ಅಯೋಧ್ಯಾದಲ್ಲಿ ರಾಮ ಮಂದಿರ ನಿರ್ಮಾಣಕ್ಕೆ ಇಟ್ಟಿಗೆ ನೀಡಿದ್ದ 1.25 ಲಕ್ಷ ಗ್ರಾಮಗಳಿಗೆ ಭೇಟಿ ನೀಡಲಿದೆ ವಿಹೆಚ್­ಪಿ 

ನವದೆಹಲಿ: ಅಯೋಧ್ಯೆಯಲ್ಲಿ ರಾಮ ದೇವಾಲಯ ನಿರ್ಮಾಣ ಮಾಡುವ ಉತ್ಸಾಹವನ್ನು ಪುನರುಜ್ಜೀವನಗೊಳಿಸುವ ಸಲುವಾಗಿ, ವಿಶ್ವ ಹಿಂದೂ ಪರಿಷತ್ (ವಿಎಚ್‌ಪಿ) ತೊಂಬತ್ತರ ದಶಕದಲ್ಲಿ ರಾಮ ದೇಗುಲ ಚಳುವಳಿಯ ಉತ್ತುಂಗದಲ್ಲಿ ದೇವಾಲಯಕ್ಕೆ ಇಟ್ಟಿಗೆಗಳನ್ನು ಕೊಡುಗೆ ನೀಡಿದ 2.75 ಲಕ್ಷ ಗ್ರಾಮಗಳಿಗೆ ಭೇಟಿ ನೀಡಲಿದೆ.

ಈ ಗ್ರಾಮಗಳಿಗೆ ತೆರಳಿ, ದೇವಾಲಯಕ್ಕೆ ನೀಡಿದ ಕೊಡುಗೆಯ ಸಂಕೇತವಾಗಿ ತಮ್ಮ ಮನೆಗಳಲ್ಲಿ ಶ್ರೀ ರಾಮನ ವಿಗ್ರಹವನ್ನು ಸ್ಥಾಪಿಸುವಂತೆ ವಿಹೆಚ್­ಪಿ  ಕಾರ್ಯಕರ್ತರು ಮನವಿಯನ್ನು ಮಾಡಿಕೊಳ್ಳಲಿದ್ದಾರೆ.

ವಿಹೆಚ್­ಪಿ ರಾಷ್ಟ್ರೀಯ ವಕ್ತಾರ ವಿನೋದ್ ಬನ್ಸಾಲ್ ಅವರು ಈ ಬಗ್ಗೆ ಮಾಹಿತಿಯನ್ನು ನೀಡಿದ್ದು, “ಈ ಅಭಿಯಾನವು ಮಾರ್ಚ್ 25 ರಿಂದ ಪ್ರಾರಂಭವಾಗಲಿದೆ (ಇದು ಹಿಂದೂ ಕ್ಯಾಲೆಂಡರ್ ಪ್ರಕಾರ ಹೊಸ ವರ್ಷ) ಮತ್ತು ಏಪ್ರಿಲ್ 8 ರಂದು ರಾಮನವಮಿವರೆಗೆ ಮುಂದುವರಿಯುತ್ತದೆ” ಎಂದು ಹೇಳಿದ್ದಾರೆ.

ರಾಮ ದೇಗುಲದ ನಿರ್ಮಾಣಕ್ಕಾಗಿ ಸುಪ್ರೀಂ ಕೋರ್ಟ್ ಸಮ್ಮತಿ  ನೀಡಿದ ಎರಡು ತಿಂಗಳ ನಂತರ ವಿಹೆಚ್­ಪಿಯ ಈ ನಿರ್ಧಾರವನ್ನು ತೆಗೆದುಕೊಂಡಿದೆ.

ವಿಹೆಚ್­ಪಿ ನಾಯಕನ ಪ್ರಕಾರ,” ಈ ಅಭಿಯಾನದ ಅವಧಿಯನ್ನು ರಾಮೋತ್ಸವ ಎಂದು ಆಚರಿಸಲಾಗುತ್ತದೆ. ಈ ಬಾರಿ ಇದನ್ನು ವಿಜೃಂಭಣೆಯಿಂದ ನಡೆಸಲಾಗುತ್ತದೆ. ವಿಹೆಚ್­ಪಿ ಕಾರ್ಯಕರ್ತರು 1.25 ಲಕ್ಷ ಹಳ್ಳಿಗಳಿಗೆ ತೆರಳಲಿದ್ದಾರೆ. ರಾಮ ಮಂದಿರ  ಚಳವಳಿಯ ಉತ್ತುಂಗದಲ್ಲಿ ಮಂದಿರ ನಿರ್ಮಾಣಕ್ಕೆ ಇಟ್ಟಿಗೆ ಮತ್ತು ದೇಣಿಗೆ ನೀಡಿದ ಪ್ರತಿ ಹಿಂದೂ ಮನೆಯನ್ನೂ ತಲುಪುವುದು ಇವರ ಉದ್ದೇಶವಾಗಿದೆ. “ಎಂದಿದ್ದಾರೆ.

ಈ ಮಂದಿರ ಹಲವಾರು ಹಿಂದೂಗಳ ನಂಬಿಕೆಯೊಂದಿಗೆ ಬೆಸೆದುಕೊಂಡಿದೆ, ಹೀಗಾಗಿ ಇದನ್ನು ದೇಣಿಗೆಯೊಂದಿಗೆ ನಿರ್ಮಿಸಬೇಕು ಎಂದು ಬನ್ಸಾಲ್ ಹೇಳಿದ್ದಾರೆ. “ನಾವು 1989 ರಲ್ಲಿ ಮಾಡಿದಂತೆ ಮತ್ತೊಮ್ಮೆ ಸಾರ್ವಜನಿಕರಿಂದ ಹಣವನ್ನು ಸಂಗ್ರಹಿಸುವ ನಿರೀಕ್ಷೆಯಿದೆ” ಎಂದು ಅವರು ಹೇಳಿದ್ದಾರೆ.

ಅಭಿಯಾನದ ವೇಳೆ, ವಿಹೆಚ್­ಪಿ ಸಣ್ಣ ಮತ್ತು ದೊಡ್ಡ ದೇವಾಲಯಗಳಲ್ಲಿ ಕಾರ್ಯಕ್ರಮಗಳನ್ನು ಆಯೋಜಿಸಲಿದೆ, ಅದೇ ಸಮಯದಲ್ಲಿ ಬಡವರಿಗೆ ಮತ್ತು ನಿರ್ಗತಿಕರಿಗೆ ಸಹಾಯ ಮಾಡಲಿದೆ ಎಂದು ಅವರು ಹೇಳಿದ್ದಾರೆ.