13 ಗಂಟೆ ಹಿಮ್ಮುಖವಾಗಿ ಓಡಿ ಗಿನ್ನೆಸ್ ದಾಖಲೆಗೆ ಪ್ರಯತ್ನಿಸಿದ ಗುಜರಾತಿನ ಇಬ್ಬರು ಮಹಿಳೆಯರು

ಅಹ್ಮದಾಬಾದ್ : ಮಹಾತ್ಮ ಗಾಂಧಿಯವರ 150 ನೇ ಜನ್ಮ ವರ್ಷಾಚರಣೆಯಂದು ಗುಜರಾತಿನ ಬಾರ್ಡೋಲಿಯ ಇಬ್ಬರು ಮಹಿಳೆಯರು 13 ಗಂಟೆಗಳಲ್ಲಿ ಒಟ್ಟು 53 ಕಿಲೋಮೀಟರ್ ಓಟವನ್ನು ಪೂರ್ಣಗೊಳಿಸಿದ್ದಾರೆ. ಇವರು ಪೂರ್ಣ ಓಟವನ್ನು ಹಿಮ್ಮುಖವಾಗಿ ಓಡಿದ್ದು ವಿಶೇಷ.

ಟಿ-ಶರ್ಟ್ಸ್ ಮತ್ತು ಟ್ರ್ಯಾಕ್ ಪ್ಯಾಂಟ್­ ಧರಿಸಿ ಓಟ ಪ್ರಾರಂಭಿಸಿದ ಟ್ವಿಂಕಲ್ ಠಾಕರ್ ಮತ್ತು ಸ್ವಾತಿ ಠಾಕರ್ ಅವರು, ಬಾರ್ಡೋಲಿಯಿಂದ ಮಂಗಳವಾರ ಸಂಜೆ 5 ಗಂಟೆ ಸುಮಾರಿಗೆ ತಮ್ಮ ಓಟವನ್ನು ಪ್ರಾರಂಭಿಸಿದರು ಮತ್ತು ಮರುದಿನ ರಾತ್ರಿ 9 ಗಂಟೆಗೆ ದಂಡಿಯಲ್ಲಿ ಮುಗಿಸಿದರು. ಈ ಜೋಡಿ ಗಿನ್ನೆಸ್ ವಿಶ್ವ ದಾಖಲೆಯಲ್ಲಿ ಸ್ಥಾನ ಪಡೆಯಲು ಪ್ರಯತ್ನಿಸಿದ್ದು, ತಮ್ಮ ಓಟದ ದೃಶ್ಯಗಳನ್ನು ಸಂಸ್ಥೆಗೆ ಕಳುಹಿಸಿದ್ದಾರೆ.

ಮಹಿಳಾ ಸಬಲೀಕರಣಕ್ಕಾಗಿ ಪ್ರಧಾನಿ ನರೇಂದ್ರ ಮೋದಿಯವರು ನೀಡಿದ ಸಂದೇಶದಿಂದ ಇವರು ಪ್ರೇರಿತರಾಗಿದ್ದು, ಇತರ ಮಹಿಳೆಯರು ತಮ್ಮ ಕೌಶಲ್ಯಗಳನ್ನು ಪ್ರದರ್ಶಿಸಲು ಮುಂದಾಗುವಂತೆ ಪ್ರೋತ್ಸಾಹಿಸಲು ಬಯಸಿ ಇವರು ಈ ಓಟವನ್ನು ಕೈಗೊಂಡಿದ್ದೇವೆ ಎನ್ನುತ್ತಾರೆ.

“ಮೊದಲಿಗೆ ನಾವು ಈ ಕಾರ್ಯವನ್ನು ಪೂರ್ಣಗೊಳಿಸುವ ಬಗ್ಗೆ ವಿಶ್ವಾಸ ಹೊಂದಿರಲಿಲ್ಲ, ಆದರೆ ನಂತರ ನಮ್ಮ ಕುಟುಂಬ ಸದಸ್ಯರು ನಮ್ಮನ್ನು ಪ್ರೇರೇಪಿಸಿದರು. ಮಹಿಳೆಯರು ಮುಂದೆ ಬಂದು ಅವರ ಕೌಶಲ್ಯಗಳನ್ನು ಪ್ರದರ್ಶಿಸುವಂತೆ ಪ್ರೇರೇಪಿಸುವುದು ನಮ್ಮ ಉದ್ದೇಶವಾಗಿತ್ತು. ಪ್ರತಿಯೊಬ್ಬ ಮಹಿಳೆಯಲ್ಲೂ ಕೆಲವು ಗುಣಗಳಿರುತ್ತವೆ, ಅವರಿಗೆ ಮುಂದೆ ಬರಲು ಒಬ್ಬರ ಬೆಂಬಲ ಬೇಕಾಗುತ್ತದೆ” ಎಂದು ಟ್ವಿಂಕಲ್ ಹೇಳುತ್ತಾರೆ.

ಸ್ವಾತಿ ಠಾಕರ್ ಕೂಡ ತಮ್ಮ ಅನುಭವದ ಬಗ್ಗೆ ಮಾತನಾಡುತ್ತಾ, “ಪ್ರಧಾನಿ ನರೇಂದ್ರ ಮೋದಿ ಮಹಿಳಾ ಸಬಲೀಕರಣಕ್ಕೆ ಒತ್ತು ನೀಡಿದ ನಂತರ ನಾವು ಈ ಕಾರ್ಯವನ್ನು ಕೈಗೆತ್ತಿಕೊಂಡಿದ್ದೇವೆ. ನಮ್ಮ ಪ್ರಧಾನಿ ಮಹಿಳಾ ಸಬಲೀಕರಣದ ಕುರಿತು ಕಾರ್ಯಕ್ರಮಗಳನ್ನು ನಡೆಸುತ್ತಿದ್ದಾರೆ. ನಮ್ಮ ಕಾರ್ಯವು ಈ ಕಾರ್ಯಕ್ರಮಗಳಿಗೆ ಅನುಗುಣವಾಗಿತ್ತು. ನಮ್ಮ ಈ ಕಾರ್ಯದಿಂದ ಹಲವು ಮಹಿಳೆಯರು ಪ್ರೇರಿತಗೊಂಡು ತಮ್ಮ ಕೌಶಲ್ಯಗಳನ್ನು ಪ್ರದರ್ಶಿಸಬೇಕೆಂಬ ಆಶಯ ನಮ್ಮದು” ಎಂದು ಹೇಳಿದರು.

ಪ್ರಧಾನ ಮಂತ್ರಿ ನರೇಂದ್ರ ಮೋದಿ ತಮ್ಮ ಮಾಸಿಕ ರೇಡಿಯೋ ಕಾರ್ಯಕ್ರಮ ಮನ್ ಕಿ ಬಾತ್­ನಲ್ಲಿ ಹೆಣ್ಣುಮಕ್ಕಳು ರಾಷ್ಟ್ರಕ್ಕೆ ನೀಡುವ ಕೊಡುಗೆಯನ್ನು ಗೌರವಿಸುವ ಸಲುವಾಗಿ ಭಾರತ್ ಕಿ ಲಕ್ಷ್ಮೀ (#BharatkiLaxmi) ಹ್ಯಾಶ್ಟ್ಯಾಗ್ ಬಳಸಿ ಸಾಮಾಜಿಕ ಜಾಲತಾಣಗಳಲ್ಲಿ ನವರಾತ್ರಿ, ದೀಪಾವಳಿಯ ಸಂದರ್ಭದಲ್ಲಿ ವಿಷಯಗಳನ್ನು ಹಂಚಿಕೊಳ್ಳಲು ಮೋದಿ ಕರೆ ನೀಡಿದ್ದರು.