ಧನೋವಾ ನಿವೃತ್ತಿ : ವಾಯುಸೇನೆಯ ಮುಖ್ಯಸ್ಥರಾಗಿ ಭದೌರಿಯಾ ಅಧಿಕಾರ ಸ್ವೀಕಾರ

ನವದೆಹಲಿ: ಭಾರತೀಯ ವಾಯುಪಡೆಯ ನೂತನ ಮುಖ್ಯಸ್ಥರಾಗಿ ಏರ್ ಚೀಫ್ ಮಾರ್ಷಲ್ ರಾಕೇಶ್ ಕುಮಾರ್ ಸಿಂಗ್ ಭದೌರಿಯಾ ಸೋಮವಾರ ಅಧಿಕಾರವನ್ನು ವಹಿಸಿಕೊಂಡರು.

ಏರ್ ಚೀಫ್ ಮಾರ್ಷಲ್ ಬಿರೆಂದರ್ ಸಿಂಗ್ ಧನೋವಾ ಅವರ ನಿವೃತ್ತಿಯ ಹಿನ್ನಲೆಯಲ್ಲಿ ಭದೌರಿಯಾ ಅವರು ಮುಖ್ಯಸ್ಥ ಸ್ಥಾನವನ್ನು ವಹಿಸಿಕೊಂಡಿದ್ದಾರೆ.  ನಾಲ್ಕು ದಶಕಗಳ ಕಾಲ ಸೇನೆಗೆ ಸೇವೆಯನ್ನು ಸಲ್ಲಿಸಿರುವ ಧನೋವಾ ಅವರು ಸೇವೆಯಿಂದ ನಿವೃತ್ತರಾದರು.

“ಬಿರೆಂದರ್ ಸಿಂಗ್ ಧನೋವಾ ನವದೆಹಲಿಯ ರಾಷ್ಟ್ರೀಯ ಯುದ್ಧ ಸ್ಮಾರಕದಲ್ಲಿ ನಡೆದ ಸಾಂಪ್ರದಾಯಿಕ ಮಾಲಾರ್ಪಣೆ ಸಮಾರಂಭದೊಂದಿಗೆ ನಿವೃತ್ತರಾದರು. ಆರ್.ಕೆ.ಎಸ್. ಭದೌರಿಯಾ ಇಂದು ವಾಯುಸೇನೆಯ ಹೊಸ ಮುಖ್ಯಸ್ಥರಾಗಿ ಅಧಿಕಾರ ವಹಿಸಿಕೊಂಡಿದ್ದಾರೆ” ಎಂದು ಐಎಎಫ್ ವಕ್ತಾರರು ತಿಳಿಸಿದ್ದಾರೆ.

ಏರ್ ಚೀಫ್ ಮಾರ್ಷಲ್ ಭದೌರಿಯಾ ಅವರನ್ನು ಜೂನ್ 1980 ರಲ್ಲಿ ಐಎಎಫ್‌ನ ಫೈಟರ್ ಸ್ಟ್ರೀಮ್‌ಗೆ ನಿಯೋಜಿಸಲಾಯಿತು. ಐಎಎಫ್‌ನ ವಿವಿಧ ವಿಮಾನಗಳನ್ನು ಹಾರಿಸುವ ಪ್ರಾವೀಣ್ಯತೆಯನ್ನು ಅವರು ಪಡೆದುಕೊಂಡಿದ್ದಾರೆ. ಅಲ್ಲದೇ ಅವರು, ಎಕ್ಸ್ಪರಿಮೆಂಟಲ್ ಟೆಸ್ಟ್ ಪೈಲಟ್, ಕ್ಯಾಟ್ ‘ಎ’ ಅರ್ಹತೆ ಪಡೆದ ಫ್ಲೈಯಿಂಗ್ ಇನ್­ಸ್ಟ್ರಕ್ಟರ್ ಮತ್ತು ಪೈಲಟ್ ಅಟ್ಯಾಕ್ ಇನ್­ಸ್ಟ್ರಕ್ಟರ್ ಆಗಿದ್ದಾರೆ.

ನ್ಯಾಷನಲ್ ಡಿಫೆನ್ಸ್ ಅಕಾಡೆಮಿಯ ಹಳೆಯ ವಿದ್ಯಾರ್ಥಿಯಾಗಿರುವ  ಅವರು, ಅಲ್ಲಿ ಅರ್ಹತೆಯ ಒಟ್ಟಾರೆ ಕ್ರಮದಲ್ಲಿ ಪ್ರಥಮ ಸ್ಥಾನ ಪಡೆದಿದ್ದಕ್ಕಾಗಿ ‘ಸ್ವೋರ್ಡ್ ಆಫ್ ಹಾನರ್’ ಗೆದ್ದುಕೊಂಡಿದ್ದರು. ಅವರನ್ನು 1980ರ ಜೂನ್ ತಿಂಗಳಿನಲ್ಲಿ ಐಎಎಫ್‌ನ ಫೈಟರ್ ಸ್ಟ್ರೀಮ್‌ಗೆ ನಿಯೋಜಿಸಲಾಯಿತು.