ಮಸೀದಿಗಳಲ್ಲಿ ಆಜಾನ್­ಗೆ ಧ್ವನಿವರ್ಧಕಗಳ ಬಳಕೆ ಸಲ್ಲ : ಅಲಹಾಬಾದ್ ಹೈಕೋರ್ಟ್

ಅಲಹಾಬಾದ್: ಮಸೀದಿಗಳಲ್ಲಿ ಆಜಾನ್ ಅಥವಾ ಧಾರ್ಮಿಕ ಪ್ರಾರ್ಥನೆಗಳನ್ನು ನಡೆಸುವ ಸಂದರ್ಭದಲ್ಲಿ ಧ್ವನಿವರ್ಧಕಗಳನ್ನು ಬಳಕೆ ಮಾಡದಂತೆ ಉತ್ತರ ಪ್ರದೇಶದ ಅಲಹಾಬಾದ್‌ನಲ್ಲಿರುವ ಹೈಕೋರ್ಟ್ ಮಹತ್ವದ ಆದೇಶವನ್ನು ಹೊರಡಿಸಿದೆ. ಕೇವಲ ಮಾನವ ತನ್ನ ಸಹಜ ಧ್ವನಿಯಲ್ಲಿ ಮಾತ್ರವೇ ಪ್ರಾರ್ಥನೆಗಳನ್ನು ನಡೆಸಹುದು ಎಂದು ಕೋರ್ಟ್ ತಿಳಿಸಿದೆ.

ಕಾನೂನಿಗೆ ಸಂಬಂಧಿಸಿದಂತೆ ಜಿಲ್ಲಾಡಳಿತದ ಅನುಮತಿ ಇಲ್ಲದೆ ಯಾರೂ ಸಹ ಧ್ವನಿವರ್ಧಕಗಳನ್ನು ಬಳಕೆ ಮಾಡುವಂತಿಲ್ಲ ಎಂಬ ನಿಯಮವನ್ನು ಕೋರ್ಟ್ ಎತ್ತಿ ಹಿಡಿದಿದೆ. ಇಸ್ಲಾಂ ಧರ್ಮದ ಪ್ರಕಾರ ಆಜಾನ್ ಕೂಗುವುದು ಧಾರ್ಮಿಕ ವಿಚಾರವೇ ಇರಬಹುದು. ಆದರೆ ಅದನ್ನು ಧ್ವನಿವರ್ಧಕಗಳನ್ನು ಬಳಕೆ ಮಾಡುವ ಮೂಲಕ ಗಟ್ಟಿಯಾಗಿ, ಸಾರ್ವಜನಿಕವಾಗಿ ಕೇಳಿಸುವುದು ತಪ್ಪು. ಆರ್ಟಿಕಲ್ 25 ರ ಅಡಿಯಲ್ಲಿ ಇದು ಇತರರ ಮೂಲಭೂತ ಹಕ್ಕುಗಳಿಗೆ ಚ್ಯುತಿ ಮಾಡುವ ಅಂಶವಾಗಿದೆ. ಸಾರ್ವಜನಿಕ ಹಿತಾಸಕ್ತಿ, ಆರೋಗ್ಯ, ಸಂವಿಧಾನದಲ್ಲಿ ಸೂಚಿಸಲಾದ ಇತರ ಹಕ್ಕುಗಳನ್ನು ಗಮನದಲ್ಲಿಟ್ಟುಕೊಂಡು ಈ ಆದೇಶವನ್ನು ನೀಡಿರುವುದಾಗಿ ಕೋರ್ಟ್ ಸ್ಪಷ್ಟನೆ ನೀಡಿದೆ.

ಯಾರಿಗಾದರೂ ಕೇಳುವುದಕ್ಕೆ ಇಷ್ಟವಲ್ಲದ ಅಥವಾ ಅಗತ್ಯವಲ್ಲದ ವಿಚಾರಗಳನ್ನು ಸಾರ್ವಜನಿಕವಾಗಿ ಕೇಳುವಂತೆ ಮಾಡುವ ಕ್ರಮ ಕಾನೂನು ಬಾಹಿರ ವ್ಯವಸ್ಥೆಯಾಗಿದ್ದು, ಆ ಕಾರಣವನ್ನೂ ಗಮನದಲ್ಲಿಟ್ಟುಕೊಂಡು ಈ ಕ್ರಮಕ್ಕೆ ಮುಂದಾಗಿರುವುದಾಗಿ ಕೋರ್ಟ್ ಮಾಹಿತಿ ನೀಡಿದೆ. ಅದಾಗ್ಯೂ, ಸ್ಥಳೀಯ ಆಡಳಿತದ ಒಪ್ಪಿಗೆ ಇದ್ದರೆ ಮಾತ್ರ ಧ್ವನಿವರ್ಧಕಗಳನ್ನು ಬಳಕೆ ಮಾಡಬಹುದು ಎಂದೂ ಕೋರ್ಟ್ ಈ ವಿಚಾರವಾಗಿ ಪಿರ್ಯಾದು ಸಲ್ಲಿಸಿದ ಬಿಎಸ್ಪಿ ಸಂಸದ ಅಪ್ಜಲ್ ಅನ್ಸಾರಿ ಅವರಿಗೆ ತಿಳಿಸಿದೆ.

ಇನ್ನು ನ್ಯಾಯಮೂರ್ತಿ ಶಶಿಕಾಂತ ಗುಪ್ತ ಮತ್ತು ನ್ಯಾಯಮೂರ್ತಿ ಅಜಿತ್ ಕುಮಾರ್ ಅವರನ್ನೊಳಗೊಂಡ ವಿಭಾಗೀಯ ಪೀಠ ಈ ಆದೇಶವನ್ನು ಹೊರಡಿಸಿದೆ.

ಕೊರೋನಾ ಸಂಕಷ್ಟದಿಂದ ಪಾರಾಗಲು ಯೋಗಿ ಸರ್ಕಾರ ಅನೇಕ ಕ್ರಮಗಳನ್ನು ಜಾರಿಗೆ ತಂದಿದ್ದರೂ, ಕೆಲವು ದಿನಗಳ ಹಿಂದೆ ಘಾಜಿಪುರದ ಮಸೀದಿಗಳ ಧ್ವನಿವರ್ಧಕಗಳ ಬಳಕೆಯ ಕಾರಣದಿಂದಲೇ ಜನರು ಗುಂಪುಗೂಡಿದ್ದರು. ಇದರಿಂದಾಗಿ ಕೊರೋನಾ ಸೋಂಕು ವ್ಯಾಪಕವಾಗಿ ಹರಡಿತ್ತು. ಅನಂತರದಲ್ಲಿ ಸರ್ಕಾರ ಘಾಜಿಪುರವನ್ನು ಹಾಟ್ಸ್ಪಾಟ್ ಆಗಿಯೂ ಗುರುತಿಸಿತ್ತು. ಈ ಹಿನ್ನೆಲೆಯಲ್ಲಿ ಇಲ್ಲಿನ ಮಸೀದಿಗಳು ಧ್ವನಿವರ್ಧಕಗಳನ್ನು ಬಳಕೆ ಮಾಡದಂತೆ ಸೂಚಿಸಲಾಗಿತ್ತು. ಇದೀಗ ಹೈಕೋರ್ಟ್ ಸಹ ಧ್ವನಿವರ್ಧಕಗಳನ್ನು ಬಳಕೆ ಮಾಡದಂತೆ ಆದೇಶ ನೀಡಿದೆ.