ವರ್ಲ್ಡ್ ಯೂತ್ ಸ್ಕಿಲ್ ಡೇ : ಏರೋಸ್ಪೇಸ್, ಸ್ಮಾರ್ಟ್ ಅಗ್ರಿಕಲ್ಚರ್ ವಲಯದಲ್ಲಿ ತರಬೇತಿ ಕಾರ್ಯಕ್ರಮಕ್ಕೆ ಇಂದು ಚಾಲನೆ

ನವದೆಹಲಿ: ಕೇಂದ್ರ ಕೌಶಲ್ಯಾಭಿವೃದ್ಧಿ ಸಚಿವಾಲಯವು ಏರೋಸ್ಪೇಸ್ ಎಂಜಿನಿಯರಿಂಗ್ ಮತ್ತು ಸ್ಮಾರ್ಟ್ ಎಗ್ರಿಕಲ್ಚರ್ ವಲಯದಲ್ಲಿ ಎರಡು ಹೊಸ ತರಬೇತಿ ಕಾರ್ಯಕ್ರಮಗಳನ್ನು ಇಂದು ಆರಂಭಿಸಲಿದೆ. ಜುಲೈ 15 ರಂದು ವರ್ಲ್ಡ್ ಯೂತ್ ಸ್ಕಿಲ್ ಡೇ ಹಿನ್ನಲೆಯಲ್ಲಿ ತರಬೇತಿ ಕಾರ್ಯಕ್ರಮಗಳಿಗೆ ಚಾಲನೆಯನ್ನು ನೀಡಲಾಗುತ್ತಿದೆ.

ವಾಯುಪಡೆಯಲ್ಲಿ ಆಧುನೀಕರಣ ಮತ್ತು ನಾಗರಿಕ ವಿಮಾನಯಾನ ವಲಯದಲ್ಲಿ ಕ್ಷಿಪ್ರ ಪ್ರಗತಿಗಳು ಆಗುತ್ತಿರುವ ಹಿನ್ನಲೆಯಲ್ಲಿ ಈ ವಲಯಕ್ಕೆ ತರಬೇತು ಪಡೆದ ಸಿಬ್ಬಂದಿಗಳ ಅವಶ್ಯಕತೆ ಇದೆ. ಈ ವಲಯದಲ್ಲಿ ತರಬೇತಿ ನೀಡುವ ಕಾರ್ಯಕ್ರಮ ಜವಾಬ್ದಾರಿಯನ್ನು ಐಟಿಐ ನಾಗ್ಪುರ ವಹಿಸಲಿದೆ, ಪ್ರಮುಖ ಉತ್ಪಾದನಾ ಕೇಂದ್ರಗಳನ್ನು ಹೊಂದಿರುವ ಚೆನ್ನೈ ಮತ್ತು ಕೊಯಂಬತ್ತೂರುಗಳಲ್ಲಿ ತರಬೇತಿ ಕಾರ್ಯಕ್ರಮ ನಡೆಯಲಿದೆ.

ಅದೇ ರೀತಿ, ಸ್ಮಾರ್ಟ್ ಎಗ್ರಿಕಲ್ಚರ್ ವಲಯಕ್ಕೂ ತರಬೇತಿ ಪಡೆದ ಸಿಬ್ಬಂದಿಗಳ ಅವಶ್ಯಕತೆ ಹೆಚ್ಚಾಗಿದೆ. ಮಣ್ಣಿನ ಪರೀಕ್ಷೆ, ನೀರಾವರಿ ನಿಯಂತ್ರಣ, ಮಾಹಿತಿ ತಂತ್ರಜ್ಞಾನವನ್ನು ಬಳಸಿಕೊಂಡು ಅಗ್ರಿಕಲ್ಚರ್ ಇನ್ ಪುಟ್ ಮತ್ತು ಅಗ್ರಿಕಲ್ಚರ್ ಸರ್ವಿಸ್ ನಿಯಂತ್ರಿತ ಪೂರೈಕೆ ಇತ್ಯಾದಿಗಳಿಗೆ ಕೌಶಳ್ಯಭರಿತ ಸಿಬ್ಬಂದಿಗಳ ಅವಶ್ಯಕತೆ ಇದೆ. ಹೀಗಾಗಿ ಈ ವಲಯದಲ್ಲಿ ತರಬೇತಿಯನ್ನು ನೀಡಲಿದೆ.

ಪ್ರಧಾನಮಂತ್ರಿ ಕೌಶಲ ವಿಕಾಸ್ ಯೋಜನೆಯ ಭಾಗವಾಗಿ ಕೌಶಲ್ಯಾಭಿವೃದ್ಧಿ ಸಚಿವಾಲಯವು ತರಬೇತಿ ಕಾರ್ಯಕ್ರಮಗಳನ್ನು ಆಯೋಜನೆಗೊಳಿಸಿದೆ.

ಜುಲೈ 15 ರಂದು ಪ್ರಾರಂಭವಾಗಲಿರುವ ಈ ಎರಡು ತರಬೇತಿ ಕಾರ್ಯಕ್ರಮಗಳು ಬಿಕಾಂ ಮತ್ತು ಅಪ್ಲೈಡ್ ಲಾಜಿಸ್ಟಿಕ್ಸ್‌ ಬಿಬಿಎ ಆಗಿದ್ದು,  ಮೂರು ವರ್ಷದ ಕೋರ್ಸ್‌ ಆಗಿದೆ. ಇದರಡಿ ಅರ್ಧದಷ್ಟು ತರಗತಿ ಆಧಾರಿತ ಮತ್ತು ಇನ್ನೊಂದು ಅರ್ಧ ಲಾಜಿಸ್ಟಿಕ್ಸ್ ಕಂಪನಿಗಳಲ್ಲಿ ಪಠ್ಯಕ್ರಮ ಆಧಾರಿತ ತರಬೇತಿಯನ್ನು ನೀಡಲಾಗುತ್ತದೆ.

ವಿಶ್ವದ ಅತೀದೊಡ್ಡ ಶಾರ್ಟ್ ವೀಡಿಯೋ ವೇದಿಕೆ ಟಿಕ್ ಟಾಕ್ ಮತ್ತು ನ್ಯಾಷನಲ್ ಸ್ಕಿಲ್ ಡೆವಲಪ್ಮೆಂಟ್ ಕಾರ್ಪೋರೇಶನ್ (NSDC) ಪರಸ್ಪರ ಕೈಜೋಡಿಸಿ  ‘Skills4All’ ಆ್ಯಪ್ ಕ್ಯಾಂಪೇನ್ ಅನ್ನು ಆರಂಭಿಸುವ ಮೂಲಕ ‘ವರ್ಲ್ಡ್ ಯೂತ್ ಸ್ಕಿಲ್ ಡೇ 2019’ ಅನ್ನು ಆಚರಿಸಿದೆ.

ಭಾರತದಲ್ಲಿ ಸ್ಕಿಲ್ ಇಂಡಿಯಾ ಯೋಜನೆಯನ್ನು ಜಾರಿಗೆ ತಂದು ನಾಲ್ಕು ವರ್ಷಗಳಾಗಿವೆ. ನರೇಂದ್ರ ಮೋದಿಯವರ ಮೊದಲನೆಯ ಅವಧಿಯ ಸರ್ಕಾರ ಈ ಯೋಜನೆಯನ್ನು ಜಾರಿಗೆ ತಂದಿತ್ತು.