದಾರೆ. ಆ ಮೂಲಕ ಜಾಗತಿಕ ಮಾರುಕಟ್ಟೆಯಲ್ಲಿ ಹೆಚ್ಚು ಪ್ರಭಾವಶಾಲಿಯಾಗುವ ನಿಟ್ಟಿನಲ್ಲಿ, ಪೂರೈಕೆ ಹೆಚ್ಚಿಸುವ ನೆಲೆಯಲ್ಲಿಯೂ ಕಾರ್ಯ ನಿರ್ವಹಿಸಲಾಗುತ್ತಿದೆ ಎಂದು ಅವರು ತಿಳಿಸಿದ್ದಾರೆ. ಈಗಾಗಲೇ ಲಾವಾ ತನ್ನ ಹೆಸರಿನಲ್ಲಿ ಮೊಬೈಲ್ ಫೋನ್ ತಯಾರಿಕೆ ಮತ್ತು ಇತರ ಎಲೆಕ್ಟ್ರಾನಿಕ್ ಕಂಪನಿಗಳಿಗೂ ಉತ್ಪನ್ನ ತಯಾರಿಸಿಕೊಡುವ ಮೂಲಕ ಕಾರ್ಯ ನಿರ್ವಹಣೆ ಮಾಡುತ್ತಿದೆ ಎಂದು ರೈ ಮಾಹಿತಿ ನೀಡಿದ್ದಾರೆ.

ಭಾರತದಲ್ಲಿನ ಪಿಎಲ್ಐ ಯೋಜನೆ (ಪ್ರೊಡಕ್ಷನ್ ಲಿಂಕ್ಡ್ ಪ್ರೋತ್ಸಾಹಕ ಯೋಜನೆ) ಅಡಿಯಲ್ಲಿ ಅರ್ಹ ಕಂಪನಿಗಳಿಗೆ ಅದರ ಮಾರುಕಟ್ಟೆ ವ್ಯವಹಾರಕ್ಕನುಗುಣವಾಗಿ 4% ದಿಂದ 6% ವರೆಗೆ ಪ್ರೋತ್ಸಾಹ ನೀಡುತ್ತಿದೆ. ಇದರ ಪ್ರಯೋಜನವನ್ನು ಪಡೆದುಕೊಳ್ಳುವ ಸಲುವಾಗಿಯೂ ಸಂಸ್ಥೆ ಭಾರತಕ್ಕೆ ತನ್ನ ಉತ್ಪಾದನೆಯ ಸ್ಥಳಾಂತರಕ್ಕೆ ಮುಂದಾಗಿರುವುದಾಗಿ ತಿಳಿಸಿದೆ.

ಇನ್ನು ಲಾವಾ ಕಳೆದ ವಾರ ನೋಯ್ಡಾದ ತನ್ನ ಉತ್ಪಾದನಾ ಕೇಂದ್ರದಲ್ಲಿ 20% ಕ್ಕೂ ಹೆಚ್ಚು ಸಾಮರ್ಥ್ಯದಿಂದ ಮತ್ತೆ ಉತ್ಪಾದನೆ ಆರಂಭಿಸಿದೆ. ಅಧಿಕಾರಿಗಳಿಂದ ಅನುಮೋದನೆ ಪಡೆದು ಸುಮಾರು 600 ನೌಕರರನ್ನು ಬಳಸಿಕೊಂಡು ಕಾರ್ಯ ನಿರ್ವಹಿಸಲು ಆರಂಭಿಸಿದೆ.