ಒಂದು ವಾರಗಳ ಭೇಟಿಗಾಗಿ ಯುಎಸ್­ಗೆ ತೆರಳಿದ ಮೋದಿ

ನವದೆಹಲಿ: ಪ್ರಧಾನಿ ನರೇಂದ್ರ ಮೋದಿಯವರು ಒಂದು ವಾರಗಳ ಸುದೀರ್ಘ ಭೇಟಿಗಾಗಿ ಅಮೆರಿಕಾಗೆ ಪ್ರಯಾಣಿಸಿದ್ದಾರೆ. ದ್ವಿಪಕ್ಷೀಯ ಬಾಂಧವ್ಯಗಳನ್ನು ವೃದ್ಧಿ ಮಾಡುವುದು ಮತ್ತು ಭಾರತ ವೈವಿಧ್ಯಮಯ ಅವಕಾಶಗಳನ್ನು ಹೊಂದಿರುವ ನಾಡು ಎಂದು ಜಗತ್ತಿಗೆ ಅರಿವಾಗುವಂತೆ ಮಾಡುವುದು ಈ ಭೇಟಿಯ ಪ್ರಮುಖ ಉದ್ದೇಶವಾಗಿದೆ. ವಿಶ್ವಸಂಸ್ಥೆಯ ಸಾಮಾನ್ಯ ಸಭೆಯಲ್ಲೂ ಅವರು ಭಾಗಿಯಾಗಲಿದ್ದಾರೆ.

ನ್ಯೂಯಾರ್ಕ್­ಗೆ ಪ್ರಯಾಣಿಸುತ್ತಿರುವ ಪ್ರಧಾನಿಯವರು ಜರ್ಮನಿಯಲ್ಲಿ ಕೆಲ ನಿಮಿಷಗಳ ಕಾಲ ತಂಗಲಿದ್ದಾರೆ, ಬಳಿಕ ನ್ಯೂಯಾರ್ಕ್­ಗೆ ತೆರಳಿ ಹತ್ತು ಹಲವು ಕಾರ್ಯಕ್ರಮಗಳಲ್ಲಿ ಭಾಗಿಯಾಗಲಿದ್ದಾರೆ.

ಅಮೆರಿಕಾದಲ್ಲಿ ಪ್ರಧಾನಿ ಮೋದಿಯವರು ಪ್ರಮುಖ ಇಂಧನ ಕಂಪನಿಗಳ ದಿಗ್ಗಜರೊಂದಿಗೆ ಮಾತುಕತೆಯನ್ನು ನಡೆಸಲಿದ್ದಾರೆ, ಹೋಸ್ಟನಿನಲ್ಲಿ ಭಾರತೀಯ ಸಮುದಾಯ ಆಯೋಜನೆಗೊಳಿಸುತ್ತಿರುವ ‘ಹೌಡಿ, ಮೋದಿ’ ಕಾರ್ಯಕ್ರಮದಲ್ಲಿ ಭಾಗಿಯಾಗುತ್ತಿದ್ದಾರೆ, 74ನೇ ವಿಶ್ವಸಂಸ್ಥೆ ಸಾಮಾನ್ಯ ಸಭೆಯಲ್ಲಿ ಭಾಗಿಯಾಗುತ್ತಿದ್ದಾರೆ ಮತ್ತು ಸಭೆಯನ್ನು ಉದ್ದೇಶಿಸಿ ಪ್ರಮುಖ ಭಾಷಣವನ್ನೂ ಮಾಡಲಿದ್ದಾರೆ. ಅಲ್ಲದೇ, ಈ ಸಭೆಯ ಸೈಡ್­ಲೈನಿನಲ್ಲಿ ವಿಶ್ವದ ಹಲವು ದಿಗ್ಗಜ ನಾಯಕರನ್ನು ಭೇಟಿ ಮಾಡಿ ಮಾತುಕತೆ ನಡೆಸಲಿದ್ದಾರೆ.

ಮೋದಿ ಮತ್ತು ಅಮೆರಿಕಾ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ನಡುವೆ ದ್ವಿಪಕ್ಷೀಯ ಮಾಡುತುಕತೆಗಳು ನಡೆಯಲಿದ್ದು, ಉಭಯ ದೇಶಗಳ ನಡುವಣ ಸ್ನೇಹ ಸಂಬಂಧವನ್ನು ವೃದ್ಧಿಸುವ ನಿಟ್ಟಿನಲ್ಲಿ ಈ ಮಾತುಕತೆ ಸಾಕಷ್ಟು ಮಹತ್ವಪೂರ್ಣವಾಗಿದೆ.

ಬಿಲ್ & ಮೆಲಿಂಡಾ ಗೇಟ್ಸ್ ಫೌಂಡೇಶನ್ ಮೋದಿ ಅವರಿಗೆ ‘ಗ್ಲೋಬಲ್ ಗೋಲ್­ಕೀಪರ್ಸ್ ಅವಾರ್ಡ್ 2019’ ಅನ್ನು ನೀಡಿ ಗೌರವಿಸಲಿದೆ. ಸ್ವಚ್ಛ ಭಾರತಕ್ಕೆ ಅನನ್ಯ ಸೇವೆಯನ್ನು ಸಲ್ಲಿಸಿದ್ದಕ್ಕಾಗಿ ಈ ಪುರಸ್ಕಾರವನ್ನು ನೀಡಿ ಮೋದಿಯನ್ನು ಗೌರವಿಸಲಾಗುತ್ತಿದೆ.

ಸೆಪ್ಟಂಬರ್ 27ರಂದು ಮೋದಿಯವರ ಅಮೆರಿಕಾ ಭೇಟಿ ಮುಕ್ತಾಯವಾಗಲಿದೆ.