ಸುಪ್ರೀಂ ಆದೇಶದಂತೆ ಪ್ರಸ್ತಾಪಿತ ಮಸೀದಿಗೆ ಭೂಮಿಯನ್ನು ಶಾರ್ಟ್ ಲಿಸ್ಟ್ ಮಾಡಿದ ಯೋಗಿ

ಲಕ್ನೋ: ರಾಮ ಜನ್ಮಭೂಮಿ-ಬಾಬರಿ ಮಸೀದಿ ತೀರ್ಪಿನಲ್ಲಿ ಸುಪ್ರೀಂ ಕೋರ್ಟ್ ನೀಡಿರುವ ಐದು ಎಕರೆ ಭೂ ಪ್ರಸ್ತಾಪವನ್ನು ಸ್ವೀಕರಿಸುವ ಬಗ್ಗೆ ಸುನ್ನಿ ಕೇಂದ್ರ ವಕ್ಫ್ ಮಂಡಳಿ ಇನ್ನೂ ತೀರ್ಮಾನವನ್ನು ತೆಗೆದುಕೊಂಡಿಲ್ಲ, ಆದರೆ ಉತ್ತರಪ್ರದೇಶದ ಯೋಗಿ ಆದಿತ್ಯನಾಥ್ ಸರ್ಕಾರವು ಉದ್ದೇಶಿತ ಮಸೀದಿಗೆ ಐದು ಎಕರೆ ಭೂಮಿಯನ್ನು ಶಾರ್ಟ್‌ಲಿಸ್ಟ್ ಮಾಡಿದೆ.

ಭವಿಷ್ಯದಲ್ಲಿ ಯಾವುದೇ ಸಂಘರ್ಷ ಉಂಟಾಗದಂತೆ ನೋಡಿಕೊಳ್ಳುವ ಸಲುವಾಗಿ ಪ್ರಸ್ತಾಪಿತ ಮಸೀದಿಯನ್ನು ಸುರಕ್ಷತೆಯೊಂದಿಗೆ, ಬದ್ಧತೆಯೊಂದಿಗೆ ನಿರ್ಮಾಣ ಮಾಡಲು ಯೋಗಿ “ಪಂಚಕೋಸಿ ಪರಿಕ್ರಮ” ಮಿತಿಯಿಂದ ಹೊರಗಡೆಯ ಭೂಮಿಯನ್ನು ಶಾರ್ಟ್ ಲಿಸ್ಟ್ ಮಾಡಿದ್ದಾರೆ.

ಮಳೆಗಾಲದಲ್ಲಿ ಅಯೋಧ್ಯೆಯಲ್ಲಿ ಎರಡು ದಿನಗಳ ಅವಧಿಯಲ್ಲಿ ಪಂಚಕೋಸಿ ಪರಿಕ್ರಮವನ್ನು ನಡೆಸಲಾಗುತ್ತದೆ. ಭಕ್ತರು ಮೊದಲು ಸರಯು ನದಿಯಲ್ಲಿ ಪವಿತ್ರ ಸ್ನಾನ ಮಾಡಿ ನಂತರ ನಗರದ ಪರಿಧಿಯಲ್ಲಿ 15 ಕಿ.ಮೀ ದೂರದಲ್ಲಿ ಪರಿಕ್ರಮ ಮಾಡುತ್ತಾರೆ. ಈ ಕಾರ್ಯಕ್ರಮದಲ್ಲಿ ಎರಡು ಲಕ್ಷಕ್ಕೂ ಹೆಚ್ಚು ಭಕ್ತರು ಮತ್ತು ಪ್ರಯಾಗ ರಾಜ್, ಹರಿದ್ವಾರ, ಮಥುರಾ ಮತ್ತು ಕಾಶಿಯ 50,000 ಸಂತರು  ಭಾಗವಹಿಸುತ್ತಾರೆ ಎಂದು ಹೇಳಲಾಗಿದೆ.

ಅಧಿಕೃತ ಮೂಲಗಳ ಪ್ರಕಾರ, ರಾಜ್ಯ ಸರ್ಕಾರವು ಅಯೋಧ್ಯೆ-ಫೈಜಾಬಾದ್ ರಸ್ತೆ, ಅಯೋಧ್ಯೆ-ಬಸ್ತಿ ರಸ್ತೆ, ಅಯೋಧ್ಯೆ-ಸುಲ್ತಾನಪುರ ರಸ್ತೆ ಮತ್ತು ಅಯೋಧ್ಯೆ-ಗೋರಖ್‌ಪುರ ರಸ್ತೆಯಲ್ಲಿ ನಾಲ್ಕು ಸ್ಥಳಗಳನ್ನು ಮಸೀದಿಗಾಗಿ ಗುರುತಿಸಿದೆ. 5ನೇ ಸ್ಥಳವನ್ನು ಪರಿಕ್ರಮ ಮಾರ್ಗದಿಂದ ದೂರದಲ್ಲಿರುವ ಹೆದ್ದಾರಿಯಲ್ಲಿ ಪ್ರಸ್ತಾಪಿಸಲಾಗಿದೆ.

“ಪ್ರಸ್ತಾವಿತ ತಾಣಗಳ ವಿವರಗಳನ್ನು ಅನುಮೋದನೆ ಮತ್ತು ತೆರವಿಗಾಗಿ ಕೇಂದ್ರಕ್ಕೆ ಕಳುಹಿಸಲಾಗಿದೆ. ಎಲ್ಲಾ ಸೈಟ್‌ಗಳಿಗೆ ಸುಲಭ ಪ್ರವೇಶವಿದೆ ಎಂದು ನಾವು ಖಚಿತಪಡಿಸಿದ್ದೇವೆ” ಎಂದು ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

ಅಲ್ ಇಂಡಿಯಾ ಮುಸ್ಲಿಂ ವೈಯಕ್ತಿಕ ಕಾನೂನು ಮಂಡಳಿ (ಎಐಎಂಪಿಎಲ್ಬಿ), ಬಾಬರಿ ಮಸೀದಿ ಕ್ರಿಯಾ ಸಮಿತಿ ಮತ್ತು ಜಮೈತ್ ಉಲೇಮಾ-ಇ-ಹಿಂದ್ ಸೇರಿದಂತೆ ಮುಸ್ಲಿಂ ಪಕ್ಷಗಳು ನೆಲಸಮವಾದ ಬಾಬರಿ ಮಸೀದಿಗೆ ಬದಲಾಗಿ ಹೊಸ ಮಸೀದಿಗೆ ಐದು ಎಕರೆ ಭೂಮಿಯನ್ನು ನೀಡುವುದನ್ನು ಈಗಾಗಲೇ ತಿರಸ್ಕರಿಸಿದೆ

ಆದರೆ ಸುಪ್ರೀಂಕೋರ್ಟ್ ಆಜ್ಞೆಯಂತೆ ಯೋಗಿ ಆದಿತ್ಯನಾಥ ಅವರು ಭೂಮಿ ನೀಡುವ ಪ್ರಕ್ರಿಯೆಯನ್ನು ಆರಂಭಿಸಿದ್ದಾರೆ.