ಸೋಂಕು ನಿವಾರಣೆಗೆ ಸ್ಪ್ರೇಯರ್‌ಗಳನ್ನೊಳಗೊಂಡ ಎಲೆಕ್ಟ್ರಿಕ್ ವಾಹನಗಳನ್ನು ಸಿದ್ಧಪಡಿಸಿದ ಕೈನೆಟಿಕ್

ಮುಂಬೈ: ವೈರಾಣು ಮುಕ್ತಗೊಳಿಸುವ ಸಲುವಾಗಿ ಪುಣೆಯ ಕೈನೆಟಿಕ್ ಗ್ರೀನ್ ಎನರ್ಜಿ ಆಂಡ್ ಪವರ್ ಸೊಲ್ಯೂಷನ್ಸ್ ಲಿ. ಸೋಂಕು ನಿವಾರಕ ಹೊಸ ಎಲೆಕ್ಟ್ರಿಕ್ ವಾಹನಗಳನ್ನು ತಯಾರಿಸಿದೆ. ಕೊಳಚೆ ಪ್ರದೇಶ, ಕೈಗಾರಿಕಾ ವಲಯ, ಆಸ್ಪತ್ರೆ, ಕಾರ್ಖಾನೆ, ವಸತಿ ಪ್ರದೇಶಗಳನ್ನು ವೈರಾಣು ಮುಕ್ತ ಪ್ರದೇಶಗಳನ್ನಾಗಿ ಮಾಡಲು ಪೂರಕವಾಗಿ ಕೆಲಸ ಮಾಡುವಂತೆ ಕೈನೆಟಿಕ್ ಇ- ಫಾಗರ್, ಇ- ಸ್ಪ್ರೇಯರ್­ಗಳನ್ನೊಳಗೊಂಡಂತೆ ಮೂರು ವಿಧದ ವಾಹನಗಳನ್ನು ಕೈನೆಟಿಕ್ ಸಂಸ್ಥೆ ಪರಿಚಯಿಸಿದೆ.

ಈ ವಾಹನಗಳು ಹೊರಾಂಗಣದ ಜೊತೆಗೆ ಕಛೇರಿಯಂತಹ ಒಳಾಂಗಣ ಪ್ರದೇಶದಲ್ಲಿಯೂ ಸೋಂಕು ನಿವಾರಣೆಗೆ ಸೂಕ್ತವಾದ ಪೋರ್ಟೆಬಲ್ ಯುವಿ ಸ್ಯಾನಿಟೈಸರ್­ಗಳನ್ನು ಸಾಗಿಸಬಲ್ಲದು. ಜೊತೆಗೆ ವಾತಾವರಣದಲ್ಲಿರುವ ಸೋಂಕು ಹರಡುವ ವೈರಾಣುಗಳನ್ನು ಸಮರ್ಥವಾಗಿ ಎದುರಿಸಬಲ್ಲದಾಗಿದೆ.

ಈ ಬಗ್ಗೆ ಮಾಹಿತಿ ನೀಡಿರುವ ಸಂಸ್ಥೆಯ ಸಿಇಒ ಸುಲಜ್ಜಾ ಫಿರೋದಿಯಾ ‘ಈ ವಾಹನಗಳನ್ನು ಪರಿಚಯಿಸಲು ಸಂಸ್ಥೆ ಖುಷಿ ಪಡುತ್ತದೆ. ಇದು ಹಾನಿಕಾರಕ ವೈರಸ್ ಮುಕ್ತ ಪರಿಸರ ಸೃಷ್ಟಿಸಲು ಪೂರಕವಾಗಿ ಕಾರ್ಯ ನಿರ್ವಹಿಸುತ್ತದೆ. ಅಲ್ಲದೆ ವೈರಸ್ ತಡೆಗೂ ಇದು ಸಹಕಾರಿಯಾಗಿದೆ. ಈ ವಾಹನಗಳನ್ನು ಶೀಘ್ರದಲ್ಲೇ ಸರ್ಕಾರ, ಮುನ್ಸಿಪಲ್ ಕಾರ್ಪೊರೇಶನ್­ಗೆ ನೀಡಲು ಬಯಸುವುದಾಗಿಯೂ ಅವರು ಮಾಹಿತಿ ನೀಡಿದ್ದಾರೆ. ಈ ವಾಹನಗಳ ಮೂಲಕ ಅಗತ್ಯ ಪ್ರದೇಶಗಳನ್ನು ಸೋಂಕುಮುಕ್ತಗೊಳಿಸಲು ನೆರವಾಗುವುದಾಗಿಯೂ ಅವರು ಹೇಳಿದ್ದಾರೆ.

ಕೈನೆಟಿಕ್ ಇ-ಫಾಗರ್­ನೊಂದಿಗೆ, ಕಂಪನಿಯು ಥರ್ಮಲ್ ಫಾಗಿಂಗ್ ಬದಲಿಗೆ ಕೋಲ್ಡ್ ಫಾಗಿಂಗ್ ಅನ್ನು ಬಳಸುವ ವಾಟರ್-ಬಾಸ್ರ್ಡ್ ಫಾಗಿಂಗ್ ಪರಿಹಾರವನ್ನು ಅಭಿವೃದ್ಧಿಪಡಿಸಿದೆ. ಇದು ಡಿಸೇಲ್ ಬದಲಾಗಿ ನೀರನ್ನು ಬಳಕೆ ಮಾಡಿಕೊಂಡು ಪರಿಣಾಮಕಾರಿಯಾಗಿ ಕಾರ್ಯ ನಿರ್ವಹಿಸಲಿದೆ. ಇನ್ನು ಈ ವಾಹನಗಳು ಮೂರು ಚಕ್ರಗಳದ್ದಾಗಿದ್ದು, ಕಡಿಮೆ ಸ್ಥಳಾವಕಾಶದಲ್ಲಿಯೂ ಹೆಚ್ಚು ಪರಿಪೂರ್ಣವಾಗಿ ಕೆಲಸ ಮಾಡಲಿದೆ ಎಂದು ಸಂಸ್ಥೆ ಅಭಿಪ್ರಾಯ ಪಟ್ಟಿದೆ. ಇ-ಫಾಗರ್ ಮತ್ತು ಇ-ಸ್ಪ್ರೇಯರ್ ಕಿ.ಮೀ. ಗೆ 50 ಪೈಸೆಗಳ ನಿರ್ವಹಣಾ ವೆಚ್ಚವನ್ನು ಹೊಂದಿದೆ. ಇನ್ನು ಒಳಾಂಗಣ ಪ್ರದೇಶದಲ್ಲಿ ವೈರಸ್ ಮುಕ್ತಗೊಳಿಸಲು ಅತಿ ನೇರಳೆ ಕಿರಣಗಳನ್ನು ಬಳಸಿ ಕಾರ್ಯ ನಿರ್ವಹಿಸುವ ಯುವಿ ಸ್ಯಾನಿಟೈಸರ್ ಅನ್ನು ಬಳಕೆ ಮಾಡಬಹುದಾಗಿದೆ.

ಇ-ಫಾಗರ್­ಗಳನ್ನು ಈಗಾಗಲೇ ಉತ್ತರ ಪ್ರದೇಶ, ಮಹಾರಾಷ್ಟ್ರಗಳಲ್ಲಿಯೂ ಬಳಕೆ ಮಾಡಲಾಗುತ್ತದೆ. ಇನ್ನು ಇದರ ವ್ಯಾಪ್ತಿ ಹೆಚ್ಚಿಸಲು ಕಂಪನಿಯು ಬೇರೆ ಬೇರೆ ನಗರಗಳ ಸಂಸ್ಥೆಗಳ ಜೊತೆಗೂ ಮಾತುಕತೆ ನಡೆಸುತ್ತಿರುವುದಾಗಿ ತಿಳಿಸಿದೆ.