ರಕ್ಷಾಬಂಧನ ಮಾನವೀಯತೆಯ ಹಬ್ಬ: ಇಂದ್ರೇಶ್ ಕುಮಾರ್

ನವದೆಹಲಿ: ಮಾನವೀಯತೆಯ ಹಬ್ಬವಾಗಿ ಆಚರಿಸಲಾಗುವ ಏಕೈಕ ಹಬ್ಬವೆಂದರೆ ರಕ್ಷಾಬಂಧನ ಎಂದು ರಾಷ್ಟ್ರೀಯ ಸ್ವಯಂಸೇವಕ ಸಂಘದ ಹಿರಿಯ ಮುಖಂಡ ಮತ್ತು  ಮುಸ್ಲಿಂ ರಾಷ್ಟ್ರೀಯ ಮಂಚ್ (ಎಂಆರ್‌ಎಂ) ಮಾರ್ಗದರ್ಶಿ ಇಂದ್ರೇಶ್ ಕುಮಾರ್ ಅವರು ಹೇಳಿದ್ದಾರೆ.

ನವದೆಹಲಿಯ ಜಂತರ್ ಮಂತರ್‌ನ ಎನ್‌ಡಿಎಂಸಿ ಕನ್ವೆನ್ಷನ್ ಸೆಂಟರ್‌ನಲ್ಲಿ ಮುಸ್ಲಿಂ ರಾಷ್ಟ್ರೀಯ ಮಂಚ್, ಭಾರತ್-ಟಿಬೆಟ್ ಸಹಯೋಗ ಮಂಚ್, ರಾಷ್ಟ್ರೀಯ ಭದ್ರತೆಯ ಜಾಗೃತಿ ವೇದಿಕೆ, ಹಿಮಾಲಯ ಪರಿವಾರ್, ಧರ್ಮ ಸಂಸ್ಕೃತ ಸಂಗಮೆ ಸೇರಿದಂತೆ ವಿವಿಧ ಸಂಘಟನೆಗಳು ಆಯೋಜಿಸಿದ್ದ ಅಂತಾರಾಷ್ಟ್ರೀಯ ರಕ್ಷಾಬಂಧನ ಹಬ್ಬದಲ್ಲಿ ಭಾಗವಹಿಸಿ ಅವರು ಮಾತನಾಡಿದರು.

ಈ ಸಂಘಟನೆಗಳ ಮುಖಂಡರು, ಹಿಂದೂ, ಮುಸ್ಲಿಂ, ಕ್ರಿಶ್ಚಿಯನ್, ಬೌದ್ಧರು, ಸಿಖ್, ಜೈನ್ ಮುಂತಾದ ಧಾರ್ಮಿಕ ಮುಖಂಡರುಗಳು ಈ ಸಂದರ್ಭದಲ್ಲಿ  ಉಪಸ್ಥಿತರಿದ್ದರು.

ಅಂತಾರಾಷ್ಟ್ರೀಯ ರಕ್ಷಾಬಂಧನವನ್ನು ಆಚರಿಸುವ ಸಂಪ್ರದಾಯವನ್ನು ಏಳು ವರ್ಷಗಳ ಹಿಂದೆ ಪ್ರಾರಂಭಿಸಲಾಯಿತು ಎಂದು ನೆನಪಿಸಿಕೊಂಡ ಇಂದ್ರೇಶ್ ಕುಮಾರ್, ಎಲ್ಲಾ ವರ್ಣಗಳ ಜನರಲ್ಲಿ ದ್ವೇಷ ಮತ್ತು ಕೆಟ್ಟ ಭಾವನೆಗಳನ್ನು ನಿರ್ಮೂಲನೆ ಮಾಡಲು ಇದು ಅಗತ್ಯವಾಗಿದೆ ಎಂದು ಹೇಳಿದರು. ವಿಶೇಷವಾಗಿ ಕೆಲವು ನಾಯಕರು ಸಮಾಜವನ್ನು  ಜಾತಿ, ಧರ್ಮ, ಭಾಷೆ ಮತ್ತು ರಾಜಕೀಯದ ಹೆಸರಿನಲ್ಲಿ ವಿಭಜಿಸಲು ಪ್ರಯತ್ನಿಸುತ್ತಿರುವಾಗ ರಕ್ಷಾಬಂಧನದ ಹಬ್ಬ ಪ್ರಮುಖವಾಗುತ್ತದೆ ಎಂದರು. ಕಾಂಗ್ರೆಸ್ ಪಕ್ಷವು ಇಂತಹ ವಿಭಜನಾ ಕಾರ್ಯಗಳಲ್ಲಿ ಹೆಚ್ಚಾಗಿ ಪಾಲ್ಗೊಳ್ಳುತ್ತಿದೆ ಎಂದು ಅವರು ಆರೋಪಿಸಿದರು.

ಗಿಡಗಳನ್ನು ನೆಡಲು, ಸುತ್ತಮುತ್ತಲಿನ ಪ್ರದೇಶಗಳನ್ನು ಸ್ವಚ್ಛವಾಗಿಡಲು ಮತ್ತು ಸುಂದರ ವಾತಾವರಣದಲ್ಲಿ ವಾಸಿಸಲು ಈ ವೇಳೆ ಅವರು ಜನರಿಗೆ ಕರೆ ನೀಡಿದರು.

ಜಾತಿ, ಭಾಷೆ, ಪಂಥ ಮತ್ತು ಭೌಗೋಳಿಕ ಭಿನ್ನತೆಗಳಿಗಿಂತ ಮೇಲಿರುವ ಮಾನವೀಯತೆಯ ಈ ಸುಂದರ ಕೂಟವು  ಭಾರತೀಯತೆಯನ್ನು ಬಲಪಡಿಸಿದೆ ಎಂದು ಅವರು ಬಣ್ಣಸಿದರು.